ADផ្ទាំងផ្សព្វផ្សាយពាណិជ្ជកម្ម

ចាក់ដីលុបព្រែកចង់អស់ ចៅហ្វាយក្រុងឱ្យកាយចេញវិញ មិនកាយទេ មានតែចា.ក់ថែម

2 ម៉ោង មុន

ស្វាយរៀង
១៨ ខែ សីហា ឆ្នាំ ២០២៥ ម៉ោង ១៦:៣០

ខេត្តស្វាយរៀង ៖ តើលោកគង់សុភី ប្រធានក្រុមហ៊ុនម៉ៅការសំរាមក្រុងស្វាយរៀងអាងខ្នងឬក៏មានខ្សែអ្នកធំទើបហ៊ានដឹកយកអាចម៌ដីមកចាក់លប់ចំណីព្រែកទទឹង៣៦ម៉ែត្របណ្តោយ១០០ម៉ែត្រធ្វើជាកម្មសិទ្ធិ មិនគោរពតាមចំណាត់ការរបស់លោកអភិបាលក្រុងស្វាយរៀងឲ្យកាយយកអាចម៌ដីចេញវិញដើម្បីរក្សាដីចំណីព្រែកធម្មជាតិជាដីរបស់រដ្ឋ ក៏ប៉ុន្តែក្រុមហ៊ុនមួយនេះនៅចាក់ដីរំលោភផ្គើននិងចំណាត់ការរបស់រដ្ឋបាលក្រុង។ ទាក់ទិនក្នុងករណីនេះដែរ លោកគង់សុភី ប្រធានក្រុមហ៊ុនម៉ៅការសំរាម ដែលបានចាក់អាចម៌ដីលប់ចំណីព្រែកអូរស្មាច់ធ្វើជាកម្មសិទ្ធិ…

ទាក់ទិនក្នុងករណីនេះដែរ លោកគង់សុភី ប្រធានក្រុមហ៊ុនម៉ៅការសំរាម ដែលបានចាក់អាចម៌ដីលប់ចំណីព្រែកអូរស្មាច់ធ្វើជាកម្មសិទ្ធិ បានប្រាប់អ្នកសារព័ត៌មានយើងនៅព្រឹកថ្ងៃទី១៨សីហា២០២៥នេះថា លោករង់ចាំ លោកអភិបាលរងខេត្តចុះមកពិនិត្យនិងអនុញ្ញាតិឲ្យកាយត្រឹមណា ទើបលោកកាយ។

លោកហែម ពិសិដ្ឋ អភិបាលរងខេត្តស្វាយរៀង បានមានប្រសាសន៍ថា លោកមិនទាន់ជ្រាបក្នុងករណីនេះទេ សូមឲ្យទាក់ទងទៅលោកអភិបាលក្រុងស្វាយរៀងពិនិត្យដោះស្រាយ។លោកណុប ចំរើន អភិបាលក្រុងស្វាយរៀង បានមានប្រសាសន៍តាមទូរសព្ទ័ នារសៀលនេះថា លោកបានដឹកនាំក្រុមការងារចុះទៅពិនិត្យម្តងរួចហើយឃើញថា ក្រុមហ៊ុនគង់សុភី បានចាក់អាចម៌ដីលប់ចំណីព្រែកធម្មជាតិអូស្មាច់ ទទឹង៣៦ម៉ែត្របណ្តោយ១០០ម៉ែត្រ និងខាងក្រោយដីមានបណ្ណ័ទទឹង១៩ម៉ែត្របណ្តោយ២៥ម៉ែត្រ។

រដ្ឋបាលក្រុងបានបោះបង្គោលកំណត់ព្រំដីរួចធ្វើកិច្ចសន្យាឲ្យឈ្មោះគង់សុភី យកគ្រឿងចក្រកាយយកអាចម៌ដី ចេញវិញ រក្សាស្ថានភាពដីចំណីព្រែកដូចដើមវិញ ដោយកំណត់ឲ្យកាយចាប់ពីថ្ងៃទី០៥សីហា២០២៥តទៅ ក៏ប៉ុន្តែឈ្មោះគង់សុភី មិនអនុវត្តតាមកិច្ចសន្យា ដូច្នេះលោកនិងចាត់ក្រុមការងារចុះទៅពិនិត្យវាស់វែងនិងបោះបង្គោលថ្ម ដកយកដី«ទទឹង៣៦ម៉ែត្របណ្តោយ១០០ម៉ែត្រ»ទុកជាសម្បត្តិរបស់រដ្ឋ។

មហាជនបានលើកឡើងថា សូមឲ្យរដ្ឋបាលក្រុងស្វាយរៀងអនុវត្តច្បាប់ទៅលើម្ចាស់ក្រុមហ៊ុនគង់សុភី ដែលបានចាក់អាចម៌ដីលប់ព្រែកធម្មជាតិ ដែលជាដីទ្រព្យសម្បត្តិរបស់រដ្ឋយកធ្វើជាកម្មសិទ្ធិដោយខុសច្បាប់មិនគួរលើកលែងទេ ត្រូវតែអនុវត្តច្បាប់ កុំឲ្យជនឈ្លៀតឱកាស់ចាក់ដីរំលោភយកដីព្រែកធម្មជាតិធ្វើជាកម្មសិទ្ធិបន្តទៀត ។ ព្រែកនិងចំណីព្រែកអូរស្មាច់ គេជីកយកអាចម៌ដីលក់និងលប់យកធ្វើជាកម្មសិទ្ធិ រួមនៅទំហំតូចស្ទើរតែបាត់បង់ព្រែកទៅហើយ។

ទោះបីជាយ៉ាងណា សូមរង់ចាំមើលចំណាត់ការរបស់លោកអភិបាលក្រុងស្វាយរៀង ក្រោយពីក្រុមការងារមន្ត្រីសុរិយោដី ក្រុងចុះពិនិត្យ ហើយប្រាប់ឲ្យលោកគង់សុភីកាយយកអាចម៌ដីឡើងវិញរហូតដល់វេលារសៀលថ្ងៃទី១៨សីហានេះមិនទាន់ឃើញក្រុមហ៊ុនយកគ្រឿងចក្រមកកាយយកអាចម៌ដីឡើងវិញទេមានតែចាក់ថែម ។

មហាជនថា បើអ្នកចាក់ដីរំលោភជាបុគ្គលខ្លាំង គួរលើកគាត់ឱ្យធ្វើចៅហ្វាយក្រុងស្វាយរៀងតែម្តងទៅ… អ្នកខ្សោយកុំទុកជាមន្ត្រី ។

ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