តុលាការបើកសវនាការសំណុំរឿងគ្រូមា និងបក្ខពួកពាក់ព័ន្ធទទួលសំណូក៣០ម៉ឺនដុល្លារចូលគយ
- ភ្នំពេញ
រាជធានីភ្នំពេញ ៖ កាលពីរសៀលថ្ងៃទី១៣ ខែសីហា ឆ្នាំ២០២៥ សាលាដំបូងរាជធានីភ្នំពេញ បានលើកយកសំណុំរឿងអតីតឧកញ៉ា លី សាម៉េត ហៅគ្រូមា…
រាជធានីភ្នំពេញ ៖ កាលពីរសៀលថ្ងៃទី១៣ ខែសីហា ឆ្នាំ២០២៥ សាលាដំបូងរាជធានីភ្នំពេញ បានលើកយកសំណុំរឿងអតីតឧកញ៉ា លី សាម៉េត ហៅគ្រូមា និងបក្ខពួក មកបើកសវនាការជំនុំជម្រះទោស ដែលជាប់ពាក់ព័ន្ធពីបទប៉ុនប៉ងសូកប៉ាន់ ពោលគឺស៊ីសំណូកប្រមាណ៣០ម៉ឺនដុល្លារអាមេរិក យកទៅរត់ការដើម្បីចូលក្របខណ្ឌគយ តែសម្ងំស៊ីដាច់ ព្រោះមិនបានជោគជ័យ ។ សវនាការនេះ បានធ្វើឡើងជាសាធារណ ដោយមានលោកស្រី យី សុខវួច ជាប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ ។
សវនាការបានធ្វើឡើងចំពោះមុខជនត្រូវចោទ៤នាក់ ៖
១-ឈ្មោះ លី សាម៉េត ហៅគ្រូមា
២-ឈ្មោះ មួង ឃីម
៣-ឈ្មោះ ឆាយ សុវណ្ណារី ហៅចែមួយ
៤-ឈ្មោះ ហ៊ើង ទិត្យរាត្រីលក្ខណ៍ ហៅស្រីមុំ
ជនត្រូវចោទសុទ្ធតែមានមេធាវីការពារក្តីរៀងៗខ្លួន ។
សវនាការបានសាកសួរដេញដោលរហូតដល់ទីបញ្ចប់ ប៉ុន្តែដោយវេលាល្ងាចប្រធានក្រុមប្រឹក្សា បានលើកពេលប្រកាសសាលក្រមផ្តន្ទាទោសលើជនជាប់ចោទទៅថ្ងៃក្រោយ ដោយមិនកំណត់ ។
សូមជម្រាបថា នារសៀលថ្ងៃទី២៩ ខែវិច្ឆិកា ឆ្នាំ២០២៤ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានប្រកាសព័ត៌មានទាក់ទងសំណុំរឿងសម្លកំពិសគ្រូមា លី សាម៉េត ថា មានស្ត្រី២នាក់ត្រូវបានអង្គភាពប្រឆាំងអំពើពុករលួយ ចាប់បញ្ជូនទៅស្ថាប័នអយ្យការសាលាដំបូងរាជធានីភ្នំពេញ ករណីនេះ តំណាងអយ្យការបានសម្រេចធ្វើការចោទប្រកាន់ជនសង្ស័យ៤នាក់ ៖
១-ឈ្មោះ ឆាយ សុវណ្ណារី ហៅចែមួយ
២-ឈ្មោះ ហ៊ើង ទិត្យរាត្រីលក្ខណ៍ ហៅស្រីមុំ
៣-ឈ្មោះ មួង ឃីម
៤-ឈ្មោះ លី សាម៉េត ហៅគ្រូមា
ពីបទប៉ុនប៉ងសូកប៉ាន់ តាមមាត្រា២៧ និងមាត្រា៦០៥ នៃក្រមព្រហ្មទណ្ឌ និងមាត្រា៣២ នៃច្បាប់ ស្តីពីការប្រឆាំងអំពេីពុករលួយ ។ ក្រោយពីចោទប្រកាន់ជាផ្លូវការ តំណាងអយ្យការអមសាលាដំបូងរាជធានីភ្នំពេញ បានបញ្ជូនសំណុំរឿងនេះទៅចៅក្រមស៊ើបសួរ ដើម្បីបន្តនីតិវិធី ។
