ខេត្តព្រៃវែង ៖ ឈ្មួញខ្មែរដែលដើរប្រមូលទិញកណ្ដុរពីអ្នកភូមិ បានអះអាងថា បច្ចុប្បន្ននេះ កណ្ដុរកំពុងមានទីផ្សារល្អខ្លាំងណាស់ ដោយនាំចេញទៅប្រទេសវៀតណាម ទោះបីមានប៉ុន្មានក៏គេទទួលយកដែរ គ្មានសល់ទេ ព្រោះវាជាម្ហូបពិសេសណាស់…
ខេត្តព្រៃវែង ៖ ឈ្មួញខ្មែរដែលដើរប្រមូលទិញកណ្ដុរពីអ្នកភូមិ បានអះអាងថា បច្ចុប្បន្ននេះ កណ្ដុរកំពុងមានទីផ្សារល្អខ្លាំងណាស់ ដោយនាំចេញទៅប្រទេសវៀតណាម ទោះបីមានប៉ុន្មានក៏គេទទួលយកដែរ គ្មានសល់ទេ ព្រោះវាជាម្ហូបពិសេសណាស់ ។
ឈ្មួញខ្មែរម្នាក់ដែលកំពុងថ្លឹងកណ្ដុរលក់ឱ្យឈ្មួញវៀតណាម នៅទីប្រជុំជនអ្នកលឿង បានឲ្យដឹងថា សត្វកណ្ដុរដែលឈ្មួញវៀតណាមទទួលទិញមានពីរប្រភេទ គឺកណ្ដុរបាយ និងកណ្ដុរប្រែង ហើយគេយកទៅលក់បន្តឲ្យហាងធំៗនៅក្នុងប្រទេសវៀតណាម មានប៉ុន្មានក៏គេទទួលទិញយកទាំងអស់ ព្រោះជនជាតិវៀតណាមទូទៅចូលចិត្តកណ្ដុរអាំង ទោះបីសាច់មាន់សាច់គោក៏មិនដូរ
ដែរ ។
ឈ្មួញដដែលរូបនេះបានបន្តថា ឈ្មួញខ្មែរយើងដើរប្រមូលទិញពីប្រជាពលរដ្ឋតាមផ្ទះ ដោយអ្នកភូមិគេដាក់អង្គប់នៅតាមវាលស្រែ ក្នុង១គីឡូក្រាមបានតម្លៃ ៥ពាន់រៀល ហើយឈ្មួញខ្មែរយកមកលក់បន្តឲ្យឈ្មួញវៀតណាម ក្នុង១គីឡូ ៧ពាន់រៀលគ្មានតថ្លៃមួយម៉ាត់ទេ ។
ឈ្មួញខ្មែរបានបញ្ជាក់ថា កាលពីមុនពួកគាត់ដឹកកណ្ដុរចូលទៅលក់ផ្ទាល់ តាមហាងធំៗនៅក្នុងប្រទេសវៀតណាម គឺបានតម្លៃថ្លៃ ចំណេញច្រើន តែឆ្នាំនេះ សមត្ថកិច្ចវៀតណាមគេបិទមិនឲ្យឈ្មួញខ្មែរដឹកទៅលក់ផ្ទាល់ទេ ទើបពួកគាត់ត្រូវបង្ខំចិត្តលក់ឲ្យឈ្មួញវៀតណាម ដែលមកចាំទទួលទិញនៅព្រំដែន ។ មានឈ្មួញខ្លះមកទទួលទិញដល់ទីប្រជុំជនអ្នកលឿងតែម្ដង ។ ការលក់ឱ្យឈ្មួញវៀតណាមបន្តនេះ គឺមិនសូវបានថ្លៃដូចលក់ឲ្យហាងធំៗនៅក្នុងប្រទេសវៀតណាមទេ ។
ទោះជាយ៉ាងណាក៏ដោយ ទីផ្សារកណ្ដុរនៅតែមានហាងឆេងល្អ ដោយឈ្មួញបាននាំចេញទៅប្រទេសវៀតណាម តាមច្រកអន្តរជាតិបន្ទាយចក្រី ក្អមសំណ និងកោះរកា សរុបមួយថ្ងៃៗចន្លោះពី៦ទៅ៧តោន ៕
ចែករំលែកព័តមាននេះ