សហរដ្ឋអាមេរិក ៖ ក្រុមហ៊ុន​អាកាសចរណ៍​ខ្នាត​យក្ស​កូរ៉េ​ខាងត្បូង Korean Air កាលពី​ថ្ងៃ​ទី​២៥ ខែសីហា ឆ្នាំ​២០២៥ បាន​ប្រកាស​ពី​ការ​បញ្ជា​ទិញ​យន្តហោះ និង​ម៉ាស៊ីន​យន្តហោះ​ពី​ក្រុមហ៊ុន ២ របស់​សហរដ្ឋអាមេរិក ដោយ​មាន​តម្លៃ​សរុប​ប្រមាណ ៥០​ពាន់​លាន​ដុល្លារ​អា​មេ​រិ​ក​។ កិច្ចព្រមព្រៀង​ទិញ​លក់​នេះ កើតឡើង​នៅ​ក្នុង​ដំណើរ​ទស្សនកិច្ច​របស់​ប្រធានាធិបតី​កូរ៉េ​ខាងត្បូង លោក លី ចែ​ម្យុ​ង (Lee Jae Myung) ទៅ​កាន់​ទីក្រុង​វ៉ា​ស៊ី​ន​តោន​។ នេះ​បើ​យោង​តាម​ប្រភព​ពី​ទីភ្នាក់ងារសារព័ត៌មាន Reuters និង BBC បាន​ចេញផ្សាយ​។

ក្រុមហ៊ុន​អាកាសចរណ៍​ខ្នាត​យក្ស​របស់​សហរដ្ឋអាមេរិក Boeing និង​ក្រុមហ៊ុន Korean Air បាន​ប្រកាស​ពី​កិច្ចព្រមព្រៀង​តម្លៃ ៣៦,៥​ពាន់​លាន​ដុល្លារ​អា​មេ​រិ​ក​សម្រាប់​យន្តហោះ​ចំនួន ១០៣​គ្រឿង​។

កិច្ចព្រមព្រៀង​នេះ រួម​មាន​យន្តហោះ​ដឹក​អ្នកដំណើរ Boeing 787, 777 និង 737 ខណៈ​កិច្ចព្រមព្រៀង​នេះ គឺជា​ការ​បញ្ជា​ទិញ​យន្តហោះ​ចំនួន​ដ៏​ច្រើន​បំផុត​ក្នុង​ប្រវត្តិសាស្ត្រ​ក្រុមហ៊ុន Korean Air​។ ស្រប​ពេល​ដែល​ប្រធានាធិបតី​អា​មេ​រិ​ក លោក ដូ​ណា​ល់ ត្រាំ (Donald Trump) ជំរុញ​ឱ្យ​កូរ៉េ​ខាងត្បូង​ដែល​ជា​ដៃគូ​ពាណិជ្ជកម្ម​ដ៏​សំខាន់​ជាមួយ​សហរដ្ឋអាមេរិក​ធ្វើ​អាជីវកម្ម​បន្ថែម​ទៀត​ជាមួយ​បណ្តា​ក្រុមហ៊ុន​អា​មេ​រិ​ក​។

ទន្ទឹម​ជាមួយ​គ្នា​នោះ ក្រុមហ៊ុន Korean Air កាលពី​ថ្ងៃ​ទី​២៥ ខែសីហា កន្លង​ទៅ ក៏​បាន​ប្រកាស​អំពី​កិច្ចព្រមព្រៀង​ដាច់​ដោយឡែក​មួយ​ផ្សេង​ទៀត​ជាមួយ​ក្រុមហ៊ុន​អា​មេ​រិ​ក GE (General Electric) លើ​ការ​បញ្ជា​ទិញ និង​សេវា​ថែទាំ​គ្រឿង​ម៉ាស៊ីន ដោយ​មាន​តម្លៃ​ដល់ ១៣,៧​ពាន់​លាន​ដុល្លារ​។

ក្រុមហ៊ុន Boeing ទទួល​បានការ​បញ្ជា​ទិញ​យន្តហោះ​ដ៏​ច្រើន​សន្ធឹកសន្ធាប់​ក្នុង​រយៈពេល​ប៉ុន្មាន​ខែ​ថ្មី​ៗ​នេះ នៅ​ពេល​ប្រទេស​ជា​ច្រើន​បាន​នឹង​កំពុង​ចរចា​លើ​កិច្ចព្រមព្រៀង​ពាណិជ្ជកម្ម​ជាមួយ​រដ្ឋបាល​លោក ត្រាំ លើ​ការ​បញ្ជា​ទិញ​យន្តហោះ​របស់​ក្រុមហ៊ុន​អាកាសចរណ៍​ខ្នាត​យក្ស​របស់​អា​មេ​រិ​កមួយ​នេះ​។

