ខេត្តតាកែវ ៖ រឿងរ៉ាវមួយ ត្រូវបានស្ត្រីម្នាក់ដែលជាម្ចាស់ហាងទូរស័ព្ទ១កន្លែង ស្ថិតនៅភូមិកំពង់ហ្លួង ឃុំអង្គរបុរី ស្រុកអង្គរបុរី ខេត្តតាកែវ ត្រូវបានបុរសម្នាក់ដែលស្លៀកពាក់ឯកសណ្ឋានជាមន្ត្រីនគរបាល បានទូរស័ព្ទគំរាមមកលើរូបគាត់ថា…
ខេត្តតាកែវ ៖ រឿងរ៉ាវមួយ ត្រូវបានស្ត្រីម្នាក់ដែលជាម្ចាស់ហាងទូរស័ព្ទ១កន្លែង ស្ថិតនៅភូមិកំពង់ហ្លួង ឃុំអង្គរបុរី ស្រុកអង្គរបុរី ខេត្តតាកែវ ត្រូវបានបុរសម្នាក់ដែលស្លៀកពាក់ឯកសណ្ឋានជាមន្ត្រីនគរបាល បានទូរស័ព្ទគំរាមមកលើរូបគាត់ថា ត្រៀមខ្លួនដេកគុកឱ្យហើយទៅ បើអញធ្វើនាងឯងមិនបានទេ ហើយក៏មានពាក្យប្រមាថទៀតថា អញសម្លាប់មនុស្សរាប់ភ្លេចហើយ បើសម្លាប់មួយទៀតក៏អត់បញ្ហាដែរ ។
ស្ត្រីដែលរងការគំរាមកំហែងដ៏ធ្ងន់ធ្ងរនេះឈ្មោះ លឹម ឡៃហុន រស់នៅភូមិឃុំខាងលើ ។ ហេតុការណ៍នេះកើតឡើងកាលពីថ្ងៃទី១៥ ខែសីហា ឆ្នាំ២០២៥ បានធ្វើឲ្យរូបគាត់ភ័យខ្លាចយ៉ាងខ្លាំង ស្នើសុំឲ្យក្រសួងមហាផ្ទៃ និងអគ្គស្នងការនគរបាលជាតិ មេត្តាចាត់វិធានការលើបុគ្គលរូបនេះតាមច្បាប់ និងតាមវិន័យរបស់កងកម្លាំង ។
ស្ត្រីខាងលើបានឲ្យដឹងថា បុគ្គលរូបនេះ បានប្រើប្រាស់លេខទូរស័ព្ទ ០៩៧ ៦១០ ១៥១៥ បានទូរស័ព្ទមកគំរាមលើគាត់ និងលេខទូរស័ព្ទ១ខ្សែទៀតតាមតេឡេក្រាម ឃើញថា បុរសរូបនេះមានពាក់ឯកសណ្ឋានប៉ូលិស តែមិនដឹងនៅអង្គភាពណានោះទេ ។
ជុំវិញករណីនេះផងដែរ អ្នកនាំពាក្យនៃស្នងការដ្ឋាននគរបាលខេត្តតាកែវ បានឱ្យអ្នកកាសែតដឹងនៅព្រឹកថ្ងៃទី១៧ ខែសីហា ឆ្នាំ២០២៥ ថា លោកមិនស្គាល់ទេ ។ ដោយឡែក លោក ឆេង រតនៈ ស្នងការរងផែនធនធានមនុស្សនៃស្នងការដ្ឋាននគរបាលខេត្ត ក៏បានបញ្ជាក់ឲ្យដឹង នាព្រឹកដដែលនោះថា បុរសដែលពាក់ឯកសណ្ឋានជាប៉ូលិសខាងលើនេះ ពុំមែនជាមន្ត្រីនគរបាលនៅតាកែវយើងនេះទេ លោកអត់ដែលស្គាល់ទេ ។
ស្ត្រីរងគ្រោះខាងលើបានបញ្ជាក់ថា តាមការពិនិត្យជាក់ស្ដែង បុរសខាងលើ ប្រើលេខទូរស័ព្ទមួយខ្សែទៀត ០៩៧ ២១៣ ១៥៩៩ និងមានឈ្មោះលើតេឡេក្រាម នួន បូរ៉ា Nuon Bo Ra(ក្លេង) តែមិនដឹងថា ធ្វើជាប៉ូលិសនៅអង្គភាពណាទេ តែងតែឃើញពាក់ឯកសណ្ឋានជិះរថយន្តចេញ-ចូលនៅស្រុកអង្គរបុរី និងច្រកភ្នំដិន ។
