រាជធានីភ្នំពេញ ៖ ជនសង្ស័យម្នាក់ បានលួចដោះយកម៉ូតូចេញពីរ៉ឺម៉កបាន១គ្រឿង រួចជិះយកទៅទុកនៅចំណុចផ្ទះជួលមួយកន្លែង ដែលមានលក់អីវាន់ ។ បន្ទាប់មកបានទៅបើកធុងទឹកកកលួចយកទឹកសុទ្ធ និងភេសជ្ជៈផឹក ប៉ុន្តែត្រូវបុរសម្ចាស់ផ្ទះឃើញទាន់…
រាជធានីភ្នំពេញ ៖ ជនសង្ស័យម្នាក់ បានលួចដោះយកម៉ូតូចេញពីរ៉ឺម៉កបាន១គ្រឿង រួចជិះយកទៅទុកនៅចំណុចផ្ទះជួលមួយកន្លែង ដែលមានលក់អីវាន់ ។ បន្ទាប់មកបានទៅបើកធុងទឹកកកលួចយកទឹកសុទ្ធ និងភេសជ្ជៈផឹក ប៉ុន្តែត្រូវបុរសម្ចាស់ផ្ទះឃើញទាន់ ក៏ស្រែកឆោឡោបង្កការភ្ញាក់ផ្អើលឡើង ។
ខណៈនោះ ជនសង្ស័យភ័យណាស់ ក៏បានរត់គេចខ្លួនចូលទៅក្នុងភូមិ ហើយម្ចាស់ផ្ទះខាងលើ ក៏នៅតែដេញតាមដែរ ប៉ុន្តែដេញអត់ទាន់ឡើយ ។លុះមួយសន្ទុះក្រោយមក ចោរម្នាក់នេះបានលួចម៉ូតូ១គ្រឿងទៀត ក៏ជិះដេញបុកម្ចាស់ផ្ទះជួលខាងលើ ដែលកំពុងដើរត្រឡប់មកផ្ទះវិញ ។ អ្នកភូមិឃើញ បានស្រែកប្រាប់ឲ្យម្ចាស់ផ្ទះនោះគេចចេញទាន់ ធ្វើឲ្យចោរជើងខ្លាំងនេះដួលម៉ូតូ ក៏ត្រូវប្រជាពលរដ្ឋឃាត់បានវាយននៀលដីទ្រមខ្លួន ទើបប្រគល់ឲ្យនគរបាលសួរនាំ ។
ហេតុការណ៍នេះ បានកើតឡើងបង្កឲ្យមានការភ្ញាក់ផ្អើលនៅវេលាម៉ោង៦និង៣០នាទីព្រឹក ថ្ងៃទី២០ ខែសីហា ឆ្នាំ២០២៥ នៅចំណុចផ្ទះជួលមួយកន្លែង ស្ថិតនៅក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។ ចោររងគ្រោះខាងលើឈ្មោះ គា ចាន់ថៃ អាយុ៣៥ឆ្នាំ មុខរបរ និងការស្នាក់នៅមិនពិតប្រាកដនោះទេ ដើរគ្មានគោលដៅឡើយ យប់ត្រង់ណាដេកត្រង់នោះ លួចមិនស្វាង ។
ចោរខ្លាំងរូបនេះ លួចបានម៉ូតូ២គ្រឿង ហើយត្រូវបានដកហូតយកមកវិញ ក្នុងនោះរួមមាន ១គ្រឿងម៉ាកយ៉ាម៉ាហាសុីរូស ពណ៌ប្រផេះ អត់ផ្លាកលេខ គឺជាកម្មសិទ្ធិរបស់បុរសម្នាក់ឈ្មោះដែន មីល អាយុ៣២ឆ្នាំ ជានគរបាល ស្នាក់នៅភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ។
ម៉ូតូ១គ្រឿងទៀតម៉ាកHonda ZOOMER-X ពណ៌សលាយទឹកក្រូច ពាក់ផ្លាកលេខ ភ្នំពេញ ១GZ-៨១០០ គឺជាកម្មសិទ្ធិរបស់បុរសម្នាក់ឈ្មោះ ប៉ែន វណ្ណៈ អាយុ៣៣ឆ្នាំ ជាកម្មកររោងចក្រ មានទីលំនៅភូមិពភ្លា ឃុំសង្ឃ័រ ស្រុកស្វាយទាប ខេត្តស្វាយរៀង ។
ដោយឡែកបុរសម្ចាស់ផ្ទះជួល ដែលត្រូវចោរខាងលើខឹង រួចជិះម៉ូតូដេញបុកនោះឈ្មោះ ង៉ុក ស អាយុ៥០ឆ្នាំ មុខរបរលក់ដូរ ។ ប្រជាពលរដ្ឋបាននិយាយថា នៅវេលាព្រឹកថ្ងៃកើតហេតុ ចោរបានធ្វើសកម្មភាពលួចម៉ូតូម៉ាកយ៉ាម៉ាហាសុីរូស១គ្រឿងខាងលើ ចេញពីចំណុចផ្ទះជួល ស្ថិតនៅភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ។
