ថៃ ៖ គ្រូហុងស៊ុយល្បីៗទាំងក្នុង និងក្រៅប្រទេស បានអះអាងដូចៗគ្នាថា នេះជាយុគ៩ គឺជាយុគធាតុភ្លើង ជាយុគដែលអ្វីៗមិនទៀងទាត់ និងជាពេលវេលាដែលត្រូវបោសសម្អាតមនុស្សអាក្រក់ចេញ ព្រោះភ្លើងនឹងដុតបំភ្លឺឱ្យឃើញរាល់សេចក្តីពិត…
ថៃ ៖ គ្រូហុងស៊ុយល្បីៗទាំងក្នុង និងក្រៅប្រទេស បានអះអាងដូចៗគ្នាថា នេះជាយុគ៩ គឺជាយុគធាតុភ្លើង ជាយុគដែលអ្វីៗមិនទៀងទាត់ និងជាពេលវេលាដែលត្រូវបោសសម្អាតមនុស្សអាក្រក់ចេញ ព្រោះភ្លើងនឹងដុតបំភ្លឺឱ្យឃើញរាល់សេចក្តីពិត ។ និយាយចឹងយុគ៩នេះ មនុស្សធ្វើអំពើល្អត្រឹមត្រូវនឹងទទួលបាននូវសេចក្តីសុខសាន្ត ហើយមនុស្សដែលប្រព្រឹត្តមិនល្អថែមទាំងចូលចិត្តលាបពណ៌អ្នកដទៃ គឺកាន់តែលាបពណ៌ កាន់តែធ្លាក់មកលើខ្លួនឯង ។
កម្ពុជា ៖ ធាតុពិតជាក់ស្តែង គិតចាប់ពីថ្ងៃដែលថៃបើកការឈ្លានពានមកលើកម្ពុជា នាចុងខែឧសភា ហើយប្រកាសបិទច្រកព្រំដែនដោយឯកតោភាគី ចាប់ពីថ្ងៃទី៧ មិថុនា មកទល់ពេលនេះបានធ្វើឲ្យថៃខ្លួនឯង រងការខាតបង់យ៉ាងធ្ងន់ធ្ងរទៅ លើវិស័យសំខាន់ៗដូចជា វិស័យទេសចរណ៍ វិស័យពាណិជ្ជកម្ម និងជួបវិបត្តិកង្វះកម្លាំងពលកម្ម ៖ វិស័យពាណិជ្ជកម្ម ៖ ថៃ បានបាត់បង់ការនាំចេញទំនិញជាច្រើនទៅកាន់កម្ពុជា ដែលមានតម្លៃរាប់ពាន់លានដុល្លារ ។ ការបិទច្រកព្រំដែនគោក បានបង្ខំឲ្យក្រុមហ៊ុនថៃប្ដូរមកប្រើប្រាស់ការដឹកជញ្ជូនតាមផ្លូវសមុទ្រវិញ ដែលមានតម្លៃខ្ពស់ជាង និងធ្វើឲ្យការនាំចេញធ្លាក់ចុះ ។ ការប៉ះពាល់នេះ ធ្វើឲ្យថៃអាចនឹងបាត់បង់ចំណូលប្រចាំខែជាង១១ពាន់លានបាត (ប្រមាណ៣០០លានដុល្លារអាមេរិក) ពីការនាំចេញ ។
បន្ថែមលើនេះ អ្វីដែលកាន់តែធ្ងន់ធ្ងរ ទំនិញ និងសេវាកម្មថៃ សឹងតែគ្រប់មុខកំពុងត្រូវបានប្រជាពលរដ្ឋ កម្ពុជានៅគ្រប់ទិសទីពហិការសឹងតែគ្រប់គ្នា ។
