រាជធានីភ្នំពេញ ៖ អភិបាលរងរាជធានីភ្នំពេញ បានបញ្ជាក់ពីការហាមជក់ ឬបង្ហុយផ្សែងផលិតផលថ្នាំជក់-បារី នៅផ្លូវថ្មើរជើងចតុមុខ នៅរាល់ថ្ងៃសៅរ៍ និងថ្ងៃអាទិត្យ ពោលក្នុងអំឡុងពេល នៃការបើកឱ្យដំណើរការ…
រាជធានីភ្នំពេញ ៖ អភិបាលរងរាជធានីភ្នំពេញ បានបញ្ជាក់ពីការហាមជក់ ឬបង្ហុយផ្សែងផលិតផលថ្នាំជក់-បារី នៅផ្លូវថ្មើរជើងចតុមុខ នៅរាល់ថ្ងៃសៅរ៍ និងថ្ងៃអាទិត្យ ពោលក្នុងអំឡុងពេល នៃការបើកឱ្យដំណើរការ ផ្លូវថ្មើរជើងចតុមុខ នេះតែម្តង ហើយគម្រោងនេះនឹងចាប់ផ្តើមអនុវត្ត នៅខែកញ្ញា ឆ្នាំ២០២៥ នេះ ។
លោក ហួត ហៃ អភិបាលរងរាជធានីភ្នំពេញ បានថ្លែងនៅក្នុងសិក្ខាសាលាផ្សព្វផ្សាយស្តីពី«ការពង្រឹងវិធានការហាមជក់ ឬបង្ហុយផ្សែងផលិតផលថ្នាំជក់-បារី នៅផ្លូវថ្មើរជើងចតុមុខ» នៅសាលារាជធានីភ្នំពេញ នាព្រឹកថ្ងៃទី២០ ខែសីហា ឆ្នាំ២០២៥នេះ បានលើកឡើងថា ផ្លូវថ្មើរជើងចតុមុខ ទទួលបានការពេញនិយមយ៉ាងខ្លាំង ពីភ្ញៀវជាតិ និងអន្តរជាតិ មកដើរលេងកម្សាន្តយ៉ាងច្រើនកុះករ រហូតធ្វើឱ្យរាជធានីភ្នំពេញ ជាប់ចំណាត់ថ្នាក់លេខ២ លើពិភពលោក ឈ្មោះថា ជាទីក្រុងប្រជុំដោយភាពរីករាយនៅពេលរាត្រី ។
ក្នុងនោះលោក អភិបាលរងរាជធានីភ្នំពេញ បានបញ្ជាក់ថា ដើម្បីឱ្យផ្លូវថ្មើរជើងចតុមុខ កាន់តែល្អប្រសើរ ទទួលបានភាពពេញនិយមមួយកម្រិតថែមទៀត រដ្ឋបាលរាជធានីភ្នំពេញ បានបន្ថែមការយកចិត្តទុកដាក់លើការបន្តថែរក្សាសន្តិសុខ សណ្តាប់ធ្នាប់ និងសម្អាតអនាម័យបរិស្ថានមួយកម្រិតថែមទៀត។ ជាងនេះទៅទៀតនៅពេលថ្មីៗនេះ រដ្ឋបាលរាជធានីភ្នំពេញ បានចេញសេចក្តីណែនាំមួយ ស្តីពីការអនុវត្តគម្រោង “ពង្រឹងវិធាន ការហាមជក់ ឬការបង្ហុយផ្សែងផលិតផលថ្នាំជក់ នៅលើផ្លូវថ្មើរជើងចតុមុខ” នេះថែមទៀត ។
លោក ហួត ហៃ បានបញ្ជាក់បន្ថែមថា ការហាមជក់ ឬការបង្ហុយផ្សែងផលិតផលថ្នាំជក់ នៅលើផ្លូវថ្មើរជើងចតុមុខ នេះធ្វើឡើងតែនៅរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង១៨:០០នាទី រហូតដល់ម៉ោង២៣:០០នាទី។ ផុតពីថ្ងៃ និងម៉ោងនេះ ពួកគាត់អាចជក់បាន ហើយក្នុងថ្ងៃសៅរ៍ និងថ្ងៃអាទិត្យ ដែលជាថ្ងៃហាមនេះដែរ ពួកគាត់ក៏អាចជក់ ឬបង្ហុយផ្សែងផលិតផលថ្នាំជក់បានដែរ តែការជក់នោះ ត្រូវចេញឱ្យផុតពីផ្លូវថ្មើរជើងចតុមុខ ដើម្បីកុំឱ្យរំខានគេដោយការបំពុលពីផ្សែងបារីនេះ។ ដោយគម្រោងនេះ នឹងចាប់ផ្តើមអនុវត្តនៅខែកញ្ញា ឆ្នាំ២០២៥ ខាងមុខនេះហើយ ។
សូមបញ្ជាក់ថា គោលបំណងនៃ សិក្ខាសាលាផ្សព្វផ្សាយស្តីពី «ការពង្រឹងវិធានការហាមជក់ ឬបង្ហុយផ្សែងផលិតផលថ្នាំជក់-បារី នៅផ្លូវថ្មើរជើងចតុមុខ» ខាងលើនេះ គឺដើម្បីឱ្យបងប្អូនជាអាជីករ ដែលបាននិងកំពុងធ្វើអាជីវកម្មនៅលើផ្លូវថ្មើរជើងចតុមុខ បានយល់ដឹងនិងចូលរួម ដើម្បីធ្វើឱ្យគម្រោងនៃការហាមមិនឱ្យជក់ ឬបង្ហុយផ្សែងផលិតផលថ្នាំជក់ នៅលើផ្លូវថ្មើរជើងចតុមុខនេះ ទទួលបានជោគជ័យ៕
ចែករំលែកព័តមាននេះ