ក្រុមហ៊ុនដ៏ធំនៅខេត្តប៉ៃលិន ដែលនាំផ្លែមៀនស្រស់ទៅលក់ដូរនៅប្រទេសចិន គ្រោងពង្រីកការនាំចេញឱ្យបានជាង២ម៉ឺនតោនក្នុង១ឆ្នាំ
ខេត្តប៉ៃលិន ៖ បើតាមប្រភពព័ត៌មានពីលោក ជៀន ហ្វេ (Jian fei) អ្នកគ្រប់គ្រង ក្រុមហ៊ុន ឆាយណាជីនវ័រយាន…
ខេត្តប៉ៃលិន ៖ បើតាមប្រភពព័ត៌មានពីលោក ជៀន ហ្វេ (Jian fei) អ្នកគ្រប់គ្រង ក្រុមហ៊ុន ឆាយណាជីនវ័រយាន អ៊ីមផត អ៊ិចផត ខេមបូឌា ឯ.ក ដែលមានទីតាំងស្ថិតនៅក្នុងខេត្តប៉ៃលិន បានប្រាប់អ្នកសារពត៌មានឱ្យដឹងថា បច្ចប្បន្នខាងក្រុមហ៊ុន កំពុងតែប្រមូលទិញផ្លែមៀនប៉ៃលិន ពីកសិករ ក្នុង១ថ្ងៃរាប់សិបតោន ដើម្បីយកទៅលាងសម្អាតរៀបចំវេចខ្ចប់ រួចដឹកជញ្ជូននាំទៅលក់បន្តនៅក្នុងប្រទេសចិនយ៉ាងមមារញឹក ដែលអាចឱ្យប្រជាពលរដ្ឋខ្វះការងារ អាចដាក់ពាក្យចូលធ្វើជាកម្មករបេះផ្លែមៀនប៉ៃលិន ផងដែរ ។
លោក ជៀន ហ្វេ បានបន្ថែមទៀតថា ដោយសារខាងក្រុមហ៊ុន ចង់ជួយកាត់បន្ថយបន្ទុករាជរដ្ឋាភិបាល ផ្នែកកម្លាំងពលកម្ម និងចង់ឱ្យបងប្អូនប្រជាពលរដ្ឋមានការងារធ្វើ ទើបក្រុមហ៊ុនមានគំរោងចង់ពង្រីកការនាំចេញផ្លែមៀនកាន់តែច្រើនជាងឆ្នាំមុន ខណៈដែលឆ្នាំមុននាំចេញទៅលក់នៅក្នុងប្រទេសចិន បានជាងមួយ១ម៉ឺនតោន។ តែឆ្នាំ២០២៥នេះ ក្រុមហ៊ុន នឹងខិតខំនាំចេញរហូតដល់ជា២ម៉ឺនតោនឯណោះ ។
លោកបានបញ្ជាក់ទៀតថា ជាមួយនឹងការពង្រីកការនាំចេញផ្លែមៀនប៉ៃលិនស្រស់ ក្រុមហ៊ុនក៍ត្រូវការកម្មករបុគ្គលិកជាងមួយពាន់នាក់មន្ថែមទៀត ដោយឱ្យប្រាក់កំរៃសមរម្យ មានអាហារ៣ពេល ផ្តល់កន្លែងស្នាក់នៅ ដោយមិនគិតកម្រៃពីកម្មករឡើយ។ ហើយខាងក្រុមហ៊ុន បានសហការជាមួយនឹងលោកជំទាវ បាន ស្រីមុំ អភិបាលខេត្តប៉ៃលិន បានធ្វើការរៀបចំឈូសឆាយពង្រាបពី ដើម្បីសាងសង់រោងតង់ស្នាក់នៅ ដោយមិនយកថវិកាពីបុគ្គលិក ឬកម្មករឡើយ ដែលមានផ្ទៃដីជាង២ម៉ឺនម៉ែត្រការ៉េឯណោះ ។
លើសពីនេះ នៅពេលថ្មីៗ រដ្ឋបាលខេត្តប៉ៃលិន បានជួយសម្របសម្រួលដល់បងប្អូនពលករខ្មែរជាច្រើនរូប ដែលទើបតែវិលត្រលប់មកពីប្រទេសថៃ ដើម្បីបានទទួលឱកាសការងារល្អនៅក្នុងខេត្ត ជាមួយក្រុមហ៊ុន ឆាយណាជីនវ័រយាន អ៊ីមផត អ៊ិចផត ខេមបូឌា ឯ.ក ស្របតាមការអំពាវនាវរបស់រាជរដ្ឋាភិបាល ឱ្យបងប្អូនពលករខ្មែរ វិលត្រលប់មកធ្វើការនៅក្នុងប្រទេសវិញ ព្រោះមានការងារសម្បូរបែបជាច្រើនកន្លែងកំពុងនៅរង់ចាំទទួលផងដែរ ៕
ចែករំលែកព័តមាននេះ