រាជធានីភ្នំពេញ ៖ យ៉ាងហោចណាស់គ្រាប់ផ្លោងចំនួនជាងមួយពាន់គ្រាប់របស់សៀម ត្រូវបានប្រទះឃើញជាបន្តបន្ទាប់ នៅលើទឹកដីនៃខេត្តឧត្តរមានជ័យ គឺជាគ្រាប់ដែលសេសសល់ក្រោយពីការបាញ់របស់កងទ័ពសៀមមកលើទឹកដីកម្ពុជា ក្នុងរយៈពេល៥ថ្ងៃ នៃការផ្ទុះអាវុធមុននេះ គឺចាប់ពីថ្ងៃទី២៤ ដល់ថ្ងៃទី២៨…
រាជធានីភ្នំពេញ ៖ យ៉ាងហោចណាស់គ្រាប់ផ្លោងចំនួនជាងមួយពាន់គ្រាប់របស់សៀម ត្រូវបានប្រទះឃើញជាបន្តបន្ទាប់ នៅលើទឹកដីនៃខេត្តឧត្តរមានជ័យ គឺជាគ្រាប់ដែលសេសសល់ក្រោយពីការបាញ់របស់កងទ័ពសៀមមកលើទឹកដីកម្ពុជា ក្នុងរយៈពេល៥ថ្ងៃ នៃការផ្ទុះអាវុធមុននេះ គឺចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ។
ការប្រយុទ្ធគ្នាតាមព្រំដែនរវាងកងទ័ពកម្ពុជា និងសៀម បានឈានទៅដល់ការប្រើប្រាស់អាវុធទំនើបៗពីសំណាក់យោធាសៀម ក្នុងនោះមានការប្រើគ្រាប់បែកចង្កោម ដែលខុសនឹងច្បាប់អន្តរជាតិ និងការប្រើកាំភ្លើងធំគ្រប់ប្រភេទ ។ទង្វើរបស់ទាហានសៀមឈ្លានពានបែបនេះ មិនត្រឹមតែបានបំផ្លិចបំផ្លាញ ទីតាំងប្រវត្តិសាស្ត្រ វប្បធម៌សំខាន់ៗរបស់កម្ពុជានោះទេ ប៉ុន្តែក៏បានបំផ្លាញហេដ្ឋារចនាសម្ព័ន្ធ ផ្លូវថ្នល់ សាលារៀន វត្តអារាម និងជាពិសេសផ្ទះសម្បែងរបស់ប្រជាពលរដ្ឋខ្មែរស្លូតត្រង់អស់ជាង២០០ខ្នង ។
លំនៅឋានប្រជាពលរដ្ឋជាង២០០ខ្នង នៅខេត្តឧត្តរមានជ័យ មានផ្ទះខ្លះត្រូវបានបំផ្លាញទាំងស្រុង ពីការវាយប្រហារយ៉ាងកម្រោលរបស់ទាហានសៀម កាលពីថ្ងៃទី២៤ដល់ទី២៨ ខែកក្កដា ឆ្នាំ២០២៥ ។ លោក ម៉េត មាសភក្តី អភិបាលរងខេត្តឧត្តរមានជ័យបានថ្លែងបែបនេះប្រាប់ក្រុមអ្នសការព័ត៌មាន ។
កាលពីថ្ងៃទី១៥ និងទី១៦ ខែសីហា ២០២៥ ក្រសួងព័ត៌មានបានដឹកនាំក្រុមអ្នកសារព័ត៌មានទៅកាន់តំបន់ជាប់ព្រំដែនថៃក្នុងខេត្តបន្ទាយមានជ័យ និងឧត្តរមានជ័យ ដែលរងគ្រោះពីការវាយប្រហាររបស់សៀម ។ ក្រៅពីសាលារៀន មន្ទីរពេទ្យ វត្តអារាម ក្រុមអ្នកសារព័ត៌មាន ក៏បានចុះទៅដល់ផ្ទះរបស់ប្រជាពលរដ្ឋចំនួន ៣ខ្នងនៅក្នុងស្រុកបន្ទាយអំពិល ដែលរងការខូចខាតយ៉ាងធ្ងន់ធ្ងរ ក្នុងអំឡុងពេលជម្លោះព្រំដែន ដែលបង្កឡើងដោយទាហានសៀម ។
