ខេត្តកំពង់ធំ ៖ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោកអភិបាលស្រុកស្ទោង ដឹកនាំសហការីគោរពវិញ្ញាណក្ខន្ធសពវីរៈយុទ្ធជនពលីក្នុងសមរភូមិ ព្រំដែនកម្ពុជា- ថៃ…
ខេត្តកំពង់ធំ ៖ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោកអភិបាលស្រុកស្ទោង ដឹកនាំសហការីគោរពវិញ្ញាណក្ខន្ធសពវីរៈយុទ្ធជនពលីក្នុងសមរភូមិ ព្រំដែនកម្ពុជា- ថៃ នៅស្រុកស្ទោង ខេត្តកំពង់ធំ ។ នេះបើយោងតាមកងទ័ពជើងគោកនៃកងយោធពលខេមរភូមិន្ទបានផ្សាយនាមុននេះ។
កងទ័ពជើងគោកនៃកងយោធពលខេមរភូមិន្ទ បានបន្តថា នៅព្រឹកថ្ងៃទី២០ ខែសីហា ឆ្នាំ២០២៥ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោកសាយ គឹមឡម អភិបាលស្រុកស្ទោង បានដឹកនាំសហការីទៅគោរពវិញ្ញាណក្ខន្ធសពវីរៈយុទ្ធជនពលីលោក វរសេនីយ៍ត្រី ជួង លាប នៅអង្គភាពកងពលតូចថ្មើរជើងលេខ៤២ ចំណុះយោធភូមិភាគទី៤ ដែលបានពលីជីវិត កាលពីថ្ងៃទី២៤ ខែកក្កដា ឆ្នាំ២០២៥ ក្នុងសមរភូមិការពារបូរណភាពទឹកដី នៅទិសព្រំដែនកម្ពុជា.ថៃ តំបន់ប្រាសាទតាមាន់ ខេត្តឧត្ដរមានជ័យ ដែលពិធីនេះប្រព្រឹត្តទៅនៅគេហដ្ឋាននៃសព ភូមិបុស្សតាសោម ឃុំរុងរឿង ស្រុកស្ទោង ខេត្តកំពង់ធំ ។
ឧត្ដមសេនីយ៍ទោ សោម ស៊ុន បានសម្តែងនូវការសោកស្ដាយអាឡោះអាល័យជាពន់ពេកចំពោះការបាត់បង់វីរៈយុទ្ធជនរបស់យើងដែលបានលះបង់អាយុជីវិតដ៏អង់អាចក្លាហាននៅក្នុងសមរភូមិ ដើម្បីបុព្វហេតុការពារបូរណភាពទឹកដី និងការពារប្រជាជនកម្ពុជា ពីការបំពានទឹកដីពីសំណាក់ពួកចោរសៀមឈ្លានពាន។ ហើយការលះបង់ដ៏ធំធេងនេះ យើងខ្ញុំទាំងអស់គ្នាជាប្រជាជនកម្ពុជាចងចាំជានិច្ចមិនអាចបំភ្លេចបានឡើយ ។
ជាមួយនេះផងដែរ ឧត្ដមសេនីយ៍ទោសោម ស៊ុន ក៏បានសំណេះសំណាល និងជម្រាបជូនក្រុមគ្រួសារសពថា សម្តេចមហាបវរធិបតី ហ៊ុន ម៉ាណែត ប្រមុខនៃរាជរដ្ឋាភិបាល និងប្រជាជនកម្ពុជាចងចាំជានិច្ចនូវគុណូបការ:ដ៏ថ្លៃថ្លានេះ ចារឹកទុកជាប្រវត្តិសាស្ត្រ និងរៀបចំដោះស្រាយគោលនយោបាយ ឧបត្ថម្ភជូនក្រុមគ្រួសារសពឲ្យបានសរម្យ និងពិនិត្យមើលអំពីស្ថានភាពផ្ទះរបស់វីរយុទ្ធជនពលីយើង ដើម្បីរៀបចំសាងសង់ផ្ទះថ្មីជូនគាត់ ឲ្យមានជម្រកស្នាក់នៅបានសមរម្យ ។
ដោយឡែកចំពោះគ្រួសារយោធិនពលី ឬពិការក្នងសមរភូមិនៅពេលនេះ ត្រូវបានសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានសម្រេចលុបចោលនូវបំណុលទាំងស្រុងផងដែរ ។
ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងនូវការគោរពដឹងគុណមិនអាចបំភ្លេចបាននូវវីរភាពអង់អាចក្លាហានក្នុងការការពារបូរណភាពទឹកដីនេះ ដោយបានលំអោនកាយគោរពវិញ្ញាណក្ខន្ធ ដោយក្តីក្តុកក្តួលរំជួលចិត្ត ជាទីបំផុត និងបានសូមបួងសួងដល់វិញ្ញាណក្ខន្ធវីរៈយុទ្ធជនយើង បានទៅកាន់សុគតិភពកុំបីឃ្លៀងឃ្លាតឡើយ ៕
ចែករំលែកព័តមាននេះ