ចំពោះវិបត្តិកម្លាំងពលកម្ម ៖ ពលករខ្មែរប្រមាណ៧៨០,០០០នាក់ បានវិលត្រឡប់ទៅកម្ពុជាវិញ ដែលបង្កបញ្ហាដល់ឧស្សាហកម្មមួយចំនួននៅថៃដែលពឹងផ្អែកខ្លាំងលើកម្លាំងពលកម្មទាំងនេះដូចជា វិស័យកសិកម្ម សំណង់ និងនេសាទ ។ និន្នាការនេះធ្វើឱ្យថៃឈានដល់វិបត្តិខ្វះកម្លាំងពលកម្ម ហើយក្រៅពពាយនាយរកកម្លាំងពលកម្មពីប្រទេសជាច្រើននោះថ្មីបំផុតចុងក្រោយនេះ រដ្ឋមន្ត្រីការងារថៃស្នើឱ្យប្រើអតីតអ្នកជាប់ពន្ធនាគារឱ្យចូលបម្រើការងារទាំងនោះ ។
មីយ៉ាន់ម៉ា ៖ មិនបញ្ឈប់ត្រឹមនេះទេ ខណៈដែលសេដ្ឋកិច្ចថៃ កំពុងជួបប្រទះបញ្ហាប្រឈមធំៗ ក្រោយមានជម្លោះព្រំដែនជាមួយកម្ពុជានោះ ងាកទៅទំនាក់ទំនងពាណិជ្ជកម្មជាមួយបណ្តាប្រទេសក្នុងតំបន់ ដែលថៃធ្លាប់រកស៊ីយ៉ាងកាក់កប កើបលុយរាប់ឆ្នាំមកហើយនោះ ស្រាប់តែពេលនេះចាប់ផ្តើមប្រេះឆា បង្ករផលប៉ះពាល់យ៉ាងខ្លាំង ជាក់ស្តែង នៅថ្ងៃទី១៨ ខែសីហា ឆ្នាំ២០២៥ រដ្ឋាភិបាលយោធាមីយ៉ាន់ម៉ា បានបញ្ជាឲ្យបិទច្រកព្រំដែន Mae Sot-Myawaddy និងស្ពានមិត្តភាពថៃ-មីយ៉ាន់ម៉ា ទី២ ដោយឯកតោភាគី និងមិនបានជូនដំណឹងដល់ភាគីថៃជាមុននោះទេ ។
ការបិទច្រកទ្វារព្រំដែន ដែលជាផ្លូវដ៏សំខាន់សម្រាប់ការនាំចេញ និងនាំចូលទំនិញរបស់សៀមបង្កឱ្យមានការកស្ទះយ៉ាងខ្លាំង ។ ការបិទព្រំដែនជាឯកតោភាគីនេះ គេធ្លាប់ដឹងថា ថៃ បានធ្វើដាក់កម្ពុជា ហើយពេលនេះថៃ ស្គាល់រសជាតិនេះម្តងហើយ នេះពិតជាយុគ៩ពិតៗ ។ រូបភាពដែលទទួលបាន នៅថ្ងៃទី១៨ ខែសីហា ឆ្នាំ២០២៥ បង្ហាញថា ច្រកទ្វារព្រំដែន Mae Sot-Myawaddy 2 ដែលភ្ជាប់ខេត្តតាក់ របស់ថៃ និងទីក្រុងMyawaddy រដ្ឋKaren របស់មីយ៉ាន់ម៉ា គេឃើញថា រថយន្តដឹកទំនិញរបស់ថៃរាប់រយពាន់គ្រឿងស្ទះកកកុញពេញព្រំដែនទៅមុខមិនរួច ថយក្រោយក៏មិនបាន ។
ហ្វីលីពីន ៖ នៅមិនទាន់អស់ទេ ក្រៅពីមីយ៉ាន់ម៉ា ប្រទេសហ្វីលីពីន ដែលស្ថិតក្នុងចំណោមប្រទេសទទួលទិញអង្ករនាំមុខពីប្រទេសថៃដ៏សំខាន់នោះបានប្រកាសពីផ្អាកការនាំចូលអង្ករពីប្រទេសថៃ និងប្រទេសដទៃរយៈពេល៦០ថ្ងៃ ដោយចាប់ផ្តើមពីថ្ងៃទី១ ខែកញ្ញា ដល់ថ្ងៃទី៣០ ខែតុលា ឆ្នាំ២០២៥ ។