លំនៅឋានមួយដែលមានការកត់សម្គាល់នោះគឺជាញើសឈាមរបស់ប្ដីអ្នកស្រី គង់ ចាន់ថា ជាអតីតទាហានមួកខៀវក្រោមឆត្រ UN នៅប្រទេសម៉ាលី ត្រូវបានគ្រាប់បែកបំផ្លាញទាំងស្រុង ពោលគឺក្លាយជាគំនរដែក បេតុង និងឈើ ។ អ្នកស្រីជាភរិយាបានប្រាប់សារព័ត៌មានទាំងរលីងរលោងទឹកភ្នែកថា ផ្ទះរបស់អ្នកស្រី គឺជាញើសឈាមរបស់ប្ដីដែលបានទៅបំពេញបេសកកម្មនៅប្រទេសម៉ាលី ។ ផ្ទះនេះ ត្រូវបានបំផ្លាញទាំងស្រុងគ្មានសល់អ្វីឡើយ ។ បច្ចុប្បន្ននេះ អ្នកស្រី និងស្វាមី ដែលជាទាហានកងកម្លាំងរថក្រោះ មិនមានលទ្ធភាពសាងសង់ផ្ទះថ្មីឡើងវិញនោះទេ ។
ក្រៅពីបាត់បង់លំនៅឋានដោយសារគ្រាប់ផ្លោងរបស់ទាហានសៀមមកលើកម្ពុជាហើយនោះ ប្រជាពលរដ្ឋមួយចំនួនទៀតនៅខេត្តឧត្តរមានជ័យ ក៏បានបាត់បង់មុខរបររកស៊ីទទួលទានប្រចាំថ្ងៃ ខណៈខ្លួនមានជាប់បន្ទុកបំណុលធនាគារថែមទៀត ។
ទោះបីជាបែបណាព័ត៌មានមុននេះក៏បានឱ្យដឹងផងដែរថា ប្រទេសចិនបានជួយជួសជុលលំនៅឋានជិត១០០ខ្នង ដែលរងការបំផ្លាញ ដោយគ្រាប់ផ្លោងសៀមឈ្លានពាន ។លំនៅឋាននៅក្នុងខេត្តឧត្តរមានជ័យដែលចិននិងផ្តល់ជំនួយជួយជួសជុលមានផ្ទះប្រជាពលរដ្ឋ និងផ្ទះយោធា ដែលរងការបំផ្លិចបំផ្លាញជាមួយនឹងការស្ដារហេដ្ឋារចនាម្ព័ន្ធចាំបាច់មួយចំនួនទៀត ដើម្បីសម្រាលបន្ទុកលំបាកប្រជាពលរដ្ឋដែលរស់នៅតំបន់រងគ្រោះដោយសារសង្គ្រាម ។
ថ្លែងប្រាប់អ្នកសារព័ត៌មាន កាលពីថ្ងៃទី៦ ខែសីហា កន្លងមក ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានឱ្យដឹងថា ជំនួយរបស់ចិននេះ សម្រាប់ជួសជុលផ្ទះប្រជាពលរដ្ឋ៣០ផ្ទះ និងផ្ទះគ្រួសារកងទ័ពចំនួន៦៦ផ្ទះ ។ ក្រៅពីនោះជួសជុលវត្តតាមាន់សែនជ័យ ដែលរងការបំផ្លិចបំផ្លាញទាំងស្រុង និងជួយពង្រឹងហេដ្ឋារចនាសម្ព័ន្ធទឹកស្អាត និងប្រព័ន្ធអគ្គិសនី ។
