រាជធានីភ្នំពេញ ៖ សម្តេចកិត្តិសង្គហបណ្ឌិត ម៉ែន សំអន ត្រូវបានបោះឆ្នោតជ្រើសតាំងជាប្រធានក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព) អាណត្តិទី៤ ។ ការបោះឆ្នោតតាមការអញ្ជើញរបស់…
រាជធានីភ្នំពេញ ៖ សម្តេចកិត្តិសង្គហបណ្ឌិត ម៉ែន សំអន ត្រូវបានបោះឆ្នោតជ្រើសតាំងជាប្រធានក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព) អាណត្តិទី៤ ។
ការបោះឆ្នោតតាមការអញ្ជើញរបស់ ឯកឧត្តម ហេង វង្សប៊ុនឆាត ព្រឹទ្ធសមាជិក នៃក្រុមប្រឹក្សាជាតិប្រឆាំងអំពើពុករលួយ អាណត្តិទី៤ ក្រុមប្រឹក្សាជាតិប្រឆាំងអំពើពុករលួយ អាណត្តិទី៤ ដែលរួមមានសមាសភាពចំនួន ១១រូប បានដំណើរការកិច្ចប្រជុំលើកទី១ របស់ខ្លួន ដើម្បីបោះឆ្នោតជ្រើសតាំងប្រធាន និងអនុប្រធានក្រុម ប្រឹក្សាជាតិប្រឆាំងអំពើពុករលួយ អាណត្តិទី៤ (២០២៥-២០៣០) នៅរសៀលថ្ងៃអង្គារ ទី១៩ ខែសីហា ឆ្នាំ២០២៥ ។
គណៈកម្មការបោះឆ្នោតចំនួន ៣រូប (ឯកឧត្តម កែវ រ៉េមី ឯកឧត្តម តាំង ស៊ុនឡាយ និង ឯកឧត្តម ឡាយ សំកុល) បានដំណើរការការងារបោះឆ្នោត ហើយទទួលបានលទ្ធផលដូចតទៅ ៖
១-សម្តេចកិត្តិសង្គហបណ្ឌិត ម៉ែន សំអន ត្រូវបានជ្រើសតាំងជា ប្រធាន ក.ជ.ប.ព. អាណត្តិទី៤ ដោយមានសម្លេងគាំទ្រជាឯកច្ឆ័ន្ទចំនួន ១១ លើ ១១ សម្លេង ។
២-ឯកឧត្តម តុប សំ ត្រូវបានជ្រើសតាំងជា អនុប្រធាន ក.ជ.ប.ព. អាណត្តិទី៤ ដោយ មានសម្លេងគាំទ្រជាឯកច្ឆ័ន្ទចំនួន ១១ លើ ១១ សម្លេង ។
ក្នុងនាមបេក្ខជនជាប់ឆ្នោតជាប្រធាន និងអនុប្រធានក្រុមប្រឹក្សាជាតិប្រឆាំងអំពើពុករលួយ សម្តេចកិត្តិសង្គហបណ្ឌិត ម៉ែន សំអន បានថ្លែងនូវអំណរគុណហើយសន្យាបំពេញភារកិច្ចដឹកនាំក្រុមប្រឹក្សាជាតិ ប្រឆាំងអំពើពុករលួយឱ្យបានល្អដូចអាណត្តិទី១ ទី២ និងទី៣ កន្លងមក ។
ឯកឧត្តម យ៉ិនទៀង ពុទ្ធិរិទ្ធ អនុប្រធានទី១ នៃអង្គភាពប្រឆាំងអំពើពុករលួយ ក្នុងនាមថ្នាក់ដឹកនាំ និងមន្ត្រីរាជការទាំងអស់របស់អង្គភាពប្រឆាំងអំពើពុករលួយ បានថ្លែងនូវចំណាប់អារម្មណ៍អបអរសាទរជូន ក្រុមប្រឹក្សាជាតិប្រឆាំងអំពើពុករលួយ អាណត្តិថ្មី និងជូនជាពិសេស សម្តេចកិត្តិសង្គហបណ្ឌិត ម៉ែន សំអន និងឯកឧត្តម តុប សំ ដែលត្រូវបានជ្រើសតាំងជាប្រធាន និងអនុប្រធានក្រុមប្រឹក្សាជាតិប្រឆាំងអំពើពុករលួយ ។
ក្រុមប្រឹក្សាជាតិប្រឆាំងអំពើពុករលួយ អាណត្តិទី៤ និងអង្គប្រជុំដែលមានការចូលរួមពីសំណាក់ អនុប្រធានទី១ អនុប្រធាន ឧបការី នៃអង្គភាពប្រឆាំងអំពើពុករលួយ និងថ្នាក់ដឹកនាំគ្រប់ថ្នាក់គ្រប់ផ្នែកទាំងអស់ក្នុងអង្គភាព បានសម្តែងនូវការគោរពចំពោះវីរភាពដ៏ខ្ពង់ខ្ពស់របស់វីរកងទ័ពដែលបានការពារ បូរណភាពទឹកដីដ៏អង់អាចក្លាហាន ហើយសូមបួងសួងដល់គ្រប់វត្ថុស័ក្តិសិទ្ធិក្នុងលោកសូមតាមការពារ ថែរក្សា និងនាំមកនូវជោគជ័យយ៉ាងត្រចះត្រចង់ដល់វីរកងទ័ពរបស់យើងក្នុងបុព្វហេតុការពារជាតិដែល មិនអាចកាត់ថ្លៃបាននេះ ៕
ចែករំលែកព័តមាននេះ