ជំងឺមិនឆ្លងដែលមានជាចម្បង ដូចជា ជំងឺសរសៃឈាមបេះដូង ជំងឺផ្លូវដង្ហើមរ៉ាំរ៉ៃ ជំងឺទឹកនោមផ្អែម និងមហារីក គឺជាឃាតករកំពូលនៅក្នុងតំបន់អាស៊ីអាគ្នេយ៍ ។ នៅក្នុងមួយឆ្នាំអង្គការសុខភាពពិភពលោកអះអាងថា វាអាចសម្លាប់មនុស្សយ៉ាងហោចណាស់៨,៥…
ជំងឺមិនឆ្លងដែលមានជាចម្បង ដូចជា ជំងឺសរសៃឈាមបេះដូង ជំងឺផ្លូវដង្ហើមរ៉ាំរ៉ៃ ជំងឺទឹកនោមផ្អែម និងមហារីក គឺជាឃាតករកំពូលនៅក្នុងតំបន់អាស៊ីអាគ្នេយ៍ ។ នៅក្នុងមួយឆ្នាំអង្គការសុខភាពពិភពលោកអះអាងថា វាអាចសម្លាប់មនុស្សយ៉ាងហោចណាស់៨,៥ លាននាក់ ដោយឡែកនៅកម្ពុជា វារឹតតែគ្រោះថ្នាក់ ដោយសារនៅក្នុងចំណោមពលរដ្ឋ៥នាក់ គឺមានម្នាក់ហើយ ដែលប្រឈមមុខនឹងជំងឺដាច់សរសៃឈាមខួរក្បាល ។
ការលើកឡើងនេះ មិនមែនចេះតែនឹកឃើញនោះទេ ហើយក៏មិនមែនជាការបន្លាចដែរ ប៉ុន្តែវា គឺជាសក្ខីកម្មដែលចេញមកពីការសិក្សាស្រាវជ្រាវត្រឹមត្រូវ ហើយស្ថាប័នដែលចេញនូវរបាយការណ៍នេះ គឺអង្គការសុខភាពពិភពលោក ។
អង្គការនេះបានអះអាងថា មនុស្សពេញវ័យនៅកម្ពុជា១នាក់ ក្នុងចំណោមពលរដ្ឋ៥នាក់ ប្រឈមនឹងជំងឺដាច់សរសៃឈាមខួរក្បាល ដោយសារហានិភ័យនៃជំងឺមិនឆ្លងកើនឡើង ជាពិសេស គឺសម្រាប់មនុស្សដែលមានវ័យចាប់ពី៣០ឆ្នាំ ដល់៧០ឆ្នាំឡើង ។
តាមរបាយការណ៍មួយដែលបានចេញផ្សាយ កាលពីត្រីមាសទី១ នៃឆ្នាំ២០២៥ បានឲ្យដឹងថា ពពួកជំងឺមិនឆ្លង គឺជាមូលហេតុចម្បងនៃការស្លាប់នៅក្នុងប្រទេសកម្ពុជា ពោលគឺប្រមាណជា៦ម៉ឺននាក់ នៅក្នុងមួយឆ្នាំ ។ ប្រភពដដែលសង្កត់ធ្ងន់ថា ប្រសិនបើពលរដ្ឋ និងអ្នកដែលពាក់ព័ន្ធមិនយកចិត្តទុកដាក់ លើបញ្ហានេះទេនោះ វាគឺជាហានិភ័យសុខភាពមួយសម្រាប់ពលរដ្ឋកម្ពុជា ។
ក្រៅពីនោះប្រភពដដែលនោះបានអះអាងថា ប្រជាជនកម្ពុជា១នាក់ ក្នុងចំណោម៤នាក់នៅក្នុងចន្លោះអាយុដដែល គឺបានស្លាប់ដោយសារលក្ខខណ្ឌដូចជា ជំងឺសរសៃឈាមបេះដូង ជំងឺទឹកនោមផ្អែម ជំងឺមហារីក និងជំងឺផ្លូវដង្ហើមរ៉ាំរ៉ៃ ។
អង្គការសុខភាពពិភពលោក បានព្រមានថា ស្ថានភាពនៅកម្ពុជា គឺធ្ងន់ធ្ងរ ហើយស្ថាប័ននេះបានសង្កត់ធ្ងន់លើប្រព័ន្ធថែទាំសុខភាពរបស់ប្រទេស ដែលទាមទារវិធីសាស្ត្រដ៏ទូលំទូលាយមួយ ដើម្បីដោះស្រាយបញ្ហាសុខភាពយ៉ាងមានប្រសិទ្ធភាព ។
