សហរដ្ឋអាមេរិក ៖ ការស្ទង់មតិកាលពីពេលថ្មីៗនេះ បានរកឃើញថា ៥៤% នៃមនុស្សពេញវ័យនៅសហរដ្ឋអាមេរិកបានទទួលទានគ្រឿងស្រវឹង ដែលនេះគឺជាកម្រិតទាបបំផុត ហើយឥឡូវនេះប្រជាជនអាមេរិកជាច្រើននាក់បានចាត់ទុកថា ការទទួលទានគ្រឿងស្រវឹងមិនល្អចំពោះសុខភាពពួកគេ។ នេះបើតាមប្រភពពីទីភ្នាក់ងារសារព័ត៌មាន…
សហរដ្ឋអាមេរិក ៖ ការស្ទង់មតិកាលពីពេលថ្មីៗនេះ បានរកឃើញថា ៥៤% នៃមនុស្សពេញវ័យនៅសហរដ្ឋអាមេរិកបានទទួលទានគ្រឿងស្រវឹង ដែលនេះគឺជាកម្រិតទាបបំផុត ហើយឥឡូវនេះប្រជាជនអាមេរិកជាច្រើននាក់បានចាត់ទុកថា ការទទួលទានគ្រឿងស្រវឹងមិនល្អចំពោះសុខភាពពួកគេ។ នេះបើតាមប្រភពពីទីភ្នាក់ងារសារព័ត៌មាន AP និង Euronews បានចេញផ្សាយ។
ការស្ទង់មតិដែលឡើងដោយក្រុមហ៊ុន Gallup កាលពីខែកក្កដាកន្លងទៅ បានបង្ហាញថា ភាគរយខ្ពស់នៃមនុស្សពេញវ័យនៅសហរដ្ឋអាមេរិកចំនួន ៥៣% ឥឡូវនេះ បានអះអាងថា ការទទួលទានគ្រឿងស្រវឹងកម្រិតមធ្យម គឺអាក្រក់ដល់សុខភាពរបស់ពួកគេ ដែលជាការកើនឡើងពីត្រឹម ២៨% ពីការស្ទង់មតិមុន។ ដូច្នេះនៅពេលដែលការព្រួយបារម្ភអំពីផលប៉ះពាល់សុខភាពកើនឡើង ប្រជាជនអាមេរិកតិចជាងមុនកំពុងរាយការណ៍អំពីការ ទទួលទានគ្រឿងស្រវឹងរបស់ពួកគេ។
ការស្ទង់មតិបានរកឃើញថា ៥៤% នៃមនុស្សពេញវ័យនៅអាមេរិកបានអះអាងថា ពួកគេទទួលទានភេសជ្ជៈមានជាតិអាល់កុលដូចជា ស្រា Liquor ស្រាក្រហម ឬស្រាបៀរ ដែលនេះគឺជាកម្រិតទាបបំផុត ចាប់តាំងពីការស្ទង់មតិត្រូវបានធ្វើឡើងជាលើកដំបូងក្នុងឆ្នាំ១៩៣៩។
ជាមួយគ្នានោះ រដ្ឋាភិបាលសហព័ន្ធអាមេរិកកំពុងតែធ្វើបច្ចុប្បន្នភាពការណែនាំអំពីរបបអាហារថ្មី រួមទាំងអ្នកឧស្សាហ៍ទទួលទានគ្រឿងស្រវឹងផងដែរ ដោយរដ្ឋាភិបាលអាមេរិកត្រូវបានរំពឹងថា នឹងចេញផ្សាយគោលការណ៍ណែនាំថ្មីនៅចុងឆ្នាំនេះ។ មុនពេលផ្ទុះជំងឺរាតត្បាតកូវីដ១៩ ទិន្នន័យពីរដ្ឋាភិបាលសហព័ន្ធមួយចំនួនបានបង្ហាញថា ការទទួលទានគ្រឿងស្រវឹងនៅសហរដ្ឋអាមេរិកកំពុងមាននិន្នាការកើនឡើង។ ទោះយ៉ាងណាក៏ដោយ ការស្ទង់មតិមួយចំនួនផ្សេងទៀតបានបង្ហាញពីការថយចុះនៃការទទួលទានគ្រឿងស្រវឹង ជាពិសេសក្នុងចំណោមក្មេងជំទង់ និងយុវវ័យ ដោយសារពួកគេបានដឹងច្បាស់អំពីហានិភ័យនៃគ្រឿងស្រវឹង។
ខណៈពេលការទទួលទានគ្រឿងស្រវឹងកម្រិតមធ្យមត្រូវបានគិតថា មិនប៉ះពាលដល់សុខភាព និងមានអត្ថប្រយោជន៍សម្រាប់សុខភាពបេះដូងនោះ អ្នកជំនាញផ្នែកសុខភាពក្នុងប៉ុន្មានឆ្នាំថ្មីៗនេះ បានចង្អុលបង្ហាញអំពីភស្តុតាងដ៏ច្រើនលើសលប់ដែលបានបង្ហាញថា ការទទួលទានគ្រឿងស្រវឹងនាំទៅរកលទ្ធផលអវិជ្ជមានចំពោះសុខភាព ហើយក៏ជាមូលហេតុចម្បងឈានទៅរកជំងឺមហារីក។
សរុបមក បើតាមការស្ទង់មតិពី Gallup បានបង្ហាញថា ប្រជាជនអាមេរិកប្រហែល១ភាគ៤នៃអ្នកទទួលទានគ្រឿងស្រវឹងបាននិយាយថា ពួកគេបានទទួលទានគ្រឿងស្រវឹងនៅក្នុងរយៈពេល២៤ម៉ោងមុន ដែលជាកំណត់ត្រាទាបមួយក្នុងការស្ទង់មតិ។ អំឡុងពេលការស្រង់ស្ថិតិនោះ ប្រហែល៤នាក់ក្នុងចំណោម១០នាក់បានអះអាងថាវាមានរយៈពេលជាង១សប្តាហ៍ហើយ ចាប់តាំងពីពួកគេបានទទួលទានគ្រឿងស្រវឹងលើកចុងក្រោយ មានន័យថា ជាង១សប្តាហ៍មកហើយ ដែលពួកគេមិនបានទទួលទានគ្រឿងស្រវឹង៕
ចែករំលែកព័តមាននេះ