ទីក្រុងសេអ៊ូល ៖ ក្រុមហ៊ុននៅកូរ៉េខាងត្បូងមួយចំនួនបានព្យាករណ៍ថា ប្រទេសចិនអាចនឹងវ៉ាដាច់ប្រទេសកូរ៉េខាងត្បូង នៅក្នុងការប្រកួតប្រជែងលើឧស្សាហកម្មនាំចេញសំខាន់ៗចំនួន ១០ មុខ រួមមានទាំង ឧបករណ៍អេឡិចត្រូនិក គ្រឿងអេឡិចត្រូនិច…
ទីក្រុងសេអ៊ូល ៖ ក្រុមហ៊ុននៅកូរ៉េខាងត្បូងមួយចំនួនបានព្យាករណ៍ថា ប្រទេសចិនអាចនឹងវ៉ាដាច់ប្រទេសកូរ៉េខាងត្បូង នៅក្នុងការប្រកួតប្រជែងលើឧស្សាហកម្មនាំចេញសំខាន់ៗចំនួន ១០ មុខ រួមមានទាំង ឧបករណ៍អេឡិចត្រូនិក គ្រឿងអេឡិចត្រូនិច រថយន្ត ការសាងសង់កប៉ាល់ និងអាគុយ នៅក្នុងរយៈពេល ៥ ឆ្នាំខាងមុខ។ នេះបើតាមការស្ទង់មតិមួយបានបង្ហាញកាលពីថ្ងៃទី១៧ ខែវិច្ឆិកា ឆ្នាំ២០២៥ និងត្រូវបានចេញផ្សាយដោយសារព័ត៌មាន Korea Herald និង Korea Times។
សហព័ន្ធឧស្សាហកម្មកូរ៉េ (FKI) បានស្ទង់មតិក្រុមហ៊ុនឈានមុខគេចំនួន ២០០ នៅទូទាំងវិស័យនាំចេញកំពូលៗ របស់ប្រទេសកូរ៉េខាងត្បូង ដោយវាយតម្លៃពិសេសលើការប្រកួតប្រជែងរបស់ពួកគេជាមួយនឹងប្រទេសចិន សហរដ្ឋអាមេរិក និងជប៉ុន។ ការស្ទង់ធ្វើឡើងលើបណ្តាក្រុមហ៊ុនផលិតផលពាក់កណ្តាលសម្រេច (Semiconductor) អេក្រង់ គ្រឿងអេឡិចត្រូនិច រួមទាំងកុំព្យូទ័រ ឧបករណ៍ទូរស័ព្ទចល័ត ឧបករណ៍ប្រើប្រាស់ក្នុងផ្ទះ រថយន្ត គ្រឿងបន្លាស់រថយន្ត គ្រឿងចក្រទូទៅ ការសាងសង់កប៉ាល់ អាគុយ គីមីឥន្ធនៈ ផលិតផលប្រេងកាត ព្រមទាំងសុខភាពជីវសាស្ត្រ។
យោងតាមការស្ទង់មតិបានបង្ហាញថា ក្រុមហ៊ុនចិនបានវ៉ាដាច់ក្រុមហ៊ុនកូរ៉េខាងត្បូងរួចហើយ នៅក្នុងឧស្សាហកម្មនាំចេញសំខាន់ៗចំនួន ៥ គិតត្រឹមឆ្នាំ ២០២៥ ដោយដែកថែបឈរនៅកំពូល បន្ទាប់មកគ្រឿងចក្រទូទៅ អាគុយ អេក្រង់ និងរថយន្ត គ្រឿងបន្លាស់រថយន្ត។ ទោះយ៉ាងណាក៏ដោយ ចិននៅតែនាំមុខបន្តិចបន្តួចលើកូរ៉េខាងត្បូងសម្រាប់ឧស្សាហកម្មទាំង ៥ នៅឆ្នាំនេះ ប៉ុន្តែនៅពេលបណ្តាក្រុមហ៊ុនព្យាករណ៍ដល់ឆ្នាំ ២០៣០ គ្រប់វិស័យទាំងអស់ត្រូវបានរំពឹងថានឹងធ្លាក់ចុះ ហើយនៅពីក្រោយគូប្រជែងចិន។
