ទីក្រុងហ្សាកាតា៖ ជាលើកដំបូងនៅអាស៊ីអាគ្នេយ៍ដែលប្រទេស១មានប្រព័ន្ធមីស៊ីលបលលីសស្ទីក (ballistic) ដើម្បីពង្រឹងវិស័យការពារជាតិរបស់ខ្លួន។ សារព័ត៌មានឆេនណល ញូស៍ អេស៊ា (Channel News Asia)…
ទីក្រុងហ្សាកាតា៖ ជាលើកដំបូងនៅអាស៊ីអាគ្នេយ៍ដែលប្រទេស១មានប្រព័ន្ធមីស៊ីលបលលីសស្ទីក (ballistic) ដើម្បីពង្រឹងវិស័យការពារជាតិរបស់ខ្លួន។ សារព័ត៌មានឆេនណល ញូស៍ អេស៊ា (Channel News Asia) ផ្សាយថាឥណ្ឌូណេស៊ីបានដាក់ពង្រាយស្ងាត់ៗនូវជើងទម្របាញ់មីស៊ីលបលលីសស្ទីករយៈចម្ងាយខ្លីនៅខេត្តកាលីម៉ាន់តាន់ខាងកើត (East Kalimantan)។ មីស៊ីលនេះផលិតនៅតួកគី។ អ្នកវិភាគយល់ថាតាមរយៈនេះ តុល្យភាពកម្លាំងយោធានៅក្នុងតំបន់ចាប់ផ្ដើមប្រែប្រួលហើយ។
នៅក្នុងស្ថានភាពដែលគ្មានប្រទេសណាមួយនៅក្នុងតំបន់ទាន់មានមីស៊ីលទំនើបសម្រាប់ប្រើប្រាស់នៅឡើយ ឥណ្ឌូណេស៊ីមានប្រព័ន្ធនេះប្រើមុនគេដែលអាចចេញប្រតិបត្តិការរហ័ស និងវាយប្រហារចំគោលដៅល្អ។ មានចំនុច២ដែលត្រូវមើលឃើញ។ ទី១-ចំណាត់ការនេះពាក់ព័ន្ធនឹងទីតាំងភូមិសាស្ត្រដែលឥណ្ឌូណេស៊ីផ្លាស់ប្ដូររដ្ឋធានីពីហ្សាកាតាទៅនូសាន់តារ៉ា (Nusantara) និងទី២-ចំណាត់ការនេះកើតឡើងចំពេលដែលសភាពការណ៍នៅសមុទ្រចិនខាងត្បូងនៅតែបន្តឡើងកម្ដៅ។
កាលពីមុន ឥណ្ឌូណេស៊ីច្រើនប្រើប្រាស់វិធីការពារជាតិរបស់ខ្លួនដោយគ្រឿងសាស្ត្រាវុធស៊េរីចាស់ដែលដាក់ពង្រាយយ៉ាងច្រើនស្អេកស្កះ។ បច្ចុប្បន្ន ឥណ្ឌូណេស៊ីងាកមកប្រើអាវុធស៊េរីទំនើបដែលអាចបញ្ចេញប្រតិកម្មរហ័ស។ បើគិតពីភូមិសាស្ត្រនយោបាយ ឥណ្ឌូណេស៊ីដែលធ្លាប់តែពឹងផ្អែកតែមួយមុខទៅលើកម្លាំងបស្ចិមប្រទេសជាខ្នងបង្អែកនោះបានងាកទៅចាប់ដៃជាមួយប្រទេសជាដៃគូដទៃទៀតដូចជាតួកគីជាដើម។ ហេតុនេះ ធ្វើឱ្យខ្លួនមានកម្លាំងជួយជ្រោមជ្រែងកាន់តែច្រើន។
ក្រុមអ្នកជំនាញយោធាយល់ថាការដាក់ពង្រាយជើងទម្របាញ់មីស៊ីលនៅខេត្តកាលីម៉ាន់តាន់ខាងកើតនោះមានចរិតភូមិសាស្ត្រនយោបាយផង និងជានិមិត្តរូបផង។ ឥណ្ឌូណេស៊ីជ្រើសរើសយកទីតាំងនោះសម្រាប់ដាក់ពង្រាយមីស៊ីលដោយសារហេតុផលមួយចំនួនដូចជា៖ មានសុវត្ថិភាពបើសិនរងការវាយប្រហារដោយផ្ទាល់, ទីតាំងជាយុទ្ធសាស្ត្របែរមុខទៅរកច្រកផ្លូវសមុទ្រសំខាន់ៗនៅភាគខាងជើង និងជាទីកន្លែងតាំងនៅនៃរដ្ឋធានីថ្មីរបស់ខ្លួន។ ដូច្នេះ វាជាជម្រើសល្អបំផុតក្នុងការដាក់ពង្រាយមីស៊ីលនៅទីនោះដើម្បីការពារបូរណភាពទឹកដីផង និងការពាររដ្ឋធានីថ្មីផង។
ជើងទម្របាញ់មីស៊ីលឈ្មោះខាន់មានវង់ប្រតិបត្តិការ២៨០គីឡូម៉ែត្រផលិតដោយក្រុមហ៊ុនរ៉ូកេតសាន (Roketsan) ត្រូវគេប្រទះឃើញនៅតំបន់តេងការ៉ុង (Tenggarong) នៃខេត្តកាលីម៉ាន់តាន់ខាងកើត។ រូបភាពមីស៊ីលខាន់បានបង្ហោះនៅលើទំព័រហ្វេសប៊ុកកាលពីថ្ងៃទី១ ខែសីហា និងផ្សព្វផ្សាយដោយសារព័ត៌មានឥណ្ឌូណេស៊ីកុំប៉ះ (Kompas)។ អនុប្រធានផ្នែកគ្រប់គ្រងទូទៅរបស់ក្រុមហ៊ុនរ៉ូកេតសាន លោកមូរ៉ាត ខឺតទូលូស (Murat Kurtulus) ប្រាប់ថាកាលពីខែវិច្ឆិកា ឆ្នាំ២០២២ឥណ្ឌូណេស៊ីអនុម័តឱ្យដាក់ពង្រាយមីស៊ីលខាន់។
ក្រៅពីតួកគី ឥណ្ឌូណេស៊ីជាប្រទេសដំបូងគេដែលមានមីស៊ីលនេះប្រើប្រាស់។ អ្នកនាំពាក្យកងទ័ពឥណ្ឌូណេស៊ីទទួលស្គាល់ថាមីស៊ីលនេះបានបញ្ជូនពីតួកគីទៅឱ្យឥណ្ឌូណេស៊ីពិតមែន។ លោកថានេះជាអាវុធជុំទី១ដែលក្រសួងការពារជាតិឥណ្ឌូណេស៊ីកុម្ម៉ង់ទិញពីតួកគី និងមិនទាន់ប្រគល់សិទ្ធិជាផ្លូវការទៅឱ្យកងទ័ពប្រើប្រាស់នៅឡើយទេ។ ដូច្នេះព័ត៌មានដែលចុះផ្សាយថាមានការដាក់ពង្រាយមីស៊ីលម៉ាកខាន់នៅខេត្តកាលីម៉ាន់តាន់ខាងកើតនោះលោកសូមមិនធ្វើអត្ថាធិប្បាយទេ។ ម៉្យាងទៀត លោកមិនបានបញ្ជាក់លម្អិតថាឥណ្ឌូណេស៊ីបានទិញមីស៊ីលនេះប៉ុន្មានគ្រឿង និងដាក់ពង្រាយនៅកន្លែងណាខ្លះ៕
ចែករំលែកព័តមាននេះ