ខេត្តព្រះវិហារ ៖ នៅព្រឹកថ្ងៃទី១៣ កក្កដាលោកអ៊ុំ ម៉ារ៉ា អភិបាលខេត្ដបាននាំយកអំណោយផ្ទាល់ខ្លួនរបស់លោកជាអង្ករចំនួន៥តោន, សារុងចំនួន៣៧០, អាវយឺត៣៧០ កូនស្វាយចំនួន១០០០ដើម ថវិកាមួយចំនួន និងផ្ទាំងរូបថតសម្ដេចអគ្គមហាសេនាបតីតេជោហ៊ុន សែន និងលោកជំទាវកិត្ដិព្រឹទ្ធបណ្ឌិតប៊ុន រ៉ានី ហ៊ុនសែនចំនួន១០០៧ផ្ទាំង ដែលជាអំណោយរបស់ក្រសួងអភិវឌ្ឍន៍ជនបទតាមរយៈលោកអ៊ុំ ម៉ារ៉ា ដើម្បីចែកជូនគ្រួសារទ័ពចំនួន៩ភូមិក្នុងនោះមានភូមិសែនរុងរឿង១ដល់ភូមិសែនរុងរឿង៥ ភូមិសែនតេជ្ជៈ, ភូមិតេជោមរកត, ភូមិសែនជ័យ និងភូមិសែនតេជោបុស្សស្បូវ។
លោកឧត្ដមសេនីយ៍ទោដួង ច័ន្ទ មេបញ្ជាការកងពលតូចអន្ដរាគមន៍លេខ៩ជំនួសមុខឱ្យកងកម្លាំង និងគ្រួសារទ័ពបានថ្លែងស្វាគមន៍ដល់ប្រតិភូដែលបាននាំយកអំណោយទៅប្រគល់ជូនគ្រួសារទ័ពនៅឯព្រំដែន។
លោកអ៊ុំ ម៉ារ៉ា អភិបាលខេត្ដមានមតិសំណេះសំណាលទៅកាន់គ្រួសារទ័ព និងកងទ័ពដោយបានពាំនាំប្រសាសន៍ផ្ដាំផ្ញើការសាកសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងលោកជំទាវកិត្ដិព្រឹទ្ធបណ្ឌិតប៊ុនរ៉ានី ហ៊ុន សែន ប្រធានកាកបាទក្រហមកម្ពុជាដែលគ្រប់ពេលវេលាសម្ដេច និងលោកជំទាវតែងតែយកចិត្ដទុកដាក់ដល់ជីវភាពរស់នៅរបស់ប្រជាពលរដ្ឋដែលកំពុងរស់នៅតាមបណ្ដោយព្រំដែននៃតំបន់ដាច់ស្រយាល ។
លោកបានរំលឹកដល់កងកម្លាំង និងគ្រួសារទ័ពទាំងអស់ត្រូវយកចិត្ដទុកដាក់ក្នុងការបង្កបង្កើនផលដាំដំណាំកសិកម្មឱ្យបានច្រើននារដូវវស្សានេះដើម្បីទុកជួយផ្គត់ផ្គង់ដល់ជីវភាពគ្រួសារដោយកុំរំពឹងតែលើប្រាក់បៀវត្សដែលរាជរដ្ឋាភិបាលផ្គត់ផ្គង់ឱ្យទាំងស្រុង។
លោកអភិបាលខេត្ដបានសង្កត់ធ្ងន់ដល់នាយពលទាហាន និងគ្រួសារទ័ពទាំងអស់មិនត្រូវនាំគ្នារកស៊ីខុសច្បាប់ ពិសេសគឺការឡើងភ្នំរកស៊ី
ឈើគ្រញូងខុសច្បាប់ដែលរដ្ឋាភិបាលបានហាមឃាត់ ។ កងទ័ពសៀមមិនបានយោគយល់ខ្មែរយើងទេ គឺកងទ័ពសៀមចាប់ប្រជាពលរដ្ឋខ្មែរ
ជាច្រើននាក់យកទៅដាក់គុកក្នុងប្រទេសគេ ដូច្នេះពេលនេះត្រូវតែបញ្ឈប់រាល់អំពើដែលបានដឹងហើយឮហើយនោះ។
លោកអភិបាលខេត្ដអ៊ុំ ម៉ារ៉ា បានឧបត្ថម្ភថវិកាដល់មេភូមិចំនួន៩ភូមិក្នុងម្នាក់ៗ១០ម៉ឺនរៀល ឧបត្ថម្ភកងកម្លាំង៧០នាក់ ដែលបានទៅចូលរួមក្នុងម្នាក់ៗ២ម៉ឺនរៀល ឧបត្ថម្ភទីបញ្ជាការកងពលតូចអន្ដរាគមន៍លេខ៩ចំនួន២លានរៀលឧបត្ថម្ភវរៈប្រចាំការសមរភូមិមុខរបស់យោធភូមិភាគទី១ ចំនួន៥០ម៉ឺនរៀល ៕
ចែករំលែកព័តមាននេះ