ប្រទេសអ៊ីស្រាអែល ៖ សេដ្ឋកិច្ចរបស់ប្រទេសអ៊ីស្រាអែលបានធ្លាក់ចុះក្នុងត្រីមាសទី ២ ឆ្នាំ២០២៥ ចាប់ខែមេសាដល់ខែមិថុនា ខណៈដែលសង្គ្រាមរយៈពេល១២ថ្ងៃរបស់ពួកគេជាមួយប្រទេសអ៊ីរ៉ង់បានធ្វើឱ្យមានការបិទទាំងស្រុងលើអាជីវកម្មជាច្រើន។ ការិយាល័យកណ្តាលសម្រាប់ស្ថិតិរបស់អ៊ីស្រាអែល កាលពីថ្ងៃទី១៧ ខែសីហា…
ប្រទេសអ៊ីស្រាអែល ៖ សេដ្ឋកិច្ចរបស់ប្រទេសអ៊ីស្រាអែលបានធ្លាក់ចុះក្នុងត្រីមាសទី ២ ឆ្នាំ២០២៥ ចាប់ខែមេសាដល់ខែមិថុនា ខណៈដែលសង្គ្រាមរយៈពេល១២ថ្ងៃរបស់ពួកគេជាមួយប្រទេសអ៊ីរ៉ង់បានធ្វើឱ្យមានការបិទទាំងស្រុងលើអាជីវកម្មជាច្រើន។
ការិយាល័យកណ្តាលសម្រាប់ស្ថិតិរបស់អ៊ីស្រាអែល កាលពីថ្ងៃទី១៧ ខែសីហា បានរាយការណ៍ថា ផលិតផលក្នុងស្រុកសរុប ឬ GDP របស់ប្រទេសអ៊ីស្រាអែល បានធ្លាក់ចុះមកនៅ ៣,៥%។ តួលេខនេះ ទាបជាង ០,២% ពីការព្យាករណ៍ដោយអ្នកសេដ្ឋកិច្ចចំនួន ៦ រូបរបស់សារព័ត៌មាន Bloomberg។
អ៊ីស្រាអែលបានបើកការវាយប្រហារដ៏ភ្ញាក់ផ្អើលមួយលើប្រទេសអ៊ីរ៉ង់ កាលពីថ្ងៃទី១៣ ខែមិថុនា ឆ្នាំ២០២៥ នៅក្នុងការប៉ុនប៉ងបំផ្លាញទីតាំងនុយក្លេអ៊ែរ និងទីតាំងយោធាផ្សេងទៀតរបស់សាធារណរដ្ឋអ៊ីស្លាមមួយនេះ ដោយអ៊ីស្រាអែលអះអាងថាជាការគំរាមកំហែងអត្ថិភាព។ ជាការឆ្លើយតប អ៊ីរ៉ង់បានសងសឹកជាមួយការវាយប្រហារដោយមីស៊ីលផ្លោងដែលបានជំរុញឱ្យប្រជាជនអ៊ីស្រាអែលជាច្រើននាក់ភៀសខ្លួនទៅរកជម្រកសុវត្ថិភាព។
សង្គ្រាមប្រឆាំងនឹងអ៊ីរ៉ង់ដែលបានបញ្ចប់ដោយបទឈប់បាញ់ កាលពីថ្ងៃទី២៤ ខែមិថុនាបានធ្វើឱ្យខូចខាតដល់សេដ្ឋកិច្ច និងរំខានដល់ឧស្សាហកម្មសំខាន់ៗ ខណៈដែលកម្មកររាប់ពាន់នាក់ត្រូវបានកោះហៅឱ្យចូលបំពេញកាតព្វកិច្ចយោធា ដែលជាការប៉ះពាល់ដល់សកម្មភាពបុគ្គល និងអាជីវកម្ម។ សង្គ្រាមរបស់អ៊ីស្រាអែលជាមួយអ៊ីរ៉ង់បានជះឥទ្ធិពលដ៏ធំបំផុតទៅលើការចំណាយលើការប្រើប្រាស់ឯកជនដោយបានធ្លាក់ចុះ ៤,១% ការនាំចេញទំនិញ និងសេវាកម្មបានធ្លាក់ចុះ ៣,៥% ស្របពេលការចំណាយរបស់រដ្ឋាភិបាលបានធ្លាក់ចុះ ១% ។ ការវិនិយោគលើទ្រព្យសកម្មថេរក៏បានធ្លាក់ចុះ ១២,៣% ខណៈដែលទិន្នផលអាជីវកម្មក៏បានធ្លាក់ចុះ ៦,២% ។
ធនាគារកណ្តាលរបស់អ៊ីស្រាអែលបានព្យាករណ៍កំណើនសេដ្ឋកិច្ចសម្រាប់ឆ្នាំនេះ ចំនួន ៣,៣% ហើយក្រសួងហិរញ្ញវត្ថុបានបន្ទាបការព្យាករណ៍កំណើនប្រចាំឆ្នាំរបស់ខ្លួនមកនៅត្រឹម ៣,១% កាលពីសប្តាហ៍មុន។ ប៉ុន្តែដើម្បីសម្រេចបានគោលដៅទាំងនេះ សេដ្ឋកិច្ចនឹងត្រូវកើនឡើងខ្លាំងនៅក្នុងឆមាសទីពីរនៃឆ្នាំនេះ បើទោះបីជាអ៊ីស្រាអែលបានអះអាងថា ខ្លួនកំពុងរៀបចំដើម្បីកាន់កាប់តំបន់ហ្គាស្សា (Gaza) ក្នុងប៉ុន្មានសប្តាហ៍ខាងមុខនេះសម្រាប់គោលបំណងកម្ចាត់ក្រុមហាម៉ាស។
ប្រតិបត្តិការនេះ អាចនឹងជម្លៀសប្រជាជនប៉ាឡេស្ទីនប្រមាណ១លាននាក់ ហើយនឹងតម្រូវឱ្យមានការកោះហៅកងកម្លាំងបម្រុងរាប់ម៉ឺននាក់បន្ថែមទៀត ដែលទាំងនេះគឺជាបញ្ហាប្រឈមបន្ថែមទៀតដល់សេដ្ឋកិច្ចប្រទេសអ៊ីស្រាអែល៕ ដកស្រង់ ៖ Bloomberg, Times Of Israel និង NDTV Profit
ចែករំលែកព័តមាននេះ