ទីក្រុងវ៉ាស៊ីនតោន៖ ថ្នាក់ដឹកនាំអឺរ៉ុបនឹងរួមដំណើរជាមួយលោកហ្សេឡិនស្គីទៅទីក្រុងវ៉ាស៊ីនតោនដើម្បីជួបលោកត្រាំ និងដើម្បីជួយជ្រោមជ្រែងគាត់ (ហ្សេឡិនស្គី) នៅក្នុងស្ថានភាពដែលអាមេរិកកំពុងជំរុញឱ្យអ៊ុយក្រែនទទួលយកកិច្ចព្រមព្រៀងសន្តិភាពជាប្រញាប់។ នៅក្នុងចំណោមថ្នាក់ដឹកនាំទាំងនោះមានអាល្លឺម៉ង់ បារាំង អង់គ្លេស អ៊ីតាលី និងហ្វាំងឡង់។ល។ អាល្លឺម៉ង់បញ្ជាក់ច្បាស់ៗថាខ្លួននៅតែបន្តគាំទ្រអ៊ុយក្រែនជានិច្ចទោះបីប្រទេសដទៃអាចនឹងដោះដៃចេញក៏ដោយ។
មួយថ្ងៃមុនពេលជួបលោកត្រាំ ថ្នាក់ដឹកនាំអាល្លឺម៉ង់រួមជាមួយបារាំង និងអង់គ្លេសបានរៀបចំកិច្ចជំនួបពិសេសមួយដើម្បីពង្រឹងជំហររបស់អ៊ុយក្រែន។ ពួកគេសង្ឃឹមថាចំណុចសំខាន់មួយគឺការធានាសន្តិសុខជាតិសម្រាប់អ៊ុយក្រែននឹងរំលេចឱ្យឃើញនៅក្នុងការចរចាគ្នា។ ពួកគេចង់ឃើញអាមេរិកចូលរួមចំណែកនៅក្នុងការធានាសន្តិសុខជាតិរបស់អ៊ុយក្រែន។
ប្រភពខ្លះបង្ហើបឱ្យដឹងថាលោកត្រាំ និងលោកពូទីនបានពិភាក្សាអំពីលទ្ធភាពដែលរុស្ស៊ីអាចនឹងកាត់ឆ្វៀលដីរបស់ខ្លួនមួយចំណែកណាមួយទៅឱ្យអ៊ុយក្រែនដើម្បីដូរគ្នាជាមួយអ៊ុយក្រែនវិញ។ បើពិនិត្យមើលត្រួសៗ ការទាមទាររបស់លោកពូទីនត្រង់ចំណុចខ្លះអ៊ុយក្រែនពិបាកទទួលយកជាទីបំផុត។
មូលហេតុដែលថ្នាក់ដឹកនាំអឺរ៉ុបចង់អមដំណើរលោកហ្សេឡិនស្គីទៅវ៉ាស៊ីនតោនព្រោះមិនចង់ឃើញការជជែកគ្នាតឹងសរសៃករវាងលោកត្រាំ និងលោកហ្សេឡិនស្គីកើតមានជាថ្មីទេ។ ប្រធានគណៈកម្មការអឺរ៉ុប លោកស្រីឡីយឹន ក៏អមដំណើរលោកហ្សេឡិនស្គីទៅវ៉ាស៊ីនតោនផងដែរ។ រដ្ឋាភិបាលអាល្លឺម៉ង់ចេញសេចក្ដីថ្លែងការណ៍របស់ខ្លួនថាកិច្ចពិភាក្សាគ្នាលើកនេះនឹងផ្ដោតសំខាន់លើការធានាសន្តិសុខជាតិ, បញ្ហាបូរណភាពទឹកដី និងការគាំទ្រអ៊ុយក្រែនដើម្បីតស៊ូនៅក្នុងសង្គ្រាម។
លោកត្រាំថ្លែងថាអ៊ុយក្រែនគួរតែទទួលយកកិច្ចព្រមព្រៀងបញ្ចប់សង្គ្រាមព្រោះច្បាំងមិនឈ្នះគេទេ រុស្ស៊ីជាមហាអំណាចដែលធំជាងអ៊ុយក្រែនឆ្ងាយណាស់។ ក្រោយកិច្ចជំនួបកំពូលនៅអាឡាស់ស្កា លោកត្រាំបានទូរស័ព្ទទៅលោកហ្សេឡិនស្គី និងជម្រាបជូនគាត់ថាលោកពូទីនសន្យាផ្អាកយុទ្ធនាការយោធានៅលើទីតាំងដែលយោធារបស់គាត់កំពុងឈរជើង។ ប៉ុន្តែអ៊ុយក្រែនត្រូវតែយល់ព្រមប្រគល់តំបន់ដូញែតទាំងមូលទៅឱ្យរុស្ស៊ី។ នេះជាតំបន់ឧស្សាហកម្មដែលរុស្ស៊ីចិញ្ចឹមចិត្តចង់បានជាយូរមកហើយ។
បន្ទាប់ពីឮដូច្នេះ លោកហ្សេឡិនស្គីប្រកែកយ៉ាងដាច់អហង្ការ។ សព្វថ្ងៃនេះ កងទ័ពរុស្ស៊ីកាន់កាប់ទឹកដីអ៊ុយក្រែនប្រហែល២០%។ ក្នុងនោះ ពួកគេកាន់កាប់តំបន់ដូញែត៧៥%។ តាមមើលទៅ លោកពូទីននៅតែមិនបោះបង់ចោលការទាមទាររបស់គាត់នោះទេ។ គាត់ថែមទាំងព្រមានទុកជាមុនថាអ៊ុយក្រែន និងអឺរ៉ុបមិនគួរយកជើងរាទឹកនៅក្នុងការចរចាគ្នាទេ៕
ចែករំលែកព័តមាននេះ