ក្រុម​អ្នក​សង្កេតការណ៍​អន្តរកាល (IOT) មាន​តំណាង​មក​ពី​ប្រទេស ៥ ពិនិត្យ​តំបន់​ជុំវិញ​ប្រាសាទព្រះវិហារ​ផ្ទៀងផ្ទាត់ និង​រាយការណ៍​ស្ថានភាព​ក្រោយ​បទ​ឈប់​បាញ់ ។

លោក នេត្រ ភក្ត្រា រដ្ឋមន្ត្រីក្រសួង​ព័ត៌មាន បាន​ប្រកាស​នៅ​លើ​បណ្តាញ​សង្គម​ហ្វេ​ស​ប៊ុ​ករប​ស់លោក​នា​មុន​នេះ​បន្តិច​ថា ៖ ក្រសួងការពារជាតិ​នៃ​ព្រះរាជាណាចក្រ​កម្ពុជា បាន​សម្របសម្រួល​ជូន ក្រុម​អ្នក​សង្កេតការណ៍​អន្តរកាល (IOT) ដែល​មាន​តំណាង​មក​ពី​ប្រទេស​ចំនួន​៥ ដឹកនាំ​ដោយ លោក​វរសេនីយ៍ឯក NAZLEE BIN ABDUL RAHIM អនុព័ន្ធយោធា​ម៉ា​ឡេ​ស៊ី ប្រចាំ​កម្ពុជា ។

រដ្ឋមន្ត្រីក្រសួង​ព័ត៌មាន បាន​បន្ត​ថា នៅ​ថ្ងៃ​ពុធ ទី​២០ ខែសីហា ឆ្នាំ​២០២៥ បាន​អញ្ជើញ​ពិនិត្យ​តំបន់​ជុំវិញ​ប្រាសាទព្រះវិហារ ដើម្បី​សង្កេតការណ៍ ផ្ទៀងផ្ទាត់ និង​រាយការណ៍​អំពី​ស្ថានភាព​ក្រោយ​បទ​ឈប់​បាញ់ ។

យ៉ាងណាក្តីកម្ពុជា គូសបញ្ជាក់យ៉ាងម៉ឺងម៉ាត់ និងច្បាស់លាស់បំផុតនូវការប្តេជ្ញាចិត្តឥតងាករេរបស់ខ្លួនក្នុងការគោរពអនុវត្តន៍យ៉ាងខ្ជាប់ខ្ជួន និងពេញលេញនៃបទឈប់បាញ់ដែលសម្រេចបានកាលពីថ្ងៃទី២៨ ខែកក្កដា ឆ្នាំ២០២៥ និងគោលការណ៍ឯកភាពទាំង១៣ ចំណុចនៅក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥ ដែលមានអ្នកសង្កេតការណ៍ដោយ ប្រទេសម៉ាឡេស៊ី សហរដ្ឋអាមេរិក និងសាធារណរដ្ឋប្រជាមានិតចិន ៕