ឥណ្ឌា-ចិន យល់ព្រមបន្តជើងហោះហើរត្រង់ឡើងវិញ និងជំរុញទំនាក់ទំនងពាណិជ្ជកម្ម
ប្រទេសឥណ្ឌា-ចិន ៖ ប្រទេសឥណ្ឌា និងចិន កាលពីថ្ងៃទី១៩ ខែសីហា ឆ្នាំ២០២៥ បានព្រមព្រៀងគ្នា ដើម្បីបើកជើងហោះហើរត្រង់ឡើងវិញ និងបង្កើនលំហូរពាណិជ្ជកម្ម…
ប្រទេសឥណ្ឌា-ចិន ៖ ប្រទេសឥណ្ឌា និងចិន កាលពីថ្ងៃទី១៩ ខែសីហា ឆ្នាំ២០២៥ បានព្រមព្រៀងគ្នា ដើម្បីបើកជើងហោះហើរត្រង់ឡើងវិញ និងបង្កើនលំហូរពាណិជ្ជកម្ម ក៏ដូចជាការវិនិយោគ ខណៈប្រទេសជិតខាងទាំងពីរសម្រេចចិត្តកសាងទំនាក់ទំនងគ្នាឡើងវិញដែលបានខូចខាតដោយការប៉ះទង្គិចគ្នាតាមព្រំដែនកាលពីឆ្នាំ២០២០។
យោងតាមសេចក្តីរាយការណ៍ពីទីភ្នាក់ងារសារព័ត៌មាន Reuters នៅថ្ងៃទី២០ ខែសីហា ឆ្នាំ២០២៥ បានឱ្យដឹងថា ប្រទេសយក្សនៅអាស៊ីទាំងពីរកំពុងពង្រឹងទំនាក់ទំនងជាមួយគ្នាយ៉ាងប្រយ័ត្នប្រយែងឡើងវិញ ប្រឆាំងនឹងគោលនយោបាយការបរទេសមិនអាចទាយទុកជាមុនបានរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ដោយចាប់ផ្តើមពីដំណើរទស្សនកិច្ចទ្វេភាគីកម្រិតខ្ពស់ជាបន្តបន្ទាប់។
ក្រសួងការបរទេសឥណ្ឌាបានឱ្យដឹងថា ប្រទេសទាំងពីរនឹងបន្តជើងហោះហើរត្រង់ឡើងវិញ ជំរុញពាណិជ្ជកម្ម និងការវិនិយោគ រួមទាំងការបើកពាណិជ្ជកម្មតាមព្រំដែនឡើងវិញនៅចំណុចដែលបានកំណត់ចំនួន ៣ និងសម្រួលទិដ្ឋាការដល់អ្នកដំណើរផងដែរ។ ជើងហោះហើរត្រង់រវាងប្រទេសទាំងពីរត្រូវបានផ្អាកចាប់តាំងពីការរីករាលដាលជំងឺកូវីដ១៩ក្នុងឆ្នាំ២០២០។ ប៉ុន្តែមកទល់ពេលនេះ មិនទាន់មានកាលបរិច្ឆេទផ្លូវការសម្រាប់ការដំណើរការឡើងវិញទាំងជើងហោះហើរ និងពាណិជ្ជកម្មរវាងភាគីទាំងពីរ។
សេចក្តីថ្លែងការណ៍ចុងក្រោយពីក្រសួងការបរទេសឥណ្ឌាបានធ្វើឡើងក្រោយបញ្ចប់នៃដំណើរទស្សនកិច្ចរយៈពេល២ថ្ងៃរបស់រដ្ឋមន្ត្រីការបរទេសចិន លោក វ៉ាង យី (Wang Yi) ទៅកាន់ទីក្រុងញូដេលី (New Delhi) សម្រាប់កិច្ចពិភាក្សាលើកទី២៤ ជាមួយទីប្រឹក្សាសន្តិសុខជាតិឥណ្ឌា (NSA) លោក Ajit Doval ដើម្បីដោះស្រាយជម្លោះព្រំដែន រាប់ទសវត្សរ៍របស់ប្រទេសទាំងពីរ។ ក្រសួងឥណ្ឌាបានបញ្ជាក់ថា ការចរចាព្រំដែនបានគ្របដណ្តប់លើបញ្ហាដែលទាក់ទងនឹងការដកទ័ពដែលប្រទេសទាំងពីរបានដាក់នៅព្រំដែនហិម៉ាឡៃយ៉ាន ក៏ដូចជា ការកំណត់ព្រំដែន និងកិច្ចការព្រំដែនរួមគ្នា។
ចំណែកសេចក្តីថ្លែងការណ៍ក្រសួងការបរទេសចិន នៅថ្ងៃទី២០ ខែសីហា បានបង្ហាញថា ប្រទេសទាំងពីរបានព្រមព្រៀងគ្នាបង្កើតក្រុមការងារមួយដើម្បីពិគ្រោះយោបល់ និងសម្របសម្រួលកិច្ចការព្រំដែន ជំរុញការចរចារបោះបង្គោលព្រំដែន។ យន្តការនេះ នឹងពង្រីកកិច្ចពិភាក្សាដើម្បីគ្របដណ្តប់ផ្នែកខាងកើត និងកណ្តាលនៃព្រំដែន។ ទន្ទឹមនឹងនោះ ការចរចាមួយផ្សេងទៀត ស្តីពីផ្នែកខាងលិចនឹងត្រូវធ្វើឡើងឱ្យបានឆាប់តាមដែលអាចធ្វើបាន។ រដ្ឋាភិបាលចិនក៏បានគូសបញ្ជាក់ផងដែរថា ប្រទេសទាំងពីរបានយល់ព្រមជួបពិភាក្សាគ្នាម្តងទៀត នៅក្នុងប្រទេសចិននាឆ្នាំក្រោយ។
នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានបង្ហោះសារនៅលើបណ្តាញសង្គម X បន្ទាប់ពីបានជួបលោក វ៉ាង យី ដូច្នេះថា «ទំនាក់ទំនងស្ថិរភាព អាចព្យាករណ៍បាន និងស្ថាបនារវាងឥណ្ឌា និងចិន នឹងរួមចំណែកយ៉ាងសំខាន់ដល់សន្តិភាព និងវិបុលភាពក្នុងតំបន់ ក៏ដូចជាពិភពលោក»។
លោក ម៉ូឌី ក៏គ្រោងនឹងធ្វើដំណើរទៅកាន់ប្រទេសចិននៅចុងខែនេះ ដើម្បីចូលរួមក្នុងកិច្ចប្រជុំកំពូលនៃអង្គការសហប្រតិបត្តិការសៀងហៃ ដែលជាដំណើរទស្សនកិច្ចលើកដំបូងរបស់លោកទៅកាន់ប្រទេសចិនក្នុងរយៈពេលជាង៧ឆ្នាំ៕
ចែករំលែកព័តមាននេះ