ខេត្តសៀមរាប ៖ ផ្តើមចេញពីការជួយយកអាសាគ្នាក្នុងគ្រាលំបាក ជាវប្បធម៌ដ៏ប្រពៃក្នុងសង្គមខ្មែរដែលបានចាក់ឫសយ៉ាងជ្រៅក្នុងបេះដូងខ្មែរគ្រប់រូប ទីបំផុតបានបង្កើតឡើងនូវរឿងរ៉ាវជាច្រើនក្នុងជំរំភៀសសឹក ខ្លះក៏ជួបវាសនាដែលស្មានមិនដល់ ។ ជាក់ស្តែងដូចក្មេងស្រីឈ្មោះ ណាលី អាយុ១៦ឆ្នាំ…
ខេត្តសៀមរាប ៖ ផ្តើមចេញពីការជួយយកអាសាគ្នាក្នុងគ្រាលំបាក ជាវប្បធម៌ដ៏ប្រពៃក្នុងសង្គមខ្មែរដែលបានចាក់ឫសយ៉ាងជ្រៅក្នុងបេះដូងខ្មែរគ្រប់រូប ទីបំផុតបានបង្កើតឡើងនូវរឿងរ៉ាវជាច្រើនក្នុងជំរំភៀសសឹក ខ្លះក៏ជួបវាសនាដែលស្មានមិនដល់ ។ ជាក់ស្តែងដូចក្មេងស្រីឈ្មោះ ណាលី អាយុ១៦ឆ្នាំ ដែលចេះនិយាយភាសាអង់គ្លេសក៏ត្រូវបានអ្នកផលិតមាតិកា YoutoBe Mr MAC បានផ្សព្វផ្សាយពីនាងធ្វើឱ្យមានការភ្ញាក់ផ្អើលយ៉ាងខ្លាំងលើបណ្តាញសង្គម ដោយសារតែក្មេងស្រីរូបនេះ នាងរៀនភាសាអង់គ្លេសតាមAPP ក្នុងទូរស័ព្ទ ។
សម្រាប់ការកត់សម្គាល់ដ៏អស្ចារ្យមួយទៀតនោះ គឺរឿងរ៉ាវនៃការជួបស្នេហ៍ក្នុងជំរំភៀសសឹក ហើយត្រូវបានសែនព្រេនយកគ្នាជាប្តីប្រពន្ធ ដោយមានការអបអរសាទរយ៉ាងកុះករផងដែរ ។ សង្គ្រាមឈ្លានពានដែលបង្កឡើងដោយកងទ័ពថៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥កន្លងមកនេះ ទោះបីវាមានរយៈពេលតែ ៥ថ្ងៃ ប៉ុន្តែបានធ្វើឱ្យមានការឈឺចាប់មុតជ្រៅរវាងពូជសាសន៍ទាំង២ នោះគឺក្រៅពីបំផ្លាញដល់ហេដ្ឋារចនាសម្ព័ន្ធ លំនៅឋាន និងអាយុជីវិត ក៏បានបង្ខំឱ្យពលរដ្ឋខ្មែរជិត២០ម៉ឺននាក់ ត្រូវចាកចេញពីផ្ទះសម្បែងរបស់ពួកគាត់ ទៅរកកន្លែងសុវត្ថិភាពដែលរៀបចំដោយអាជ្ញាធរ តាំងពីថ្នាក់ក្រោមដល់ថ្នាក់លើ ។
ផ្សាររាត្រីផ្លូវ៦០ម៉ែត្រ ស្ថិតនៅក្នុងក្រុងសៀមរាប ខេត្តសៀមរាប ជាទីតាំងមួយក្នុងចំណោមទីតាំងជាច្រើនទៀត ដែលអាជ្ញាធរ បានរៀបចំឱ្យជនភៀសសឹកស្នាក់អាស្រ័យអំឡុងពេលសង្គ្រាមឈ្លានពានពីសំណាក់កងទ័ពថៃ ។ ផ្សាររាត្រីនេះមានជនភៀសសឹកសរុប ៨៣០នាក់ ដែលក្នុងនោះមានជនចាស់ជរា និងក្មេងៗផងដែរ ។ ទីតាំងនេះ បានបើកទទួលជនភៀសសឹកចូលមកស្នាក់នៅតាំងពីថ្ងៃទី២៦ ខែកក្កដា រហូតដល់ថ្ងៃទី១០ ខែសីហា ២០២៥ ។ ក្នុងកំឡុងពេលស្នាក់នៅទីតាំងនេះ ជនភៀសសឹកទទួលបានការយកចិត្តទុកដាក់ខ្ពស់ពីសំណាក់អាជ្ញាធរ និងគណៈកម្មការគ្រប់គ្រងផ្សារ ក៏ដូចជាសប្បុរសជននានា ។