នាយក​ប្រតិបត្តិ​ក្រុមហ៊ុន Korean Air លោក Cho Won-tae ដែល​កាលពី​ថ្មី​ៗ​នេះ បាន​ទៅ​ទស្សនា​រោងចក្រ​មួយ​កន្លែង​របស់​ក្រុមហ៊ុន Boeing នៅ​សហរដ្ឋអាមេរិក បាន​ប្រាប់ Reuters កាលពី​ថ្ងៃ​ទី​២៥ ខែសីហា ដូច្នេះ​ថា ការ​បញ្ជា​ទិញ​បំបែក​កំណត់​ត្រា​មួយ​នេះ នឹង​ជួយ​ក្រុមហ៊ុន​អាកាសចរណ៍​កូរ៉េ​ដ៏​ធំ​បំផុត​ពង្រីក​ទៅ​កាន់​គោលដៅ​ជា​ច្រើន​ទៀត​នៅ​សហរដ្ឋអាមេរិក អា​មេ​រិ​កឡា​ទី​ន និង​អា​មេ​រិ​ក​ខាងត្បូង​។

ជាមួយ​គ្នា​នោះ លោក​ក៏​បាន​បញ្ជាក់​ថា ប្រហែល​ពាក់កណ្តាល​នៃ​ការ​បញ្ជា​ទិញ​ថ្មី​នៃ​យន្តហោះ​ចំនួន ១០៣​គ្រឿង នឹង​ជា​យន្តហោះ 737 MAX ១០​គ្រឿង ហើយ​ក្រៅពី​នោះ​គឺជា​យន្តហោះ​ចម្រុះ 777-9 និង 787 ហើយ​ប្រហែល ៨០% នៃ​យន្តហោះ Boeing ថ្មី​នឹង​ត្រូវ​ជំនួស​យន្តហោះ​ដែល​មាន​ស្រាប់​របស់​ក្រុមហ៊ុន​។ លើស​ពី​នេះ​ទៀត លោក​បន្ថែម​ថា ក្រុមហ៊ុន​មាន​ជំនឿ​លើ​ក្រុមហ៊ុន Boeing បើ​ទោះជា​មាន​បញ្ហា​ពី​មុន​ដែល​ក្រុមហ៊ុន​ផលិត​មួយ​នេះ​បាន​ជួប​ប្រទះ​ក្ដី​។

ក្រុមហ៊ុន Korean Air កាលពី​ឆ្នាំ​មុន​បាន​ប្រកាស​ថា ខ្លួន​នឹង​បញ្ជា​ទិញ​យន្តហោះ 777-9 ២០​គ្រឿង និង 787-10 ២០​គ្រឿង​ពី​ក្រុមហ៊ុន Boeing ជាមួយ​ជម្រើស​បញ្ជា​ទិញ ១០​គ្រឿង​បន្ថែម​ទៀត​នៅ​ពេល​អនាគត​។ ប៉ុ​ន្ត​ទោះ​យ៉ាងណា ការ​បញ្ជា​ទិញ​ថ្មី ដែល​ត្រូវ​បាន​ប្រកាស​កាលពី​ថ្ងៃ​ទី​២៥ ខែសីហា កន្លង​ទៅ គឺជា​ការ​បញ្ជា​ទិញ​ដាច់​ដោយឡែក​ពី​ការ​ទិញ​នោះ​។

ប្រភព​ពី BBC បាន​រាយការណ៍​ថា នៅ​ថ្ងៃ​ទី​២៥ ខែសីហា ដដែល​នោះ ក្រុមហ៊ុន​ផលិត​រថយន្ត​ខ្នាត​យក្ស​កូរ៉េ​ខាងត្បូង Hyundai Motor Group ក៏​បាន​ប្រកាស​ថា ខ្លួន​កំពុង​តែ​បង្កើន​ការ​វិនិយោគ​របស់​ខ្លួន​នៅ​សហរដ្ឋអាមេរិក​ពី​ចំនួន ២១​ពាន់​លាន​ដុល្លារ ទៅ​ដល់ ២៦​ពាន់​លាន​ដុល្លារ​។

ការ​ប្រកាស​នេះ កើតឡើង​មិនយូរ​ប៉ុន្មាន​បន្ទាប់​ពី​ជំនួប​ផ្លូវការ​រវាង​ប្រធានាធិបតី​អា​មេ​រិ​ក និង​កូរ៉េ​ខាងត្បូង ដោយ​ក្រុមហ៊ុន​បាន​បញ្ជាក់​ថា ខ្លួន​គ្រោង​នឹង​បង្កើត​ទីតាំង​ឈរជើង​ថ្មី​នៅ​លើ​ទឹក​សហរដ្ឋអាមេរិក ដែល​នឹង​អាច​ផលិត​មនុស្ស​យន្ត​បាន​រហូត​ដល់ ៣​ម៉ឺន​គ្រឿងក្នុង​១​ឆ្នាំ​៕