ក្រោយមានដំណឹងការស្លាប់របស់ដំរីនៅក្នុងសួនសត្វភ្នំតាម៉ៅឈ្មោះ Lucky បានធ្វើមហាជន ជាពិសេស អ្នកដែលធ្លាប់មានអនុស្សាវរិយ៍ថតរូបជាមួយដំរីដ៏ឆ្លាតមួយនេះ បានសម្តែងភាពក្តុកក្តួល និងអាឡោះអាល័យជាពន់ពេក ដ្បិតដំរីមួយនេះទទួលបានការអាណិតស្រឡាញ់ច្រើន ។ សម្រាប់តារាចម្រៀង…
ក្រោយមានដំណឹងការស្លាប់របស់ដំរីនៅក្នុងសួនសត្វភ្នំតាម៉ៅឈ្មោះ Lucky បានធ្វើមហាជន ជាពិសេស អ្នកដែលធ្លាប់មានអនុស្សាវរិយ៍ថតរូបជាមួយដំរីដ៏ឆ្លាតមួយនេះ បានសម្តែងភាពក្តុកក្តួល និងអាឡោះអាល័យជាពន់ពេក ដ្បិតដំរីមួយនេះទទួលបានការអាណិតស្រឡាញ់ច្រើន ។
សម្រាប់តារាចម្រៀង លោកព្រាប សុវត្ថិ ដែលធ្លាប់មានអនុស្សាវរីយ៍ថតចម្រៀងជាមួយដំរី Lucky នោះ លោកក៏មិនខុសពីមហាជនទូទៅដែរ ដោយលោកបានចូលរួមសម្តែងការសោកស្តាយចំពោះការស្លាប់របស់ដំរី Lucky ខណៈពេលដែលលោកបានឧទ្ទិសឲ្យដំរីមួយនេះបានកើតជាមនុស្សវិញ ។
តាមរយៈសំណេរដែលបានសរសេរបង្ហោះលើបណ្តាញសង្គមតារាចម្រៀងលោក ព្រាប សុវត្ថិ បានលើកឡើងថា អនុស្សាវរីយ៍ដែលដំរី lucky បានទុកអោយមហាជនខ្មែរទស្សនា និងស្រណោះ ។ លោកបញ្ជាក់ថា ដោយក្ដីស្រលាញ់យ៉ាងច្រើនលើសលុបលើដំរី lucky សូមអោយ lucky កើតមកកំណើត ជាមនុស្សបានដឹងបានទទួលការស្រលាញ់ពីមនុស្សផងទាំងពួង ។
ជាការកត់សម្គាល់ ដំរីដែលមានឈ្មោះថា lucky ជាដំរីដែលធ្លាប់បានចូលរួមសម្តែងជាមួយលោកព្រាប សុវត្ថិ តាមរយៈបទ ដំរីថ្នមស្នេហ៍ កាលពីជាង១០ឆ្នាំមុន ខណៈកន្លងមកដំរីដ៏ឆ្លាតមួយក្បាលនេះ ក៏បានទទួលបានការចាប់អារម្មណ៍ផងដែរពីអ្នកទេសចរក្នុងស្រុក។
ក្នុងបទចម្រៀង ដំរីថ្នមស្នេហ៍ ដំរីបានបង្ហាញទេពកោសល្យរាំតាមចង្វាក់ភ្លេង ជាហេតុធ្វើឱ្យរូបភាពក្នុងវីដេអូចម្រៀងខាងលើនេះ មានភាពទាក់ទាញពីអ្នកទស្សនា ដោយអមនឹងសំនៀងពីរោះរណ្តំរបស់តារាចម្រៀងលោក ព្រាប សុវត្ថិ ផងដែរ ។