នៅទីតាំងនេះ មានការផ្តល់ទឹកស្អាត អគ្គិសនី និងបន្ទប់អនាម័យ ដោយមិនមានគិតថ្លៃអ្វីទាំងអស់ ។ បន្ថែមពីលើនោះ អាជ្ញាធរ និងគណៈកម្មការគ្រប់គ្រងផ្សារ បានកៀរគរសប្បុរសជននាំយកស្បៀងអាហារ និងអំណោយផ្សេងចែកជូនជាបន្តបន្ទាប់ផងដែរ ដើម្បីដោះស្រាយការលំបាករបស់ជនភៀសសឹក ដែលមកពីខេត្តឧត្តរមានជ័យ និងខេត្តព្រះវិហារ ។
ក្រៅពីការផ្តល់កិច្ចគាំពារក្នុងអំឡុងនៃការស្នាក់នៅរយៈពេលប្រមាណកន្លះខែហើយនោះ នៅថ្ងៃទី១០ ខែសីហា ២០២៥ ជាថ្ងៃដែលជនភៀសសឹកត្រឡប់ទៅលំនៅឋានវិញនោះ លោកស្រី ម៉ៅ សុខឃាង អភិបាលរងក្រុងសៀមរាប និងលោកជំទាវ ឆៃ ច័ន្ទរិទ្ធីសូលីដា រដ្ឋលេខាធិការក្រសួងព័ត៌មាន និងជាប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជានៅសហរដ្ឋអាមេរិក ប្រចាំតំបន់ឆ្នេរខាងលិច ទទួលបន្ទុករដ្ឋអារីហ្សូណា និងក្រុមការងារ ព្រមទាំងលោក ទិន ការវិវឌ្ឍន៍ និងលោក ឡុង សត្យា ម្ចាស់ផ្សាររាត្រី ក៏ដូចជាសប្បុរសជននានា បានរួមគ្នារៀបចំពិធីជូនដំណើរប្រជាពលរដ្ឋភៀសសឹក មានកម្មវិធីពិសានំបញ្ចុក នំប៉័ងសម្លការីសាច់មាន់ និងបាញ់ហយផងដែរ ។
ការរៀបចំនេះ បានស្តែងឱ្យឃើញនូវមនោសញ្ចេតនា ការស្រឡាញ់ ការជួយយកអាសាគ្នារវាងគ្រួសារខ្មែរក្នុងពេលជួបគ្រោះអាសន្ន ហើយក៏ជាការផ្តល់នូវភាពកក់ក្តៅដល់ជនភៀសសឹក ក៏ដូចជាការអបអរនូវសុខសន្តិភាពសម្រាប់ប្រជាជាតិកម្ពុជា ក្រោមកិច្ចប្រឹងប្រែងរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។
ជួបស្នេហ៍ក្នុងជំរំភៀសសឹក
សូមបញ្ជាក់ផងដែរថា អ្វីដែលគួរឱ្យចាប់អារម្មណ៍នោះគឺជនភៀសសឹកមួយគូ បានប្រតិព័ទ្ធបង្កើតបាននូវមនោសញ្ចេតនាស្នេហារវាងគ្នានឹងគ្នាផងដែរ ។ ជនភៀសសឹកដែលជួបស្នេហ៍ក្នុងជំរំនេះ ខាងប្រុសមានឈ្មោះ ផេង ផា អាយុ៤៩ឆ្នាំ មានស្រុកំណើតនៅស្រុកជាំក្សាន្ត ខេត្តព្រះវិហារ ។ ឯខាងស្រីមានឈ្មោះ ហួរ សៀងណាន អាយុ៣៧ឆ្នាំ មានស្រុកកំណើតនៅក្រុងប៉ោយប៉ែត ខេត្តបន្ទាយមានជ័យ ។
ដោយឃើញចំណងស្នេហ៍របស់ជនភៀសសឹកមួយគូនេះ ពេញទៅដោយភាពស្មោះស្ម័គ្រនៅល្ងាចថ្ងៃទី៩ ខែសីហា ឆ្នាំ២០២៥ អាជ្ញាធរក៏ដូចជាគណៈកម្មការផ្សាររាត្រី ក៏បានរៀបចំពិធីសែនព្រេនជូនពួកគាត់យកគ្នាជាប្តី-ប្រពន្ធមុនពេលត្រឡប់ទៅលំនៅឋានវិញផងដែរ ។ មិនមានព័ត៌មានក្រៅពីនេះទេក្នុងការស្រាវជ្រាវព័ត៌មានទាក់ទិននឹងគូស្នេហ៍ទាំង២ ដែលបានធ្វើជាកូនកំលោះ-ក្រមុំ ក្នុងពិធីសែនព្រេន ដែលមានការដឹងឮជាសាធារណៈនាពេលនេះ ។
ទោះបីជាបែបណា កោះសន្តិភាពសូមជូនពរដល់ពួកគាត់ទាំង២ ស្រឡាញ់គ្នាដល់ចាស់ លុះអវសាន្តនៃជីវិត ៕
ចែករំលែកព័តមាននេះ