អ្នកស្រី លឹម ឡៃហុន ក៏បានទៅដាក់ពាក្យបណ្ដឹងនៅអធិការដ្ឋាននគរបាលស្រុកអង្គរបុរីរួចហើយ ដើម្បីឲ្យសមត្ថកិច្ចចាត់វិធានការតាមផ្លូវច្បាប់ និងការពារសុវត្ថិភាពអ្នកស្រី ដោយសារតែការគំរាមនេះ ។
ជុំវិញករណីនេះ នគរបាលព្រហ្មទណ្ឌស្រុកអង្គរបុរីបានបញ្ជាក់ថា អ្នកស្រី លឹម ឡៃហុន បានមកដាក់ពាក្យបណ្ដឹងពិតមែន ពាក់ព័ន្ធនឹងករណីគំរាមកំហែង និងគំរាមសម្លាប់ ។ លោកបានបញ្ជាក់ថា លោកក៏បានដឹង បានឃើញបុគ្គលខាងលើ តែងតែជិះរថយន្តឡិចស៊ីសRX៣៣០ ពាក់ផ្លាកលេខ ន.ប និងឯកសណ្ឋានប៉ូលិសចេញចូលនៅស្រុកអង្គរបុរីដែរ ដោយបុគ្គលខាងលើមានទំនាក់ទំនងជាមួយនារីម្នាក់ ជាអ្នករកស៊ីលក់ជី តែពេលនេះបានដាច់គ្នាហើយ ។
ជុំវិញករណីខាងលើនេះដែរ លោក ជួន សុវាន់មន្នី ជាអធិការរងទទួលផែនព្រហ្មទណ្ឌស្រុកអង្គរបុរីបានឲ្យដឹងថា លោកពិតជាបានទទួលពាក្យបណ្តឹងពីអ្នកស្រី លឹម ឡៃហុន ដូចការរៀបរាប់ខាងលើពិតមែន ។
ការព្យាយាមធ្វើការទាក់ទងសុំការបំភ្លឺទៅមន្ត្រីប៉ូលិសដែលជាប់ចោទ លោក នួន បូរ៉ា បានប្រាប់ថា ដើមហេតុដែលធ្វើឲ្យលោកគំរាមសម្លាប់អ្នកស្រី លឹម ឡៃហុន ដោយសាលោកបានឲ្យប្អូនយកទូរសព្ទ័ទៅបញ្ចាំនៅក្នុងហាងរបស់អ្នកស្រី(ឡៃហុន) ១ ២០០ ០០០រៀល ហើយលោកបានបាត់ឯកសារដែលដាក់បញ្ចាំ ។ ពេលទៅលស់យកទូរស័ព្ទវិញមិនបាន ដោយអ្នកស្រីម្ចាស់ហាងថា ចាំគ្រប់១ខែចាំមកលស់យកវិញ ។
លោក នួន បូរ៉ា បានឲ្យដឹងទៀតថា លោកក៏រង់ចាំគ្រប់១ខែ ទើបទៅលស់យកទូរស័ព្ទវិញ តែមិនទាន់គ្រប់១ខែផង ស្រាប់តែបែកធ្លាយរូបអាសអាភាសមានក្នុងទូរស័ព្ទលោក ត្រូវបានគេចែកចាយតាមឆាតព្រោងព្រាត ធ្វើឲ្យលោកខឹងសម្បា ក៏បានទូរស័ព្ទទៅអ្នកស្រី លឹម ឡៃហុន និងបានប្រើពាក្យមិនសមរម្យពិតមែន ។
បញ្ហានៅត្រង់ថា ហេតុអ្វីបានជារូបភាពមិនសមរម្យនៅក្នុងទូរស័ព្ទរបស់លោក (នួន បូរ៉ា) ត្រូវបានបែកធ្លាយ និងស្នើសមត្ថកិច្ចជំនាញមេត្តាស្រាវជ្រាវរកអ្នកដើមហេតុ ដែលធ្វើឱ្យបែកធ្លាយរូបភាពយកមកផ្តន្តាទោសតាមផ្លូវច្បាប់ ៕
ចែករំលែកព័តមាននេះ