យោងតាមរដ្ឋបាលខេត្តឧត្តរមានជ័យ បានឱ្យដឹងដែរថា តំណាងស្ថានទូតចិន បានយកថវិកា១០ម៉ឺនដុល្លារ ជូនដល់រដ្ឋបាលខេត្តឧត្តរមានជ័យ សម្រាប់ជួសជុលផ្ទះពលរដ្ឋ និងហេដ្ឋារចនាសម្ព័ន្ធមួយចំនួនដែលរងការបំផ្លាញ ដោយសារគ្រាប់ផ្លោងរបស់ទាហានសៀម ។ ថវិកាទាំងនោះ នឹងប្រើប្រាស់សម្រាប់យកទៅរៀបចំមណ្ឌលសុវត្ថិភាពជនភៀសសឹក និងជួសជុលផ្ទះប្រជាពលរដ្ឋ និងវត្តអារាមដែលរងផលប៉ះពាល់ពីសង្គ្រាមឈ្លានពានរបស់កងទ័ពសៀមមកលើកម្ពុជា ។
ជាមួយគ្នានេះ រដ្ឋាភិបាលជប៉ុន បានប្រកាសផ្តល់ជំនួយសង្គ្រោះបន្ទាន់ ចំនួនប្រមាណ ១,៨ លានដុល្លារអាមេរិក កាលពីថ្ងៃទី១៥ សីហា ២០២៥ ដើម្បីឆ្លើយតបនឹងតម្រូវការមនុស្សធម៌បន្ទាន់ នៅតាមតំបន់ព្រំដែនកម្ពុជា-ថៃ ។ នេះបើតាមទូរទស្សន៍ជាតិកម្ពុជាបានផ្សាយនាមុននេះ ។ ជំនួយនេះ នឹងអនុវត្តតាមរយៈអង្គការអន្តរជាតិទេសន្តរប្រវេសន៍ (IOM) និងមូលនិធិអង្គការសហប្រជាជាតិដើម្បីកុមារ (UNICEF) ដោយផ្តោតលើការចែកចាយសម្ភារៈចាំបាច់ប្រើប្រាស់ប្រចាំថ្ងៃ និងជម្រកបណ្តោះអាសន្នសម្រាប់ប្រជាពលរដ្ឋរងគ្រោះ ។
រាជរដ្ឋាភិបាលជប៉ុន បានបង្ហាញការគាំទ្រយ៉ាងខ្លាំងចំពោះ កិច្ចព្រមព្រៀងឈប់បាញ់បន្ទាន់ និងឥតលក្ខខណ្ឌរវាងកម្ពុជា និងថៃ និងសង្ឃឹមថា នឹងមានសន្តិភាពឡើងវិញឆាប់ៗ ខណៈដែលនឹងបន្តខិតខំ ដើម្បីកាត់បន្ថយការលំបាករបស់ប្រជាពលរដ្ឋរងគ្រោះ ។ឯកអគ្គរាជទូតជប៉ុនប្រចាំកម្ពុជា អ៊ូអិណុ អាត់ស៊ូស៊ី និងអនុព័ន្ធយោធា វរសេនីយឯក ហារ៉ា តាកាស៊ី បានធ្វើដំណើរទស្សនកិច្ចទៅតំបន់ព្រំដែន និងមានការគ្រាំគ្រាចិត្តយ៉ាងខ្លាំងចំពោះទំហំនៃការខូចខាត ។ រាជរដ្ឋាភិបាលជប៉ុនគាំទ្រយ៉ាងខ្លាំងចំពោះកិច្ចព្រមព្រៀងឈប់បាញ់បន្ទាន់និងឥតលក្ខខណ្ឌរវាងកម្ពុជា និងថៃ ហើយសង្ឃឹមថានឹងមានសន្តិភាពឡើងវិញយ៉ាងឆាប់រហ័ស ហើយនឹងបន្តខិតខំប្រឹងប្រែងដើម្បីកាត់បន្ថយការលំបាករបស់អ្នកដែលរងគ្រោះ ៕
ចែករំលែកព័តមាននេះ