នារសៀលថ្ងៃដដែលនោះដែរ ក្រោយពីបញ្ចប់ការស៊ើបសួរ អ្នកនាំពាក្យសាលាដំបូងរាជធានីភ្នំពេញ បានចេញសេចក្តីប្រកាសព័ត៌មាន ស្តីពីចំណាត់ការលើសំណុំរឿង ពាក់ព័ន្ធពីបទ”ប៉ុនប៉ងសូកប៉ាន់”នេះ ដោយអ្នកនាំពាក្យសាលាដំបូងរាជធានីភ្នំពេញ មានកិត្តិយសសូមជម្រាបជូនដល់សាធារណជនជ្រាបថា នៅថ្ងៃទី២៩ ខែវិច្ឆិកា ឆ្នាំ២០២៤ សាលាដំបូងរាជធានីភ្នំពេញ បានចាត់ការលើសំណុំរឿងព្រហ្មទណ្ឌលេខ៧៦៧៩ ចុះថ្ងៃទី២៩ ខែវិច្ឆិកា ឆ្នាំ២០២៤ ទាក់ទិននឹងករណីប៉ុនប៉ងក្នុងបទសូកប៉ាន់ ។
មានជនត្រូវចោទមានចំនួន២នាក់ ម្នាក់ឈ្មោះ ឆាយ សុវណ្ណារី ភេទស្រី អាយុ៥៤ឆ្នាំ និងម្នាក់ទៀតឈ្មោះ ហ៊ើង ទិត្យរាត្រីលក្ខណ៍ ភេទស្រី អាយុ៥១ឆ្នាំ ត្រូវបានចោទប្រកាន់ពីបទប៉ុនប៉ងក្នុងបទសូកប៉ាន់ ។ ចំណែកជនត្រូវចោទ២នាក់ទៀត គឺ១-ឈ្មោះ មួង ឃីម ភេទប្រុស អាយុ៦១ឆ្នាំ (កំពុងឃុំខ្លួននៅពន្ធនាគារ) និង២-ឈ្មោះ លី សាម៉េត ភេទប្រុស អាយុ៧១ឆ្នាំ(កំពុងឃុំខ្លួនក្នុងពន្ធនាគារ) ត្រូវបានចោទប្រកាន់ពីបទប៉ុនប៉ងក្នុងបទសូកប៉ាន់ ។ ប្រព្រឺត្តនៅរាជធានីភ្នំពេញ និងខេត្តកំពង់ឆ្នាំង កាលពីអំឡុងឆ្នាំ២០២១ ។ ជាបទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា២៧ និងមាត្រា៦០៥ ក្រមព្រហ្មទណ្ឌ នៃព្រះរាជាណាចក្រកម្ពុជា និងមាត្រា៣២ នៃច្បាប់ ស្តីពីការប្រឆាំងអំពើពុករលួយ ។
អ្នកនាំពាក្យសាលាដំបូងរាជធានីភ្នំពេញ សូមបញ្ជាក់ជូនផងដែរថា ដំណើររឿងដែលនាំឲ្យមានការចោទប្រកាន់នេះ គឺឈ្មោះ ឆាយ សុវណ្ណារី បានពឹងពាក់ឈ្មោះ ហ៊ើង ទិត្យរាត្រីលក្ខណ៍ បានយកប្រាក់ចំនួន៣០ម៉ឺនដុល្លារអាមេរិក ឲ្យទៅឈ្មោះ មួង ឃីម និងឈ្មោះ លី សាម៉េត ដោយមានចេតនាដើម្បីសូកប៉ាន់ ក្នុងគោលបំណងឲ្យកូនប្រុសចូលធ្វើជាមន្ត្រីគយ ខេត្តកំពង់ឆ្នាំង ។
បន្ទាប់ពីបានសួរចម្លើយជនត្រូវចោទ និងពិនិត្យភស្តុតាង ចៅក្រមស៊ើបសួរសម្រេចឃុំខ្លួនជាណ្តោះអាសន្ន លើជនត្រូវចោទឈ្មោះ ឆាយ សុវណ្ណារី និងឈ្មោះ ហ៊ើង ទិត្យរាត្រីលក្ខណ៍ ដើម្បីបន្តការស៊ើបសួរតាមនីតិវិធី ។
បញ្ជាក់ ឈ្មោះ លី សាម៉េត និងឈ្មោះ មួង ឃីម ត្រូវបានចាប់ឃុំខ្លួននៅក្នុងពន្ធនាគារ ក្នុងសំណុំរឿងផ្សេងមុននេះរួចទៅហើយ និងកាលពីព្រឹកថ្ងៃ១៣ សីហា ២០២៥ សំណុំរឿងរត់ការដោះដូរដីពន្ធនាគារខេត្តកំពង់ឆ្នាំង បានបើកសវនាការរួចហើយ មានជនត្រូវចោទ៤នាក់ គឺឈ្មោះ ដួង តារា, លី សាម៉េត, មួង ឃីម និង អ៊ុត ធី ៕
ចែករំលែកព័តមាននេះ