រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាបានគូសបញ្ជាក់ថា ភាគីថៃបានកំពុងតែរករឿងផ្ទុះគ្រាប់មីនលើកងកម្លាំងខ្លួន ដើម្បីដាក់កំហុសមកលើកម្ពុជា ហើយតាំងខ្លួនជាអ្នករងគ្រោះ ដើម្បីបំភាន់សហគមន៍អន្តរជាតិ ។ ថ្លែងក្នុងសន្នីសីទសារព័ត៌មាន នាព្រឹកថ្ងៃទី១៤…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាបានគូសបញ្ជាក់ថា ភាគីថៃបានកំពុងតែរករឿងផ្ទុះគ្រាប់មីនលើកងកម្លាំងខ្លួន ដើម្បីដាក់កំហុសមកលើកម្ពុជា ហើយតាំងខ្លួនជាអ្នករងគ្រោះ ដើម្បីបំភាន់សហគមន៍អន្តរជាតិ ។
ថ្លែងក្នុងសន្នីសីទសារព័ត៌មាន នាព្រឹកថ្ងៃទី១៤ ខែសីហា ឆ្នាំ២០២៥ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលបានគូសបញ្ជាក់ថា ៖«ផ្ទុះគ្រាប់មីនភាគីថៃខ្លួនឯងទេ ជាអ្នកបំពាន់កិ ច្ចព្រមព្រៀងឈប់បាញ់ ហើយបានជាន់គ្រាប់មីន ដែលនៅសល់ពីសម័យសង្គ្រាម ។
ជាក់ស្តែង យើងបានឃើញថា កងទ័ពថៃបានធ្វើការពង្រាយរងបន្លាលួស កង់ឡាន ក្នុងកំឡុងពេលយើងកំពុងតែអនុវត្តកិច្ចព្រមព្រៀងបទឈប់បាញ់ ដែលអស់នេះ ជាភស្តុតាងដែលមិនអាច ប្រកែកបាន» ។
ជាមួយគ្នានោះដែរ អ្នកនាំពាក្យរាជដ្ឋាភិបាលបានរំលឹកជាថ្មីចំណុច២ ក្នុងចំណោម១៣ចំណុច ដែលមានចែងនៅក្នុងកិច្ចព្រមព្រៀងគ្នា ក្នុងកិច្ចប្រជុំគណៈកម្មការវិសាមញ្ញាព្រំដែនទូទៅរវាងកម្ពុជា-ថៃ នៅប្រទេសម៉ាឡេស៊ី ដោយចំណុចនោះមានលើកឡើងថា ៖ ភាគីបានព្រមព្រៀង គ្នារក្សាកម្លាំងយោធារបស់ខ្លួន នៅទីតាំងបច្ចុប្បន្ន ដោយមិនអនុញ្ញាតឲ្យមានការផ្លាស់ទីហួសទីតាំង ដែលខ្លួនកំពុងឈរជើងក្នុងពេលកិច្ចព្រមព្រៀងឈប់បាញ់ ចូលរួមជាធរមាន ដោយមិនធ្វើការចលនាទ័ពខ្លួន រួមទាំងទ័ពម្ខាងទៀតឡើយ ។
និងចំណុចមួយទៀត គឺភាគីទាំងពីរបានឯកភាពគ្នាមិនធ្វើសកម្មភាពបង្កហេតុណាមួយដែលអាចនាំឲ្យមានភាពចលនា ចល ក្នុងនោះរួមមានការធ្វើយោធាចូលដែនអាកាស បូរណភាពទឹកដី ឬទីតាំងរបស់ភាគីម្ចាស់នៅពេលបទឈប់បាញ់បានចូលជាធរមាន ។ ភាគីទាំងពីរធ្វើការឯកភាពគ្នាមិនធ្វើការ សាងសង់ ឬពង្រីកហេដ្ឋារចនាសម្ព័ន្ធយោធា ឬលេណដ្ឋាននៅហួសទីតាំងរបស់ខ្លួនឡើយ ។
អ្នកនាំពាក្យរាជរដ្ឋាភិបាលគូសបញ្ជាក់ថា ៖«ករណីផ្ទុះមីនមិនអាចកើតមានទេ បើសិនកងទ័ពថៃគោរពកិច្ចព្រមព្រៀងឈប់បាញ់ឲ្យបានខ្ជាប់ខ្ជួនដោយរក្សាកម្លាំងឈរជើងនៅកន្លែងដដែលក្រោយពេលកិច្ចព្រមព្រៀងបានចូលជាធរមាន នៅថ្ងៃទី២៨ ខែកក្កដា ឆ្នាំ២០២៥» ។
អ្នកនាំពាក្យរាជរដ្ឋាភិបាល បានអំពាវនាវយ៉ាងទទូចដល់ភាគីថៃគោរពអនុវត្តឲ្យបានម៉ឺងម៉ាត់ និងស្មោះត្រង់ចំពោះកិច្ចព្រមព្រៀងឈប់បាញ់គ្នា ហើយបញ្ឈប់ជាបន្ទាន់នូវការលើកយកការផ្ទុះមីនមកបំភាន់សហគមន៍អន្តរជាតិ ដើម្បីបិទបាំងនូវការបំពាន់បទឈប់បាញ់របស់ខ្លួន ៕
ចែករំលែកព័តមាននេះ