រាជធានីភ្នំពេញ ៖ នៅសល់រយៈពេលតែ៥ខែទៀតប៉ុណ្ណោះយុវជនដែលជាកម្មកររោងចក្រម្នាក់និងចូលរោងការហើយ ប៉ុន្តែជាអកុសលឆ្លៀតពេលទំនេរពីការងារ យុវជនរូបនេះបានទៅអូសត្រីជាមួយមិត្តភក្ដិចំនួន៤នាក់ទៀតនៅចំណុចវាលស្រែជម្រៅមួយកន្លែង ដែលមានរណ្ដៅដីស្ថិតនៅកណ្ដាលដើម្បីរកត្រីធ្វើម្ហូប ។ ប៉ុន្តែដោយសារតែវាលស្រែនោះមានទឹកល្ហាចល្ហ មើលមិនដឹងថាមានរណ្ដៅដីនោះឡើយ ហើយក៏ធ្លាក់ចូលទៅផុតជើងផុតដៃ បណ្ដាលឲ្យយុវជននេះលង់លិចបាត់ទៅក្នុងទឹកតែម្ដង ។ សាកសពបានស្ថិតនៅក្នុងទឹកនោះពេញ១យប់ លុះព្រឹកឡើង ទើបក្រុមរុករកនិងសង្គ្រោះកងពលតូចទ័ពពិសេសឆ័ត្រយោងលេខ៩១១ ទៅរាវរកដោយប្រើពេលជាង២ម៉ោង ទើបរកសពឃើញស្រង់ឡើងគោកប្រគល់ជូនក្រុមគ្រួសារធ្វើបុណ្យតាមប្រពៃណី ។ គួររំលឹកថា បុរស៥នាក់នាំគ្នាចុះរកត្រី ស្រាប់តែល.ង់បា.ត់ខ្លួនម្នាក់ រកមិនទាន់ឃើញ
ហេតុការណ៍នេះបានកើតឡើងបង្កឲ្យមានការភ្ញាក់ផ្អើលឡេីង កាលពីវេលា៤និង៣០នាទីល្ងាចថ្ងៃទី១៧ ខែសីហាឆ្នាំ២០២៥ ចំណុចវាលស្រែជម្រៅមួយកន្លែងដែលមានរណ្ដៅដីនៅកណ្ដាល ស្ថិតនៅក្នុងភូមិម្ភៃបួន (ភូមិវ៉ាំងកាត់) សង្កាត់ព្រៃស ខណ្ឌដង្កោ រាជធានីភ្នំពេញ ។
បើតាមសាច់ញាតិបាននិយាយថាយុវជនរងគ្រោះខាងលើឈ្មោះធី ធាយ ហៅឆាយ អាយុ២២ឆ្នាំ មុខរបរកម្មកររោងចក្រ ស្នាក់នៅផ្ទះជួលម្ដុំជិតវត្តហា ភូមិពាម សង្កាត់ព្រៃ ខណ្ឌដង្កោ រាជធានីភ្នំពេញ និងមានស្រុកកំណើត ភូមិស្ពឺ (ខ) ឃុំចាន់រ៉ា(ក )ស្រុកបាភ្នំ ខេត្តព្រៃវែង ។ យុវជនរូបនេះទើបភ្ជាប់ពាក្យជាមួយគូដណ្ដឹងរួច និងត្រូវចូលរោងការនាអំឡុងខែមករា ឆ្នាំ២០២៦ ខាងមុខហើយ ស្រាប់តែពេលនេះជួបគ្រោះអកុសលដល់ស្លាប់តែម្ដង ។
សមត្ថកិច្ចបានប្រាប់ថា នៅមុនពេលកេីតហេតុ ក្រោយពេលចេញពីធ្វើការងារ យុវជនរងគ្រោះរួមជាមួយនិងយុវជន៤នាក់ទៀតដែលជាមិត្តភក្តិ បាននាំគ្នាជិះម៉ូតូទៅអូសត្រីនៅចំណុចវាលស្រែជម្រៅខាងលើ ដើម្បីយកទៅធ្វើម្ហូប ។ លុះពេលទៅដល់យុវជនរងគ្រោះរួមនិងមិត្តភក្ដិ២នាក់បានចុះទៅក្នុងទឹកអូសត្រី ចំណែក២នាក់ទៀតអង្គុយចាំមើលម៉ូតូនៅលើគោក ហើយទីនោះមានទឹកល្ហាចល្ហមិនអាចមើលដឹងថាមានរណ្ដៅដីនៅកណ្ដាលឡើយ ។
សមត្ថកិច្ចបានប្រាប់ឲ្យដឹងបន្តទៀតថា ខណៈនោះផងដែរយុវជនរងគ្រោះជាអ្នកកាន់ប៊ីដុងចំណុះ៣០លីត្រមួយដែលកាត់រួចសម្រាប់ដាក់ត្រីដែលអូសបាន ហើយរូបគេអត់ចេះហែលទឹកនោះទេ លុះពេលទៅអូសទៅដល់កណ្ដាលវាលស្រែក៏បានធ្លាក់ចូលរណ្ដៅដីផុតជើងផុតដៃ ។ ពេលនោះយុវជនរងគ្រោះខាងលើបានស្រែកឲ្យមិត្តភក្ដិជួយដែរ ប៉ុន្តែមិត្តភក្ដិ២នាក់ដែលកំពុងអូសត្រីជាមួយចេះហែលទឹក មិនអាចជួយបានឡើយ គឺម្នាក់ៗខំប្រឹងហែលចេញឲ្យផុតពីរណ្ដៅដីនោះរួចឡើងគោកយកតែរួចខ្លួនប៉ុណ្ណោះ ។
សមត្ថកិច្ចបានប្រាប់ឲ្យដឹងបន្តទៀតថា ដោយឡែកមិត្តភក្ដិ២នាក់ទៀតដែលនៅលើគោកក៏មិនអាចជួយបសនដែរ ព្រោះនៅឆ្ងាយចម្ងាយប្រមាណ១០០ម៉ែត្រពីគ្នាឯណោះ ហើយយុវជនរងគ្រោះ ក៏បានលង់លិចបាត់ទៅក្នុងទឹកគួរឲ្យអាសូរក្នុងគ្រានោះតែម្ដងទៅ ។ ក្រោយពេលមានហេតុការណ៍បែបនេះកើតឡើង ក្រុមគ្រួសារនិងនគរបាលប៉ុស្តិ៍ព្រៃសបានចុះទៅកាន់ទីនោះ ប៉ុន្តែមិនមានមធ្យោបាយដើម្បីស្វែងរកសាកសពជនរងគ្រោះឃើញឡើយ ។
ប្រភពដដែលបានប្រាប់បន្ថែមថា រហូតដល់វេលាព្រឹកថ្ងៃទី១៨ ខែសីហា ឆ្នាំ២០២៥ ទើបស្នើរសុំទៅកាន់ក្រុមរុករក និងសង្គ្រោះកងពលតូចទ័ពពិសេសឆ័ត្រយោងលេខ៩១១ ទៅរាវរក ។ ខណៈនោះបានប្រើពេលជាង២ម៉ោង គឺចាប់ពីវេលាម៉ោង៨ រហូតដល់វេលាម៉ោង១០និង៣០នាទីព្រឹកថ្ងៃដដែល ទើបរកឃើញសព រួចស្រង់ឡើងគោក ប្រគល់ជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