ប្រទេសវៀតណាម ៖ ប្រទេសវៀតណាមបានបង្ហាញផែនការសាងសងស្ពានឆ្លងសមុទ្រដ៏វែងបំផុតរបស់ខ្លួន និងវែងបំផុតលំដាប់ទី ៣ នៅអាស៊ីអាគ្នេយ៍ ដែលមានប្រវែងរហូតដល់១៨គីឡូម៉ែត្រ តភ្ជាប់ខេត្ត Ca Mau…
ប្រទេសវៀតណាម ៖ ប្រទេសវៀតណាមបានបង្ហាញផែនការសាងសងស្ពានឆ្លងសមុទ្រដ៏វែងបំផុតរបស់ខ្លួន និងវែងបំផុតលំដាប់ទី ៣ នៅអាស៊ីអាគ្នេយ៍ ដែលមានប្រវែងរហូតដល់១៨គីឡូម៉ែត្រ តភ្ជាប់ខេត្ត Ca Mau ទៅកាន់កោះ Hon Khoai ដែលជាច្រកដ៏រឹងមាំមួយនៅចុងភាគខាងត្បូងរបស់ខ្លួន ដែលត្រូវបានបិទជាតំបន់យោធាជាយូរមកហើយ។
បើតាមប្រភពពីសារព័ត៌មានវៀតណាម VnExpress នៅថ្ងៃទី២១ ខែសីហា ឆ្នាំ២០២៥ គម្រោងដែលបានដាក់បង្ហាញកាលពីថ្ងៃទី១៩ ខែសីហា កន្លងទៅនោះ នឹងត្រូវបានសាងសង់តាមស្តង់ដារអន្តរជាតិឆ្លងកាត់សមុទ្រជាមួយផ្លូវចំនួន ៤ ខ្សែ រចនាឡើងសម្រាប់ការបើកបរល្បឿន ៨០គីឡូម៉ែត្រក្នុង១ម៉ោង ដោយតម្លៃត្រូវបានប៉ាន់ស្មានថា ២៥,៧ពាន់ពាន់លានដុង ឬស្មើនឹង ១ពាន់លានដុល្លារអាមេរិក។ ការសាងសងនឹងបញ្ចប់ត្រូវបានរំពឹងទុកនៅចុងឆ្នាំ២០២៨។
ការសាងសង់នឹងស្ថិតក្រោមគ្រប់គ្រងដោយកងទ័ពនៃកងពលលេខ១២ ក្រោមក្រសួងការពារជាតិ ដោយប្រើប្រាស់សសរ និងគ្រឹះបំពង់ដែកសម្រាប់តំបន់ទឹកជ្រៅដែលជាស្នាដៃវិស្វកម្ម ដើម្បីសាងសង់តាមរចនាសម្ព័ន្ធស្ថិតនៅក្នុងចំណោមស្ពានឆ្លងសមុទ្រវែងបំផុត និងទំនើបបំផុតនៅអាស៊ីអាគ្នេយ៍។
គម្រោងអភិវឌ្ឍន៍កោះ Hon Khoai មិនមែនមានត្រឹមស្ពានឆ្លងសមុទ្រនោះទេ។ កំពង់ផែទឹកជ្រៅដ៏ធំក៏កំពុងត្រូវបានសាងសង់នៅលើកោះនេះផងដែរ រួមទាំងចំណតប្រវែង១ពាន់ម៉ែត្រ ដែលមានសមត្ថភាពទទួលនាវាកុងតឺន័រមានចំណុះផ្ទុកដល់ ២៥០ ០០០ DWT (តោនទម្ងន់ធ្ងន់) និងអាចផ្ទុកទំនិញបាន២០លានតោនក្នុង១ឆ្នាំ។ នៅពេលដែលត្រូវបានអភិវឌ្ឍពេញលេញ កំពង់ផែនេះនឹងពង្រីកដល់ផ្ទៃដី ៦៨៦ហិកតា។
