ទីក្រុងតូក្យូ៖ ថ្ងៃនេះ ប្រទេសជប៉ុនរំលឹកខួបទី៨០ឆ្នាំនៃការបិទបញ្ចប់សង្គ្រាមលោកលើកទី២ក្រោយការទម្លាក់គ្រាប់បែកនុយក្លេអ៊ែរ២គ្រាប់ទៅលើទីក្រុងហ៊ីរ៉ូស៊ីម៉ា និងណាហ្កាសាគី។ សមាជិកគណៈរដ្ឋមន្ត្រីជប៉ុនយ៉ាងតិចម្នាក់បានធ្វើដំណើរទៅវិហារយ៉ាស៊ូគូនីដើម្បីគោរពវិញ្ញាណក្ខន្ធអតីតយុទ្ធជប៉ុនជាង២,៥លាននាក់ដែលបានពលីជីវិតនៅក្នុងសង្គ្រាម។ នោះគឺរដ្ឋមន្ត្រីក្រសួងកសិកម្ម។
វិហារយ៉ាស៊ូគូនីមានទាំងរឿងល្អ និងរឿងអាក្រក់ព្រោះនៅក្នុងចំណោមនោះក៏មានមេទ័ពជប៉ុន១៤នាក់ដែលត្រូវប្រទេសជិតខាងដូចជាចិន កូរ៉េខាងជើង និងខាងត្បូងចាត់ទុកជាឧក្រិដ្ឋជន។ អ្នកទាំងនេះត្រូវតុលាការកាត់ទោស។ នាយករដ្ឋមន្ត្រីជប៉ុន លោកអ៊ីស៊ីបា ក៏ចូលរួមរំលឹកព្រឹត្តិការណ៍នេះផងដែរ ប៉ុន្តែលោកចូលរួមនៅក្នុងទីបូជនីយដ្ឋានដាច់ដោយឡែកមួយទៀតដោយមានព្រះចៅអធិរាជជប៉ុនណារូតុក៏យាងទៅចូលរួមផងដែរ។
ការទៅគោរពវិញ្ញាណក្ខន្ធនៅវិហារយ៉ាស៊ូគូនីជាបញ្ហារសើប។ អីចឹងហើយបានជាថ្នាក់ដឹកនាំរបស់ជប៉ុនកម្រិតនាយករដ្ឋមន្ត្រីមិនសូវហ៊ានទៅទីនោះទេ។ លើកលែងតែលោកស៊ីនហ្សូអាបេម្នាក់គត់ដែលទៅវិហារនេះកាលពីឆ្នាំ២០១៣ ហើយត្រូវលោកអូបាម៉ារិះគន់។ នាយករដ្ឋមន្ត្រីជប៉ុនបច្ចុប្បន្នថ្វីដ្បិតមិនបានអញ្ជើញទៅវិហារនោះដោយផ្ទាល់ លោកបានចាត់អ្នកតំណាងនាំយកតង្វាយទៅទីនោះ។ កាលពីពេលគាត់ទៅវិហារនោះកាលពីខែតុលា កូរ៉េខាងត្បូង និងចិនរិះគន់យ៉ាងខ្លាំង។
រដ្ឋមន្ត្រីការបរទេសចិន លោកវ៉ាងយី នៅថ្ងៃនេះមិនបាននិយាយបញ្ចេញឈ្មោះវិហារយ៉ាស៊ូគូនីទេ។ លោកថាមានតែការទទួលស្គាល់សច្ចភាពប្រវត្តិសាស្ត្រតែប៉ុណ្ណោះទើបអាចទទួលបានការគោរពពីអ្នកដទៃ, មានតែការរៀនសូត្រពីប្រវត្តិសាស្ត្រតែប៉ុណ្ណោះទើបអាចមានអនាគតកាន់តែប្រសើរ និងមានតែការចងចាំអតីតកាលតែប៉ុណ្ណោះទើបជៀសផុតពីប្រវត្តិសាស្ត្រច្រំដែន។ លោកសូមជំរុញឱ្យជប៉ុនប្រកាន់យកជម្រើសត្រឹមត្រូវ។
នៅក្នុងព្រឹត្តិការណ៍មួយទៀត រដ្ឋាភិបាលកូរ៉េខាងត្បូង «សម្ដែងការខកចិត្ត និងសោកស្ដាយយ៉ាងខ្លាំង» ដែលមានមន្ត្រីរដ្ឋាភិបាលជប៉ុនធ្វើដំណើរទៅគោរពវិញ្ញាណក្ខន្ធឧក្រិដ្ឋជននៅវិហារយ៉ាស៊ូគូនី។ កូរ៉េខាងត្បូងថ្លែងថាអនាគតនៃទំនាក់ទំនងប្រទេសទាំង២អាស្រ័យទៅលើជំហររបស់ជប៉ុនចេះសោកស្ដាយនូវទង្វើរបស់ខ្លួនពីអតីតកាល។ នេះបើយោងតាមសេចក្ដីថ្លែងការណ៍របស់ក្រសួងការបរទេសកូរ៉េខាងត្បូង។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ៕
ចែករំលែកព័តមាននេះ