បន្ទាប់មកបានជិះយកទៅទុកនៅចំណុចផ្ទះជួលភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ ហើយផ្ទះជួលនេះ ក៏មានលក់អីវាន់ និងភេសជ្ជៈមួយចំនូនផងដែរ ។ ប្រជាពលរដ្ឋដដែលបាននិយាយបន្តទៀតថា អ្នកស្នាក់នៅផ្ទះជួលខាងលើ មិនធ្លាប់បានស្គាល់ជនសង្ស័យនោះឡើយ ហើយខណៈម្ចាស់ផ្ទះជួលបើកទ្វារលក់ដូរ និងឲ្យកម្មករដែលជួលផ្ទះនោះស្នាក់នៅចេញទៅធ្វើការ ស្រាប់តែឃើញចោរបើកធុងទឹកកកលួចយកទឹកសុទ្ធ និងភេសជ្ជៈផឹក ។
ប៉ុន្តែត្រូវបានបុរសជាម្ចាស់ផ្ទះឃើញទាន់ ស្រែកសួរថា «ប្អូនឯងនៅឯណា ហើយមកពីណា ? ចោរម្នាក់នេះឆ្លើយថា ខ្ញុំស្រែកទឹកពេករកទឹកផឹក ម្ចាស់ផ្ទះជួលក៏សួរទៅអ្នកជួលផ្ទះថា ស្គាល់ជននេះទេ អ្នកជួលផ្ទះឆ្លើយថា អត់ស្គាល់ទេ» ខណៈនោះ ចោរភ័យខ្លាចក៏បានរត់គេចខ្លួនចូលទៅក្នុងភូមិ ។
ប្រភពខាងលើបានប្រាប់ឲ្យដឹងបន្ថែមទៀតថា ភ្លាមៗនោះ ម្ចាស់ផ្ទះក៏បានដេញតាមដែរ ប៉ុន្តែដេញមិនទាន់ឡើយ រួចក៏ដើរបកក្រោយទៅផ្ទះវិញ ចំណែកចោរបានទៅលួចម៉ូតូអ្នកភូមិខាងលើបាន១គ្រឿងទៀត ម៉ាកHonda ZOOMER-X រួចជិះសំដៅទៅបុកម្ចាស់ផ្ទះជួលដែលកំពុងដើរទៅផ្ទះនោះ ត្រូវបានអ្នកភូមិឃើញស្រែកប្រាប់ម្ចាស់ផ្ទះនោះឲ្យគេចចេញទាន់ ហើយជនសង្ស័យក៏ដួលម៉ូតូ ទើបអ្នកភូមិចាប់បាននាំគ្នាវាយទាត់ធាត់ម្នាក់១ដៃ១ជើងទ្រមខ្លួន រួចយកទឹកមកស្រោចពីលើចោរ ដើម្បីលាងសម្អាតដីភក់ជាប់ខ្លួន ទើបប្រគល់ឲ្យនគរបាលប៉ុស្តិ៍កាកាបទី២ នាំទៅសាកសួរ ។
មន្ត្រីនគរបាលដែលជាម្ចាស់ម៉ូតូម៉ាកយ៉ាម៉ាហាសុីរូស បាននិយាយថា នៅវេលាយប់ថ្ងៃទី១៩ ខែសីហា ឆ្នាំ២០២៥ គាត់បានទុកម៉ូតូសណ្ដោងរ៉ឺម៉ក១គ្រឿងម៉ាកយ៉ាម៉ាហាសុីរូស នៅក្បែរបន្ទប់ជួលដែលគាត់ស្នាក់នៅ ស្ថិតនៅក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ។ បន្ទាប់មកគាត់បានចូលដេកក្នុងបន្ទប់ ហើយបានដេកលក់រហូតដល់វេលាម៉ោង៦ព្រឹកថ្ងៃទី២០ ខែសីហា ឆ្នាំ២០២៥ ទើបអ្នកស្នាក់នៅបន្ទប់ជួលជិតគ្នាប្រាប់ថា ម៉ូតូគាត់ចោរលួចបាត់ហើយ ក៏មានការភ្ញាក់ផ្អើលតែម្ដង ។
ចំណែកម្ចាស់ម៉ូតូម៉ាកHonda ZOOMER-X បាននិយាយដា នៅមុនពេលកើតហេតុ គាត់បានទុកម៉ូតូនៅមុខបន្ទប់ជួលដោយអត់បានដកសោចេញទេ ហើយរវល់តែស្លៀកពាក់នៅក្នុងបន្ទប់ ក៏ស្រាប់តែជនសង្ស័យលួចយកម៉ូតូបាត់ ក្រោយមកទើបដឹងថា ប្រជាពលរដ្ឋចាប់បានជនសង្ស័យ និងម៉ូតូរបស់គាត់ ៕
ចែករំលែកព័តមាននេះ