ខេត្តកំពង់ស្ពឺ៖ កម្មការិនីរោងចក្រម្នាក់បានស្លាប់ភ្លាមៗនៅកន្លែងកើតហេតុ ហើយកម្មករម្នាក់ទៀតបានរងរបួសធ្ងន់ធ្ងរ ត្រូវបានរថយន្តសាមុយដឹកយកទៅសង្គ្រោះព្យាបាល ខណៈជិះម៉ូតូមកធ្វើការងារ ត្រូវបានរថយន្តម៉ាកព្រូស បើកបរក្នុងល្បឿនលឿនរ៉េចង្កូតបុកម៉ូតូទាំង២គ្រឿងចំពីមុខយ៉ាងពេញទំហឹង ។ ហេតុការណ៍ខាងលើនេះបានកើតឡើងកាលពីវេលាម៉ោង៦និង៥០នាទីព្រឹក ថ្ងៃទី៣០…
ខេត្តកំពង់ស្ពឺ៖ កម្មការិនីរោងចក្រម្នាក់បានស្លាប់ភ្លាមៗនៅកន្លែងកើតហេតុ ហើយកម្មករម្នាក់ទៀតបានរងរបួសធ្ងន់ធ្ងរ ត្រូវបានរថយន្តសាមុយដឹកយកទៅសង្គ្រោះព្យាបាល ខណៈជិះម៉ូតូមកធ្វើការងារ ត្រូវបានរថយន្តម៉ាកព្រូស បើកបរក្នុងល្បឿនលឿនរ៉េចង្កូតបុកម៉ូតូទាំង២គ្រឿងចំពីមុខយ៉ាងពេញទំហឹង ។
ហេតុការណ៍ខាងលើនេះបានកើតឡើងកាលពីវេលាម៉ោង៦និង៥០នាទីព្រឹក ថ្ងៃទី៣០ ខែកញ្ញា ឆ្នាំ២០២៥ នៅតាមបណ្តោយ ផ្លូវជាតិលេខ៤១ ចន្លោះបង្គោល គីឡូម៉ែត្រលេខ២៧ ទៅលេខ២៨ ស្ថិតនៅក្នុងភូមិថ្មសរ ឃុំស្នំក្រពើ ស្រុកគងពិសី ខេត្តកំពង់ស្ពឺ។
នគរបាលចរាចរណ៍ស្រុកគងពិសីបាននិយាយឱ្យដឹងថា ភាគីខាងរថយន្តមួយគ្រឿងម៉ាកព្រូស ពណ៌ក្រហម ពាក់ផ្លាកលេខ ភ្នំពេញ2BK-1645 បើកបរដោយឈ្មោះ ង៉ែត សូ ភេទប្រុស អាយុ២៦ឆ្នាំ រស់នៅភូមិឫស្សីមួយគុម្ភ ឃុំអូរសារាយ ស្រុកត្រាំកក់ ខេត្តតាកែវ ។ ចំណែកភាគីខាងម៉ូតូទាំង២គ្រឿងរួមមាន ទី១-ម៉ូតូម៉ាកហុងដា ធុនសេ១២៥ ស៊េរីឆ្នាំ២០១៤ ពណ៌ខ្មៅ ពាក់ផ្លាកលេខបាត់ដំបង 1R-1632 បេីកបរដោយឈ្មោះ សាយ ពិសី ភេទប្រុស អាយុ៤៥ឆ្នាំ មុខរបរកម្មករ រោងចក្រ រស់នៅភូមិត្រពាំងក្រសាំង ឃុំកក់ ស្រុកបរសេដ្ឋ ខេត្តកំពង់ស្ពឺ (ពាក់មួកសុវត្ថិភាពរងរបួសធ្ងន់ធ្ងរ) និងទី២-ម៉ូតូម៉ាកហុងដា ធុនសេ១២៥ ស៊េរីឆ្នាំ២០១៥ ពណ៌ខ្មៅ ពាក់ផ្លាកលេខ ភ្នំពេញ 1CU-0837 បើកបរដោយឈ្មោះ ផុន ភូណាំ ភេទស្រី អាយុ២៧ឆ្នាំ មុខរបរកម្មការិនីរោងចក្រ រស់នៅភូមិសំរោង ឃុំស្នំក្រពេី ស្រុកគងពិសី ខេត្តកំពង់ស្ពឺ(ជនរងគ្រោះមានពាក់មួកសុវត្ថិភាព និងបានស្លាប់ភ្លាមៗនៅកន្លែងកេីតហេតុតែម្តង) ។
នគរបាលចរាចរណ៍ស្រុកគងពិសីបានឱ្យដឹងបន្តថា នៅមុនពេលកើតហេតុ មានរថយន្តមួយ គ្រឿងម៉ាកព្រូស ពណ៌ក្រហម បានបើកបរក្នុងល្បឿនលឿន តាមបណ្តោយផ្លូវជាតិលេខ៤ ពីទិសខាងជេីងទៅទិសខាងត្បូង លុះពេលបើកបរដល់ចំណុចកើតហេតុខាងលេី ក៏បានរ៉េចង្កូតទៅបុករះម៉ូតូចំនួនពីរគ្រឿង ដែលម៉ូតូទាំងពីរគ្រឿង បានបើកបរពីទិសខាងត្បូងទៅទិសខាងជើង បញ្ច្រាសទិសចំពីមុខយ៉ាងពេញទំហឹងតែម្តង ។
នគរបាលចរាចរណ៍ស្រុកគងពិសីបានបញ្ជាក់ថា ក្នុងករណីរថយន្តបុករះម៉ូតូចំនួនពីរគ្រឿងខាងលើនេះបណ្ដាលឲ្យស្លាប់កម្មការិនីម្នាក់នៅនឹងកន្លែងកេីតហេតុ ។ ចំណែកកម្មករម្នាក់ទៀតរងរបួសធ្ងន់ ត្រូវបានបញ្ជូនទៅពេទ្យបង្អែកស្រុកគងពិសី និងរងការខូចខាតរថយន្តធ្ងន់ធ្ងរ០១គ្រឿង និងរងការខូចខាតម៉ូតូធ្ងន់ធ្ងរចំនួន០២គ្រឿងផងដែរ។ ដោយឡែកអ្នកបើកបររថយន្តត្រូវបានសមត្ថកិច្ចនគរបាលយកទៅសួរនាំ នៅអធិការដ្ឋាននគរបាលស្រុកគងពិសី។
ក្រោយកើតហេតុ សពកម្មការិនីខាងលើ ត្រូវបាននគរបាលជំនាញ ប្រគល់ជូនសាច់ញាតិក្រុមគ្រួសារ យកទៅធ្វើបុណ្យតាមប្រពៃណី ។
ដោយឡែកវត្ថុតាងទាំង៣គ្រឿងខាងលើ សមត្ថកិច្ចនគរបាលបានយកមករក្សាទុកនៅអធិការដ្ឋាននគរបាលស្រុកគងពិសី ដើម្បីកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