ទីក្រុងវ៉ាស៊ីនតោន៖ អង្គការណាតូបានចល័តយន្តហោះចម្បាំងរបស់ខ្លួនជាប្រញាប់បន្ទាប់ពីរុស្ស៊ីវាយប្រហាររយៈចម្ងាយឆ្ងាយទៅលើអ៊ុយក្រែនកាលពីយប់មិញ។ នៅក្នុងចំណោមប្រទេសដែលចល័តយន្តហោះនោះក៏មានប៉ូឡូញ និងស៊ុយអែតផងដែរ។ យោធាប៉ូឡូញប្រកាសនៅលើបណ្ដាញសង្គមថាកាលពីយប់ថ្ងៃទី១៨ឆ្លងចូលថ្ងៃទីឬ១៩ ឆ្នាំ២០២៥ រុស្ស៊ីវាយប្រហារដោយគ្រាប់មីស៊ីលទៅលើអ៊ុយក្រែនជាថ្មីម្ដងទៀត។
ដើម្បីការពារសុវត្ថិភាពដែនអាកាសរបស់ខ្លួន កងទ័ពប៉ូឡូញត្រូវតែប្រើប្រាស់វិធានការសរុប។ យន្តហោះរបស់ប៉ូឡូញ និងក្រុមសម្ព័ន្ធមិត្តក៏ចេញប្រតិបត្តិការសឹកភ្លាមៗតែម្ដង។ ប្រព័ន្ធការពារដែនអាកាស និងប្រព័ន្ធរ៉ាដាត្រូវបានដាក់ឱ្យប្រុងជើងការនៅក្នុងកម្រិតខ្ពស់បំផុត។ ប៉ូឡូញថ្លែងបន្តទៀតថាយន្តហោះចម្បាំងម៉ាកគ្រីបផឹន (Gripen) របស់ទ័ពអាកាសស៊ុយអែតបានចូលរួមចំណែកការពារសុវត្ថិភាពដែនអាកាសរបស់ប៉ូឡូញកាលពីយប់មិញ។
កាលពីយប់មិញដដែល អ៊ុយក្រែនអះអាងថារុស្ស៊ីបញ្ជូនដ្រូន២៨០គ្រឿងទៅវាយប្រហារ។ ក្នុងនោះ ដ្រូនម៉ាកសាហ៊ីតដែលផលិតនៅអ៊ីរ៉ង់មានចំនួន២៧០គ្រឿង។ ក្រៅពីនេះ រុស្ស៊ីប្រើប្រាស់មីស៊ីលម៉ាកអ៊ីស្កាន់ដឺ អឹម (Iskander-M) ចំនួន៥គ្រាប់ និងមីស៊ីលបណ្ដែតខេអេច ១០១ (KH-101) ចំនួន៥គ្រាប់។ គួរកត់សម្គាល់ថាការវាយប្រហារលើកនេះកើតឡើងចំពេលថ្នាក់ដឹកនាំអឺរ៉ុប អ៊ុយក្រែន និងលោកត្រាំជួបគ្នានៅសេតវិមានដើម្បីស្វែងរកដំណោះស្រាយបញ្ចប់សង្គ្រាម។ លោកពូទីនក៏បានសន្ទនាគ្នាតាមទូរស័ព្ទជាមួយលោកត្រាំផងដែរ៕
ចែករំលែកព័តមាននេះ