សង្គ្រាមអ៊ុយក្រែន ៖ សហភាពអឺរ៉ុបកោះប្រជុំបន្ទាន់រដ្ឋមន្ត្រីការបរទេសនាថ្ងៃទី១១សីហា ដើម្បីពិភាក្សាគ្នាមុនកិច្ចប្រជុំកំពូលរវាងប្រធានាធិបតីអាមេរិកលោកដូណាល់ត្រាំនិងសមភាគីរុស្ស៊ី លោកវ្ល៉ាឌីមៀរពូទីនពីរឿងសង្គ្រាមនៅអ៊ុយក្រែន។ សហភាពអឺរ៉ុបសង្ស័យចំពោះការចុះហត្ថលេខាលើកិច្ចព្រមព្រៀងមួយដែលគ្មានវត្តមានអ៊ុយក្រែន។
ពួកអឹរ៉ុបខិតខំធ្វើរណសិរ្សរួមមួយនៅពីក្រោយអ៊ុយក្រែន ។ បន្ទាប់ពីការអំពាវរបស់ពួកគេឲ្យអ៊ុយក្រែនចូលរួមក្នុងកិច្ចប្រជុំគំពូលត្រាំ-ពូទីនក្នុងសប្ដាហ៍នេះដែរ បណ្ដាប្រទេសជាសមាជិកសហភាពអឹរ៉ុប រួមប្រជុំបន្ទាន់នាថ្ងៃទី១១សីហា ផ្ដោតលើការចរចានាពេលខាងមុខរវាងសហរដ្ឋអាមេរិកនិង
រុស្ស៊ី ។
ក្នុងកិច្ចប្រជុំកំពូលអាមេរិក-រុស្ស៊ីនោះនៅអាឡាស្កា អាចមានបញ្ហាដូចដែលលោកដូណាល់ត្រាំលើកឡើង លទ្ធភាពនៃកិច្ចព្រមព្រៀងមួយដែលគ្រោងធ្វើការដោះដូរដែនដី ដើម្បីបញ្ចប់ជម្លោះដែលបណ្ដាលឲ្យមនុស្សច្រើនសិបពាន់នាក់អាចច្រើនរយពាន់នាក់ស្លាប់រួចហើយ តាំងពីចាប់ផ្ដើមសង្គ្រាមរវាងប្រទេសទាំង២អស់ពេលជាង៣ឆ្នាំមកនេះ។
យោងតាមឯកអគ្គរដ្ឋទូតអាមរិកប្រចាំអូតង់លោកMATHEW WHITAKERថា វត្តមានរបស់ប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គីមិនត្រូវបានគ្រោងឡើយ តែនៅមានលទ្ធភាព។ ក្នុងសេចក្ដីប្រកាសមួយអ្នកទទួលខុសត្រូវខាងការទូតរបស់សហភាពអឺរ៉ុប លោកស្រីកាហ្សាកាឡាស់លើកឡើងថា លោកត្រាំមានហេតុផលដែលនិយាយថា រុស្ស៊ីត្រូវបញ្ចប់សង្គ្រាមប្រឆាំងអ៊ុយក្រែន តែសហរដ្ឋអាមេរិកក៏អាចចាប់បង្ខំរុស្ស៊ីឲ្យចរចាជាមួយអ៊ុយក្រែនដែរ។
លោកស្រីបានទទូចថារាល់កិច្ចព្រមព្រៀងរវាងអាមេរិកនិងរុស្ស៊ី ត្រូវបញ្ចូលអ៊ុយក្រែននិងសហភាពអឺរ៉ុប ព្រោះនោះជាបញ្ហាសន្តិសុខសម្រាប់អ៊ុយក្រែននិងសម្រាប់អឹរ៉ុបទាំងមូលផងដែរ៕
ចែករំលែកព័តមាននេះ