យោងតាមការប្រភពពីសារព័ត៌មានថៃ និងហ្វីលីពីន ដែលចុះផ្សាយ នៅថ្ងៃទី១៨ ខែសីហា ដោយអះអាងថា នេះជាបញ្ជារបស់លោក Ferdinand Marcos Jr ប្រធានាធិបតីហ្វីលីពីន ក្រោយកោះប្រជុំគណរដ្ឋមន្ត្រី ក្នុងគោលដៅបន្ធូរបន្ថយផលប៉ះពាល់នៃការធ្លាក់ចុះនូវតម្លៃស្រូវក្នុងស្រុកនារដូវប្រមូលផលរបស់កសិករហ្វីលីពីន ។
លោកស្រី Arada Fuangtong ប្រធាននាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃ បានទទួលស្គាល់ថា ការសម្រេចរបស់រដ្ឋាភិបាលហ្វីលីពីននឹងប៉ះពាល់ដល់ការនាំចេញរបស់ខ្លួនដូចទៅនឹងប្រទេសនាំចូលអង្ករផ្សេងទៀតដែរ ។
ប្រាកដណាស់ថា ជាពិតជាប៉ះពាល់ ហើយធ្ងន់ធ្ងរថែមទៀត ព្រោះថា ពេញមួយឆ្នាំ២០២៤ ថៃ បាននាំចេញអង្ករទៅកាន់ប្រទេសហ្វីលីពីនដល់ទៅ៣៣៣លានដុល្លារអាមេរិក កើនឡើងជាង៥៨% បើធៀបនឹងឆ្នាំ២០២៣ ។ ជាពិសេស ការផ្អាករបស់ហ្វីលីពីនរយៈពេល ២ខែពេញនឹងនាំឱ្យការការនាំចេញអង្គររបស់ថៃចូលទៅហ្វីលីពីនក្នុងឆមាសទី២ ឆ្នាំ២០២៥ នឹងដាំក្បាលចុះ បើធៀបនឹងឆមាសទី១ ខណៈពីខែមករា ដល់ខែមិថុនា ថៃបាននាំចេញអង្ករទៅហ្វីលីពីន ប្រហែល១៤១,០០០តោនឯណោះ ដូច្នោះមានន័យថា បិទ២ខែនេះថៃនឹងសល់អង្ករដល់ទៅ៤៧,០០០តោនគ្មានទីផ្សារ ។
ភាពតានតឹងនៅតាមព្រំដែនជាមួយកម្ពុជា មីយ៉ាន់ម៉ា ឡាវ ម៉ាឡេស៊ី ដែលនាំឱ្យបរិមាណនាំចេញធ្លាក់ចុះយ៉ាងគំហុកដូចដែលបានរៀបរាប់ខាងលើ រួមទាំងវិបត្តិចាក់ស្រេះ ដែលប្រទេសថៃកំពុងជួបប្រទះដូចជា វិបត្តិនយោបាយ ពន្ធគយអាមេរិក ទេសចរណ៍ បំណុល រោងចក្របិទ្វារ វិស័យសំណង់ជាប់គាំងជាដើមនោះ ត្រូវបានក្រុមអ្នកវិភាគ និងសេដ្ឋវិទូថៃ ព្យាករណ៍ស្រដៀងៗគ្នាថា ប្រទេសមួយនេះកំពុងឈរជាប់នឹងមាត់រណ្តៅ ហើយអាចនឹងធ្លាក់ចូលទៅក្នុងវិបត្តិសេដ្ឋកិច្ច នៅក្នុងត្រីមាសទី៤ នៃឆ្នាំ២០២៥នេះ ៕
ចែករំលែកព័តមាននេះ