ទីក្រុងវ៉ាស៊ីនតោន៖ លោកត្រាំប្រាប់ឱ្យអ៊ុយក្រែនបោះបង់ចោលការប្រាថ្នាចង់បានតំបន់គ្រីម៉េត្រឡប់មកវិញបន្ទាប់ពីតំបន់នេះត្រូវរុស្ស៊ីកាត់ខ្វៀលយក និងដាក់បញ្ចូលជាទឹកដីរបស់ខ្លួនកាលពីឆ្នាំ២០១៤ គិតទៅជាង១០ឆ្នាំកន្លងមកហើយ។ ម៉្យាងទៀត លោកត្រាំក៏ប្រាប់ឱ្យអ៊ុយក្រែនបោះបង់ចោលគម្រោងចូលជាសមាជិកអង្គការណាតូផងដែរ។ ឥឡូវនេះ លោកត្រាំកំពុងរៀបចំខ្លួនទទួលស្វាគមន៍លោកហ្សេឡិនស្គី និងថ្នាក់ដឹកនាំអឺរ៉ុបនៅសេតវិមានដើម្បីជំរុញឱ្យអ៊ុយក្រែនទទួលយកកិច្ចព្រមព្រៀងសន្តិភាព។
លោកត្រាំនឹងជួបលោកហ្សេឡិនស្គីមុននៅយប់ថ្ងៃចន្ទ បន្ទាប់មក លោកនឹងជួបថ្នាក់ដឹកនាំអង់គ្លេស អាល្លឺម៉ង់ បារាំង អ៊ីតាលី ហ្វាំងឡង់ ប្រធានគណៈកម្មការអឺរ៉ុប និងអគ្គលេខាធិការអង្គការណាតូ។ ពួកគេកំពុងធ្វើដំណើរទៅវ៉ាស៊ីនតោនដើម្បីជួយជ្រោមជ្រែងលោកហ្សេឡិនស្គីកុំឱ្យជជែកគ្នាតឹងសរសៃកជាមួយលោកត្រាំដូចកាលពីចុងខែកុម្ភៈ និងដើម្បីជំរុញឱ្យមានការធានាសន្តិសុខជាតិរបស់អ៊ុយក្រែនក្រោយពេលចប់សង្គ្រាម។
ក្រុមរបស់លោកត្រាំសង្កត់ធ្ងន់ថានៅក្នុងការចរចាគ្នាលើកនេះ ភាគីទាំង២ (រុស្ស៊ី,អ៊ុយក្រែន) ត្រូវតែធ្វើសម្បទានឱ្យគ្នាទៅវិញទៅមក។ គ្រាន់តែថាលោកត្រាំហាក់ដូចជាចង់ផ្ទុកផ្ដាក់ទៅលើលោកហ្សេឡិនស្គីជាង។ តាមមើលទៅ នៅក្នុងគម្រោងជួបគ្នានៅសេតវិមានលើកនេះ លោកត្រាំអាចនឹងដាក់សម្ពាធទៅលើលោកហ្សេឡិនស្គីមិនស្ទើរទេ។ លោកត្រាំថ្លែងថាបើលោកហ្សេឡិនស្គីចង់បញ្ចប់សង្គ្រាមនៅពេលនេះគឺអាចបញ្ចប់បាន។ ឬមិនដូច្នេះទេ គាត់អាចនឹងធ្វើសង្គ្រាមជាបន្តទៀត។
លោកត្រាំបង្ហោះសារនៅលើបណ្ដាញសង្គមថាសូមចងចាំថាតើសង្គ្រាមនេះកើតឡើងដោយរបៀបណា។ លោកយល់ថាអ៊ុយក្រែនមិនគួរទាមទារតំបន់គ្រីម៉េដែលបាត់បង់តាំងពីជំនាន់លោកអូបាម៉ាដោយគ្មានការផ្ទុះអាវុធសូម្បីតែមួយគ្រាប់ និងមិនគួរចូលជាសមាជិកអង្គការណាតូទេ។
ប្រភពខ្លះថានៅក្នុងការសន្ទនាគ្នានៅអាឡាស់ស្កា លោកពូទីនប្រាប់លោកត្រាំថាលោកនឹងផ្អាកសកម្មភាពយោធាត្រឹមនេះបើអ៊ុយក្រែនយល់ព្រមកាត់ខ្វៀលតំបន់ដូញែតទាំងមូលទៅឱ្យរុស្ស៊ីដោយស្របច្បាប់។ ប៉ុន្តែលោកហ្សេឡិនស្គីប្រកាសបដិសេធ។ សព្វថ្ងៃនេះ កងទ័ពរុស្ស៊ីកាន់កាប់តំបន់ដូញែតប្រហែល៧៥%។ លោកហ្សេឡិនស្គីចង់ស្នើឱ្យមានបទឈប់បាញ់សិនមុននឹងឈានដល់ការចរចាសន្តិភាព។ លោកត្រាំមុនដំបូងគាំទ្រគំនិតនេះ។ ប៉ុន្តែក្រោយពេលជួបគ្នាជាមួយលោកពូទីននៅអាឡាស់ស្កា លោកកែប្រែចិត្តវិញ។ លោកគាំទ្រឱ្យភាគីទាំង២ប្រើយុទ្ធសាស្ត្រវាយប្រហារគ្នាផង និងចរចាគ្នាផង៕
ចែករំលែកព័តមាននេះ