ពាក់ព័ន្ធនឹងមូលហេតុនៃការដាច់សរសៃឈាមនេះ អ្នកជំនាញបានលើកឡើងថា គឺវាបណ្តាលមកពីឥរិយាបទនៃការហូបចុកច្រើន ។ ការសិក្សាខាងលើ បានរកឃើញថា មូលហេតុសំខាន់ គឺរួមមានការកើនឡើងនៃការទទួលទានអាហារដែលមានរស់ជាតិប្រៃ ដែលលើសពីតម្រូវការនៃសារធាតុអំបិលនៅក្នុងខ្លួនមនុស្ស ។
ប្រភពដដែលសង្កត់ធ្ងន់ថា ក្នុងមួយថ្ងៃពលរដ្ឋកម្ពុជាទទួលសារធាតុប្រៃចូលទៅក្នុងខ្លួនជាមធ្យមគឺ៩,៥ក្រាមក្នុងមួយថ្ងៃ ពោល គឺវាមានបរិមាណលើសសារធាតុប្រៃ ជិតពីរដងនៃដែនកំណត់ ដែលបានណែនាំដោយអង្គការសុខភាពពិភព ។ តាមស្តង់ដារបស់អង្គការសុខភាពពិភពលើកបានលើទឹកចិត្តឲ្យមនុស្សជាតិទទួលទានអ្វីដែលមានជាតិប្រៃដូចជា អំបិលទៅក្នុងខ្លូនឲ្យបានតិចជា៥ក្រាម ក្នុងមួយថ្ងៃបានល្អ ។
លើសពីនេះ ប្រភពដដែលក៏បានបន្តផងដែរថា ការទទួលទានគ្រឿងស្រវឹងបានកើនឡើង ដោយមនុស្សពេញវ័យ១ក្នុងចំណោម ៤នាក់ បានរាយការណ៍ពីការទទួលទានគ្រឿងស្រវឹងច្រើន ។ ដោយឡែក ការប្រមូលផ្តុំនៃសារធាតុផ្អែមក៏ជាប្រភពគ្រោះថ្នាក់ដល់សុខភាព ជាពិសេស គឺជំងឺដាច់សរសៃឈាមនេះផ្ទាល់ ។
មកដល់ពេលនេះ អត្រាប្រេវ៉ាឡង់នៃសម្ពាធឈាមឡើងខ្ពស់ក៏បានកើនឡើងយ៉ាងខ្លាំងផងដែរ ដែលឥឡូវនេះ ប៉ះពាល់ដល់មនុស្សពេញវ័យ១នាក់ ក្នុងចំណោម៥នាក់ដែរ ។
ការស្ទង់មតិក៏បានគូសបញ្ជាក់ផងដែរថា ៦,៣% នៃពលរដ្ឋពេញវ័យកម្ពុជា គឺបានបង្កើនជាតិស្ករក្នុងឈាម ឬត្រូវបានគេធ្វើរោគវិនិច្ឆ័យថា មានជំងឺទឹកនោមផ្អែម ដែលត្រូវបានផ្សារភ្ជាប់យ៉ាងជិតស្និទ្ធទៅនឹងទម្រង់របបអាហារមិនល្អ និងការកើនឡើងនៃអត្រាធាត់ ។
បច្ចុប្បន្ននេះ១៩,៤% នៃមនុស្សពេញវ័យត្រូវបានចាត់ថ្នាក់ថា លើសទម្ងន់ ហើយ៤,៤% ត្រូវបានចាត់ថ្នាក់ថា ធាត់ ។ លើសពីនេះទៀត មនុស្សពេញវ័យ១ក្នុង ចំណោម៤នាក់ ឬប្រមាណជា ២៥,៥% បានបង្កើនសារធាតុកូឡេស្តេរ៉ុលចូលទៅក្នុងខ្លួន ។
សរុបទៅ នៅក្នុងស្ថានភាពបែបនេះ ដើម្បីកាត់បន្ថយហានិភ័យនៃជំងឺដាច់សរសៃឈាម ក៏ដូចជា កំណើននៃជំងឺមិនឆ្លងពលរដ្ឋកម្ពុជា គួរតែទម្លាប់ដាក់កម្រិតការហូបចុក និងកែលម្អរបៀបរបប ជាពិសេស គឺរស់ជាតិប្រៃ និងផ្អែមបែបដិតៗ ។ ពលរដ្ឋក៏គួរតែកំណត់ ឬដាក់កម្រិតពពួកអាហារដែលសំបូរកូឡេស្តេរ៉ូល ឬពពួកអាហារផ្ទុកខ្លាញ់អាក្រក់ ។ សូមយកចិត្តទុកដាក់លើការហូបចុក ដើម្បីសុវត្ថិភាពសម្រាប់យើងទាំងអស់គ្នា ៕
ចែករំលែកព័តមាននេះ