ក្រសួងសម្រេចលុបអាជ្ញាបណ្ណ សារព័ត៌មានអនឡាញមួយ ដែលបំពានយ៉ាងធ្ងន់ធ្ងរលើក្រមសីលធម៌វិជ្ជាជីវៈ
រាជធានីភ្នំពេញ ៖ ក្រសួងព័ត៌មាន នៅថ្ងៃទី២១ ខែសីហា ឆ្នាំ២០២៥នេះ បានសម្រេចលុបអាជ្ញាបណ្ណគេហទំព័រ សារ៉ា អិនស៊ីស៊ី ដេលី…
រាជធានីភ្នំពេញ ៖ ក្រសួងព័ត៌មាន នៅថ្ងៃទី២១ ខែសីហា ឆ្នាំ២០២៥នេះ បានសម្រេចលុបអាជ្ញាបណ្ណគេហទំព័រ សារ៉ា អិនស៊ីស៊ី ដេលី ធ្វើអាជីវកម្មផ្សព្វផ្សាយតាមរយៈគេហទំព័រឈ្មោះ «ccn-daily.com» មានអាសយដ្ឋានទីស្នាក់ការ ស្ថិតនៅភូមិក្បាលដំរី ឃុំស្វាយយា ស្រុកស្វាយជ្រំ ខេត្តស្វាយរៀង ។
ការសម្រេចលុបអាជ្ញាបណ្ណរបស់អង្គភាពសារព័ត៌មានអនឡាញនេះ ដោយសារបានរំលោភបំពានយ៉ាងធ្ងន់ធ្ងរលើក្រមសីលធម៌វិជ្ជាជីវៈសារព័ត៌មាន ដោយផ្សព្វផ្សាយព័ត៌មានមិនត្រឹមត្រូវ គ្មានការផ្ទៀងផ្ទាត់ប្រភពច្បាស់លាស់ ធ្វើឱ្យសាធារណមតិ មានការយល់ច្រឡំ និងញុះញង់ និងធ្វើឱ្យប៉ះពាល់អវិជ្ជមានដល់សន្តិសុខជាតិ ។
សូមជម្រាបថា នៅព្រឹកទី២១ សីហានេះ លោក ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ ក៏បានធ្វើការកោះហៅ អ្នកសារព័ត៌មានខាងលើ មកអប់រំ អំពីបញ្ហានៃការថតលេណដ្ឋានកងទ័ព ការចល័តទ័ព និងការដឹកសម្ភារៈយោធាជាដើម។ល។ និងណែនាំ កុំឲ្យផ្សព្វផ្សាយផ្តេសផ្តាសបន្តទៅទៀត ហើយអ្នកសារព័ត៌មានរូបនោះ គាត់ក៏បានផ្តិតមេដៃ សន្យាថាឈប់ថតហើយ អ្វីដែលជាបំរាមរបស់ក្រសួង។ ប៉ុន្តែអ្នកសារព័ត៌មានរូបនោះ បន្ទាប់ពីត្រលប់មកដល់ផ្ទះវិញ បានតែ០៥នាទីប៉ុណ្ណោះក៏បានបង្ហោះពីលេណដ្ឋានកងទ័ព នៅច្រកព្រៃចន្ទ បន្ថែមទៀត ដែលខុសពីកិច្ចសន្យាទាំងស្រុង និងធ្វើឱ្យប៉ះពាល់ដល់សន្តិសុខជាតិ ៕
ចែករំលែកព័តមាននេះ