ប្រទេសកូរ៉េខាងជើង ៖ មេដឹកនាំកូរ៉េខាងជើងលោកគីមជុងអ៊ុន បានអំពាវនាវឲ្យពង្រីកដោយឆាប់រហ័សសមត្ថភាពនុយក្លេអ៊ែររបស់ប្រទេសលោក ប្រឈមមុខនឹងឧបាយកលយោធារួមរបស់អាមេរិកនិងកូរ៉េខាងត្បូងដែលលោកថាចង់បំផ្ទុះសង្គ្រាមមួយ។
ដកស្រង់សម្ដីកាលពីថ្ងៃទី១៩សីហាដោយទីភ្នាក់ងារព័ត៌មានកូរ៉េខាងជើងKCNA លោកគីមជុងអ៊ុនវាយតម្លៃថា ទំនាក់ទំនងយោធាអាមេរិក-កូរ៉េខាងត្បូងកាន់តែបង្កើន ហើយការបង្ហាញកម្លាំងរបស់ពួកគេបញ្ជាក់យ៉ាងច្បាស់ពីបំណងពួកគេបំផ្ទុះសង្គ្រាមមួយ ។ សភាពការណ៍បច្ចុប្បន្នទាមទារឲ្យយើង ត្រូវមានការផ្លាស់ប្ដូរដោយឆាប់រហ័ស និងទាំងស្រុងទ្រឹស្ដីនិងការអនុវត្តខាងយោធា ព្រមទាំងត្រូវពង្រីគដោយរហ័សនុយក្លេអ៊ែរភាវូបនីយកម្ម។
សេចក្ដីថ្លែងការណ៍បែបនេះរបស់លោកគីមជុងអ៊ុនធ្វើឡើងកាលពីថ្ងៃទី១៨សីហាពេលលោកទៅពិនិត្យនាវាពិឃាតផលិតក្នុងស្រុកឈ្មោះCHOE HYON ដោយលោកសម្ដែងការពេញចិត្តចំពោះនាវានោះ សម្រាប់ជានាវាទំនើបជាមួយគ្រឿងសព្វាវុធនុយក្លេអ៊ែរដូចការគ្រោងទុក ។
ចំណែកកូរ៉េខាងត្បូងនិងសម្ព័ន្ធមិត្តអាមេរិកវិញ បានបើកធ្វើនាថ្ងៃទី១៨សីហាសមយុទ្ធយោធារួមប្រចាំឆ្នាំ សំដៅកែលម្អកិច្ចសហប្រតិបត្តិការក្នុងករណីមានជម្លោះជាមួយកូរ៉េខាងជើង។ សមយុទ្ធនេះប្រព្រឹត្តទៅ១១ថ្ងៃជាមួយការហ្វឹកហ្វឺនបាញ់គ្រាប់ពិត៕
ចែករំលែកព័តមាននេះ