ទីក្រុងប៉ារីស៖ ប្រធានាធិបតីបារាំង លោកម៉ាក្រុង បានផ្ដល់សញ្ញាព្រមានទៅក្រុមសម្ព័ន្ធមិត្តអឺរ៉ុបថាមិនត្រូវទុកចិត្តប្រមុខដឹកនាំរុស្ស៊ី លោកពូទីនទេ។ លោកម៉ាក្រុងបានប្រៀបប្រដូចលោកពូទីនទៅនឹងយក្សកំណាចដែលឈរនៅមាត់របងផ្ទះរបស់អឺរ៉ុប។ លោកម៉ាក្រុងធ្វើអត្ថាធិប្បាយដូចខាងលើនេះចំពេលដែលលោកពូទីន និងលោកហ្សេឡិនស្គីត្រៀមជួបគ្នាកម្រិតកំពូល។
ថ្នាក់ដឹកនាំអឺរ៉ុបដែលរួមទាំងលោកម៉ាក្រុងផងដែរបានរួមដំណើរជាមួយលោកហ្សេឡិនស្គីទៅជួបលោកត្រាំនៅសេតវិមានកាលពីយប់មិញ។ កំពុងនិយាយគ្នាសុខៗ លោកត្រាំ និងលោកពូទីនក៏ចាប់ផ្ដើមសន្ទនាគ្នាតាមទូរស័ព្ទ។ លោកពូទីនប្រាប់លោកត្រាំថាលោកយល់ព្រមជួបលោកហ្សេឡិនស្គីនាពេលឆាប់ៗនេះដើម្បីដោះស្រាយបញ្ហាអ៊ុយក្រែន។ អឺរ៉ុបក៏បាននិយាយអំពីការធានាសន្តិសុខសម្រាប់អ៊ុយក្រែនផងដែរ។
លោកម៉ាក្រុងថ្លែងប្រាប់អ្នកសារព័ត៌មានថាលោកពូទីនកម្រនឹងធ្វើតាមការសន្យារបស់គាត់ណាស់។ គាត់នៅតែជាកម្លាំងចលករមួយដែលធ្វើឱ្យមានអស្ថិរភាពជានិច្ច។ គាត់ចង់គូសវាសផែនទីថ្មីដើម្បីពង្រីកឥទ្ធិពលរបស់គាត់។ លោកម៉ាក្រុងថ្លែងថាលោកគ្មានជំនឿថាប្រទេសរុស្ស៊ីនឹងវិលទៅរកសន្តិភាព និងដឹកនាំតាមប្រព័ន្ធប្រជាធិបតេយ្យឡើងវិញនោះទេ។
លោកម៉ាក្រុងថ្លែងបន្តទៀតថាលោកពូទីនដោយហេតុតែចង់រស់រានមានជីវិតជាបន្តទៀត គាត់ត្រូវតែបន្តបរិភោគអាហារ។ មានន័យថាគាត់មានសារជាតិជាអ្នកប្រមាញ់ចំណី។ គាត់ប្រៀបបាននឹងយក្សកំណាចនៅរបងផ្ទះរបស់យើង (អឺរ៉ុប)។ លោកម៉ាក្រុងចង់បញ្ជាក់ត្រង់ចំណុចនេះថាលោកនិយាយបែបនេះមិនមែនមានន័យថាបារាំងនឹងរងការវាយប្រហារ (ពីរុស្ស៊ី) នៅថ្ងៃស្អែកទេ។ ប៉ុន្តែនេះជាការគំរាមកំហែងចំពោះទ្វីបអឺរ៉ុប។ ចូរយើងកុំមានគំនិតឆោតល្ងង់ចាញ់ល្បិចរបស់គេ៕
ចែករំលែកព័តមាននេះ