ទន្ទឹមនឹងនោះ ផ្លូវល្បឿនលឿន Ca Mau-Dat Mui ប្រវែង ៨០ គីឡូម៉ែត្រមានល្បឿនបើកបរដល់ ១០០គីឡូម៉ែត្រក្នុង១ម៉ោង ក៏គ្រោងនឹងបញ្ចប់នៅឆ្នាំ ២០២៨ ផងដែរ។ នៅពេលបញ្ចប់ គម្រោងធំទាំង ៣ រួមមាន ស្ពាន កំពង់ផែ និងផ្លូវល្បឿនលឿន នឹងបង្កើតការតភ្ជាប់ព្រំដែនភាគខាងជើងនៃប្រទេសវៀតណាមរហូតដល់ចុងខាងត្បូងបំផុតរបស់ខ្លួន។
ការអភិវឌ្ឍន៍នឹងមិនត្រឹមតែជំរុញកំណើនសេដ្ឋកិច្ចតាមរយៈពាណិជ្ជកម្ម និងទេសចរណ៍ ជាពិសេសខេត្តនៅដាច់ស្រយាលប៉ុណ្ណោះទេ ប៉ុន្តែថែមទាំងពង្រឹងការការពារ និងសន្តិសុខក្នុងតំបន់ដែលស្ថិតនៅដោយផ្ទាល់តាមផ្លូវដឹកជញ្ជូនអន្តរជាតិសំខាន់ៗផងដែរ។ កោះ Hon Khoai គឺជាកោះតូចមួយ ប៉ុន្តែមានភាពទាក់ទាញខ្លាំង មានចម្ងាយត្រឹមតែ ២៨គីឡូម៉ែត្រពីឆ្នេរសមុទ្រ ជាមួយកំពូលភ្នំខ្ពស់បំផុតឡើងដល់ ៣១៨ម៉ែត្រពីលើនីវ៉ូទឹកសមុទ្រ។ ទោះយ៉ាងណាក៏ដោយ កោះនេះនៅតែគ្មានមនុស្សរស់នៅ លើកលែងតែបុគ្គលិកយោធា។
បច្ចុប្បន្នស្ពាន Sultan Haji Omar Ali Saifuddien នៅប្រទេសព្រុយណេ គឺជាវែងបំផុតនៅអាស៊ីអាគេ្នយ៍ ពោលប្រវែង ៣០គីឡូម៉ែត្រ ដែលលាតសន្ធឹងពាសពេញឈូងសមុទ្ររបស់ព្រុយណេ។ ចាប់ផ្តើមសាងសង់នៅពាក់កណ្តាលឆ្នាំ២០១៤ បញ្ចប់ការសាងសង់នៅឆ្នាំ២០១៩ និងដាក់ឱ្យប្រើប្រាស់ឆ្នាំ២០២០។
ស្ពាន Sultan Abdul Halim Muadzam Shah នៅរដ្ឋ Penang ប្រទេសម៉ាឡេស៊ី គឺជាស្ពានវែងបំផុតលំដាប់ទី ២ នៅអាស៊ីអាគ្នេយ៍ ប្រវែង ២៤គីឡូម៉ែត្រ។ ការសាងសង់បានចាប់ផ្តើមនៅខែវិច្ឆិកា ឆ្នាំ២០០៨ ដើម្បីបញ្ចប់នៅខែឧសភា ឆ្នាំ២០១២ ប៉ុន្តែក្រោយមកត្រូវបានពន្យារដល់ខែកុម្ភៈ ឆ្នាំ២០១៤ ដែលជាថ្ងៃដាក់ឱ្យប្រើប្រាស់។
ចំណែកស្ពាន Penang ឬ Penang ទី១ បច្ចុប្បន្នគឺជាស្ពានវែងបំផុតទី ៣ នៅអាស៊ីអាគេ្នយ៍ ប្រវែង ១៣,៥គីឡូម៉ែត្រ។ ចាប់ផ្តើមសាងសង់នៅដើមឆ្នាំ១៩៨២ បញ្ចប់នៅដើមឆ្នាំ១៩៨៥ និងដាក់ឱ្យប្រើប្រាស់នៅខែសីហា ឆ្នាំដដែល៕
ចែករំលែកព័តមាននេះ