ខេត្តកំពង់ស្ពឺ៖ បន្ទាប់ពីមានកូនរដូវប្រាំងចាប់ពីចុងខែកក្កដា ដល់ដើមខែសីហា ឆ្នាំ២០២៥ ធ្វើឱ្យស្រូវរបស់ប្រជាពលរដ្ឋប្រមាណជិត៣០០ហិកតា ត្រូវការទឹកសង្គ្រោះបន្ទាន់ ក៏ព្រោះតែស្រូវមានសភាពក្រៀមស្វិតបណ្តើរៗហើយ។ ជាក់ស្តែងកាលពីព្រឹក ថ្ងៃទី១៤ ខែសីហា…
ខេត្តកំពង់ស្ពឺ៖ បន្ទាប់ពីមានកូនរដូវប្រាំងចាប់ពីចុងខែកក្កដា ដល់ដើមខែសីហា ឆ្នាំ២០២៥ ធ្វើឱ្យស្រូវរបស់ប្រជាពលរដ្ឋប្រមាណជិត៣០០ហិកតា ត្រូវការទឹកសង្គ្រោះបន្ទាន់ ក៏ព្រោះតែស្រូវមានសភាពក្រៀមស្វិតបណ្តើរៗហើយ។
ជាក់ស្តែងកាលពីព្រឹក ថ្ងៃទី១៤ ខែសីហា ឆ្នាំ២០២៥នេះ លោក សេរី បណ្ឌិត អនុរដ្ឋលេខាធិការ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចុះពិនិត្យការងារអន្តរាគមន៍ទឹកសង្គ្រោះស្រូវប្រជាកសិករប្រមាណជិត ៣០០ហិកតា ស្ថិតក្នុងក្រុងច្បារមន និងស្រុកសំរោងទង នៃខេត្តកំពង់ស្ពឺ។
លោក អនុរដ្ឋលេខាធិការក្រសួងធនធានទឹកនិងឧតុនិយម បានមានប្រសាសន៍ឱ្យដឹងថា ក្នុងកិច្ចអន្តរាគមន៍ ក្រុមការងារក្រសួង និងមន្ទីរធនធានទឹក និងឧតុនិយមខេត្តកំពង់ស្ពឺ បានប្រើប្រាស់គ្រឿងចក្រដើម្បីសម្រួលផ្លូវទឹក និងប្រើម៉ាស៊ីនបូមទឹកចល័តកម្លាំង ៦៥សេស បូមបញ្ជូនទឹកពីស្ទឹងព្រែកត្នោត និងពីប្រឡាយមេរលាំងជ្រៃ បញ្ជូនទៅកាន់កន្លែងដែលមានតម្រូវការ។ ជាមួយគ្នានេះ ឯកឧត្តមអនុរដ្ឋលេខាធិការ បានបញ្ជាក់ថា ក្រុមការងារ បាននិងកំពុងអន្តរាគមន៍សង្គ្រោះស្រូវ ដែលប្រឈមការខ្វះខាតទឹក ដោយការយកចិត្តទុកដាក់ខ្ពស់ ព្រមទាំងធ្វើការដោះស្រាយឱ្យបានទាន់ពេលវេលា ដើម្បីអាចសង្គ្រោះស្រូវដែលរងការគំរាមកំហែងពីការខ្វះខាតទឹក ក្នុងកូនរដូវប្រាំងនេះ។
លោក អនុរដ្ឋលេខាធិការ បានបញ្ជាក់បន្ថែមពីការតាមដានដោយយកចិត្តទុកដាក់ជាប់ជាប្រចាំរបស់ក្រសួងធនធានទឹក និងឧតុនិយម លើការវិវត្តនៃគំរូអាកាសធាតុ ដើម្បីមានវិធានការ និងត្រៀមលក្ខណៈសម្រាប់កិច្ចអន្តរាគមន៍បានទាន់ពេលវេលា ព្រមទាំងបានពាំនាំនូវប្រសាសន៍ណែនាំដ៏ខ្ពង់ខ្ពស់របស់ឯកឧត្តមរដ្ឋមន្ត្រី ក្នុងការជំរុញឱ្យបងប្អូនប្រជាកសិករបន្តកិច្ចសហការឱ្យបានជិតស្និទ្ធជាមួយអាជ្ញាធរមូលដ្ឋាន និងមន្ទីររាជធានី-ខេត្តនីមួយៗ និងត្រូវអនុវត្តការងារស្រោចស្រពទៅតាមកាលវិភាគនៃបែងចែកទឹក ដើម្បីធានាបាននូវការប្រើប្រាស់ទឹកប្រកបដោយសមធម៌ និងប្រសិទ្ធភាពខ្ពស់៕
ចែករំលែកព័តមាននេះ