នៅពេលត្រូវបានសួរឱ្យវាយតម្លៃពីភាពប្រកួតប្រជែងរបស់សហរដ្ឋអាមេរិក ចិន និងជប៉ុន បើធៀបទៅនឹងកូរ៉េខាងត្បូង ស្ថិតក្នុងកម្រិតមូលដ្ឋាន ១០០ ពិន្ទុ ក្រុមហ៊ុនទាំងនោះបានវាយតម្លៃសហរដ្ឋអាមេរិកនៅ ១០៧,២ ពិន្ទុ ចិននៅ ១០២,២ ពិន្ទុ និងជប៉ុននៅ ៩៣,៥ ពិន្ទុ នៅក្នុងឆ្នាំនេះ។ ចំណែកនៅឆ្នាំ ២០៣០ ក្រុមហ៊ុនកូរ៉េទាំងនោះបានព្យាករណ៍ថា តួលេខនឹងកើនឡើង ដោយសហរដ្ឋអាមេរិកនៅ ១១២,៩ ពិន្ទុ ចិននៅ ១១២,៣ ពិន្ទុ និងជប៉ុននៅ ៩៥ ពិន្ទុ។
FKI បានលើកឡើងក្នុងសេចក្តីថ្លែងការណ៍មួយថា ក្រុមហ៊ុនក្នុងស្រុកជឿថា ភាពប្រកួតប្រជែងរបស់សាជីវកម្មកូរ៉េខាងត្បូងបានធ្លាក់ចុះនៅពីក្រោយសហរដ្ឋអាមេរិក និងចិនរួចហើយ ដោយគម្លាតនឹងកាន់តែបន្តបន្ថែមទៀតក្នុងរយៈពេល ៥ ឆ្នាំខាងមុខ។ ជាមួយគ្នានោះ ភាពប្រកួតប្រជែងរបស់សាជីវកម្មចិន ត្រូវបានរំពឹងថានឹងឈានដល់កម្រិតស្មើនឹងសហរដ្ឋអាមេរិកក្នុងរយៈពេលដូចគ្នា។
ក្រុមហ៊ុនទាំងនោះ បានជ្រើសរើសចិនជាដៃគូប្រកួតប្រជែងនាំចេញកំពូលរបស់កូរ៉េខាងត្បូងនៅឆ្នាំនេះ ដោយលទ្ធផលស្ទង់មតិ ៦២,៥% ជ្រើសរើសចិន បន្ទាប់មកគឺអាមេរិក ២២,៥% និងជប៉ុន ៩,៥%។ ចំណែកនៅឆ្នាំ ២០៣០ ចំណែកទីផ្សាររបស់ចិនត្រូវបាន ព្យាករណ៍ថានឹងកើនឡើងដល់ ៦៨,៥% ខណៈដែលអាមេរិកត្រូវបានរំពឹងថានឹងធ្លាក់ចុះមកត្រឹម ២២% និងជប៉ុនមកត្រឹម ៥%។
ក្រុមហ៊ុនទាំងនោះបានលើកឡើងថា ប្រទេសចិនមានលទ្ធផលល្អជាងកូរ៉េខាងត្បូងភាគច្រើនក្នុងការប្រកួតប្រជែងផ្នែកតម្លៃ ផលិតភាព ការគាំទ្រពីរដ្ឋាភិបាល ទេពកោសល្យជំនាញ និងបច្ចេកវិទ្យាស្នូល។ ចំណែកឯសហរដ្ឋអាមេរិកមានលទ្ធផលល្អជាងកូរ៉េខាងត្បូងនៅគ្រប់វិស័យទាំងអស់ ទាំងការផ្សព្វផ្សាយផលិតផល ទេពកោសល្យជំនាញ ផលិតភាព បច្ចេកវិទ្យាស្នូល ការគាំទ្រពីរដ្ឋាភិបាល និងការប្រកួតប្រជែងផ្នែកតម្លៃផងដែរ ដោយគម្លាតនេះ ត្រូវបានរំពឹងថានឹងពង្រីកបន្ថែមទៀតនៅឆ្នាំ ២០៣០៕ ប្រភព ៖ Korea Herald
ចែករំលែកព័តមាននេះ