ខេត្តកំពង់ឆ្នាំង ៖ លោកប្រាក់ សោភ័ណ្ឌ នាយកសាខាកាកបាទក្រហមខេត្តរួមដំណើរដោយលោកស្រីសាត ស៊ុនលី អនុសាខាកាកបាទក្រហមស្រុករលាប្អៀរ កាលពីព្រឹកថ្ងៃទី១២ ខែកក្កដា បានអញ្ជើញទៅត្រួតពិនិត្យមើលការជួសជុលផ្ទះរបស់លោកយាយ សួស ថន អាយុ៨៥ឆ្នាំដែលកំពុងរស់យ៉ាងវេទនាមានជំងឺប្រចាំកាយជាមួយប្អូនស្រីសួស ធឿង អាយុ៦៥ឆ្នាំ នៅភូមិត្រពាំងគ ឃុំជ្រៃបាក់ ស្រុករលាប្អៀរ។
លោកប្រាក់ សោភ័ណ្ឌ មានប្រសាសន៍ថា ដោយមើលឃើញពីទុក្ខលំបាករបស់លោកយាយ២នាក់បងប្អូនដែលសារព័ត៌មានកោះសន្តិភាពបានចុះផ្សាយកន្លងមកទើបលោកបណ្ឌិតទូច ម៉ារីម ប្រធានកិត្តិយសសាខាកាកបាទក្រហមខេត្ត និងលោកអ៊ុន សំអុល ប្រធានគណៈកម្មាធិការសាខាកាកបាទក្រហមខេត្តបានណែនាំដល់សាខាកាកបាទក្រហមខេត្តក៏ដូចជាអនុសាខាកាកបាទក្រហមស្រុករលាប្អៀរឱ្យជួយជួសជុលផ្ទះលោកយាយទាំងពីរនាក់ដែលដំបូលធ្លុះធ្លាយ ជញ្ជាំងទទេ ពេលភ្លៀងរកកន្លែងជ្រកគ្មាន។ ក្រោយការជួសជុលហើយបានជួយតរានហាលមកមុខផ្ទះបន្ថែមប្រហែល១,៥០ម៉ែត្រសម្រាប់លោកយាយទាំងពីរ។ ហើយការចំណាយជួសជុល និងធ្វើរានហាលបន្ថែមនេះគឺអនុសាខាកាកបាទក្រហមស្រុករលាប្អៀរជាអ្នកចេញទាំងអស់។
លោកបន្ថែមថា ក្រោយពីធ្វើ និងជួសជុលផ្ទះនេះរួចរាល់ហើយ លោកសន្យានឹងជួយធ្វើអណ្តូងទឹកស្នប់មួយគ្រឿងជូនលោកយាយទាំងពីរនាក់ទៀតផង ។ ក្រៅពីនឹងលៃលកមុខរបរសមស្របណាមួយជូនលោកយាយសួស ធឿន ជាប្អូនសម្រាប់ចិញ្ចឹមជីវិត និងបងស្រីសួស ថន ។ នេះគ្រាន់តែជាការជួសជុលផ្ទះឱ្យនៅបណ្តោះអាសន្នទេ តាមគោលការណ៍កាកបាទក្រហមនឹងជួយធ្វើផ្ទះមួយខ្នងធំឱ្យសមរម្យ និងរឹងមាំល្អជាងនេះទៀត ដែលនឹងចាប់ផ្តើមសាងសង់ក្នុងពេលឆាប់ៗខាងមុខនេះ។
ជាមួយគ្នានេះកោះសន្តិភាពបានទទួលប្រាក់អំណោយចំនួន៤០ដុល្លារ និង៥ពាន់រៀលប្រគល់ដល់លោកយាយពីអាជីវករនៅផ្សារបឹងកេងកង មាន១-ឈ្មោះច័ន្ធ មន្នី លក់ទូរស័ព្ទដៃ, ២-ជាង ពៅ ជួសជុលទូរស័ព្ទ និង៣-ឈ្មោះនេត សុជាតិ ជួសជុលទូរស័ព្ទ៕
ចែករំលែកព័តមាននេះ