ខេត្តបន្ទាយមានជ័យ ៖ ទាហានថៃបានដាក់ស៊ីរ៉ែនរលកសម្លេងទប់ទល់ជាមួយប្រជាពលរដ្ឋនៅពេលរុញច្រានមិនឱ្យដាក់លួសបន្លាក្នុងទឹកដីកម្ពុជា កាលពីល្ងាចថ្ងែទី២៥ សីហា ឆ្នាំ២០២៥ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ។…
ខេត្តបន្ទាយមានជ័យ ៖ ទាហានថៃបានដាក់ស៊ីរ៉ែនរលកសម្លេងទប់ទល់ជាមួយប្រជាពលរដ្ឋនៅពេលរុញច្រានមិនឱ្យដាក់លួសបន្លាក្នុងទឹកដីកម្ពុជា កាលពីល្ងាចថ្ងែទី២៥ សីហា ឆ្នាំ២០២៥ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ។
ប្រជាពលរដ្ឋបានប្រាប់ថា ទាហានថៃពិតជាបានដាក់ស៊ីរ៉ែនរលកសម្លេងលាន់សូរខ្លាំងលើរថយន្តទ័ពដើម្បីទប់ទល់ជាមួយប្រជាពលរដ្ឋមិនតិចជាង៥០០នាក់ ដែលរុញច្រានទាហានថៃបានចូលដាក់លួសបន្លាមកលើទឹកដីកម្ពុជាសារជាថ្មីម្តងទៀត ដែលមានបំណងចង់ព័ទ្ធយកចម្ការអំពៅជាច្រើនហិកតាក្នុងភូមិសាស្គ្រភូមិជោគជ័យ ។
ប្រជាពលរដ្ឋបានបញ្ជាក់ទៀតថា នៅពេលប្រជាពលរដ្ឋប្រើប្រាស់ដំបងដើមអាកាស្យាទប់ទល់ និងរុញច្រានទាហានថៃបានដកថយចូលកន្លែងចាស់ ហើយប្រជាពលរដ្ឋនាំគ្នាស្រែកនៅម្ខាងប្រឡាយ ស្រាប់តែទាហានថៃបានដាក់ស៊ីរ៉ែនរលកសម្លេងលាន់សូរខ្លាំងបណ្តាលឱ្យហឹងត្រចៀក ដែលជាស៊ីរ៉ែននេះសម្រាប់ប្រើប្រាស់ទប់ទល់បាតុករដាក់រយៈពេលជិត១ម៉ោងក្រោយបានបិទ ក្រោយប្រជាពលរដ្ឋបានថយក្រោយ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានបញ្ជាក់ដែរថា ទាហានថៃបានលួចចូលដាក់លួសបន្លាម្តងទៀតនៅលើទឹកដីកម្ពុជាក្នុងភូមិសាស្គ្រភូមិជោគជ័យនៅចម្ងាយពីកន្លែងចាស់ខាងត្បូងប្រមាណជា១០០ម៉ែត្រ ហើយប្រជាពលរដ្ឋរាប់រយនាក់បានរុញច្រានទប់ដកថយត្រឡប់ក្រោយវិញ ហើយលួសបន្លាត្រូវបានប្រជាពលរដ្ឋនាំគ្នាសែងយកមករក្សាទុកជាភស្តុតាងក្នុងការរំលោភបំពានពីទាហានថៃ ។
ចែករំលែកព័តមាននេះ