គួរបញ្ជាក់ថា រដ្ឋបាលព្រៃឈើ បានជូនដំណឹងពីការស្លាប់របស់ដំរីឈ្មោះ ឡាក់គី (Lucky) នៅថ្ងៃទី២៤ ខែសីហា ឆ្នាំ២០២៥ បន្ទាប់ពីធ្លាក់ខ្លួនឈឺភ្លាមៗកាលពីល្ងាចថ្ងៃសុក្រនេះ ។ រដ្ឋបាលព្រៃឈើបានអះអាងថា ក្រុមពេទ្យសត្វរបស់យើងបានផ្តល់ការព្យាបាលយ៉ាងយកចិត្តទុកដាក់ខ្ពស់បំផុត ប៉ុន្តែទោះបីជាបានប្រឹងប្រែងព្យាយាមអស់ពីសមត្ថភាពក៏ដោយ ក៏នៅតែមិនអាចជួយសង្គ្រោះជីវិតរបស់ឡាក់គីបាន។
លោកទ្រី ស៊ីថេង ដែលជាហ្មរបស់ឡាក់គីបានបន្តជួយថែទាំ«ឡាក់គី»បើទោះបីជាបានចាកចេញពី Wildlife Alliance ហើយក៏មានវត្តមាននៅជាប់ជាមួយឡាក់គី នៅពេលមានអាការៈជំងឺផងដែរ ។
ក្នុងឱកាសនេះ រដ្ឋបាលព្រៃឈើសូមថ្លែងអំណរគុណយ៉ាងជ្រាលជ្រៅចំពោះការលះបង់របស់ក្រុមអ្នកថែទាំ ពេទ្យសត្វ និងបុគ្គលិកទាំងអស់នៅមជ្ឈមណ្ឌលភ្នំតាម៉ៅ ជាពិសេស លោក ទ្រី ស៊ីថេង ដែលប្រៀបដូចជាឪពុកដែលបានផ្តល់ក្តីស្រឡាញ់និងការថែទាំ«ឡាក់គី»ប្រកបដោយវិជ្ជាជីវៈយ៉ាងខ្ជាប់ខ្ជួនពេញមួយជីវិត ។
យើងខ្ញុំទាំងអស់គ្នា ក៏សូមចូលរួមរំលែកមរណៈទុក្ខយ៉ាងក្រៀមក្រំជាមួយក្រុមហ្មថែទាំដំរី ព្រមទាំងបងប្អូនប្រជាពលរដ្ឋ និងអ្នកស្រឡាញ់ដំរី«ឡាក់គី» ទាំងអស់ ចំពោះការបាត់បង់ដំរីដែលជានិមិត្តរូបមួយដ៏សំខាន់នៃមជ្ឈមណ្ឌលសង្គ្រោះសត្វព្រៃភ្នំតាម៉ៅ។
សម្រាប់រយៈពេលជាង ២៦ឆ្នាំនៃការចិញ្ចឹមបីបាច់ថែរក្សានៅក្នុងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដំរី «ឡាក់គី» បានវិវត្តពីកូនដំរីតូចមួយ ទៅជានិមិត្តរូបនៃភាពអង់អាច ភាពទន់ភ្លន់ និងបានបំផុសគំនិតឱ្យសាធារណជនមានការស្រឡាញ់ និងការលើកកម្ពស់ការយល់ដឹងអំពីសុខុមាលភាពដំរី និងការអភិរក្សសត្វព្រៃ។
រដ្ឋបាលព្រៃឈើនៅតែបន្តប្តេជ្ញាការពារ និងថែរក្សាសត្វព្រៃនៅកម្ពុជា និងសូមអំពាវនាវដល់សាធារណជនទាំងអស់ បន្តចូលរួមគាំទ្រកិច្ចការអភិរក្សសត្វព្រៃ និងការងារថែទាំសត្វនៅមជ្ឈមណ្ឌលភ្នំតាម៉ៅ ដើម្បីជំរុញការយកចិត្តទុកដាក់លើធនធានសត្វព្រៃរបស់យើងឱ្យបានដូចដំរី«ឡាក់គី»ក្នុងពេលកន្លងមក៕
ចែករំលែកព័តមាននេះ