រដ្ឋបាលខេត្តសៀមរាប បានប្រកាសកាលពីថ្ងៃទី១០ ខែសីហា ឆ្នាំ២០២៥ ថា ៖ ឯកឧត្តម ង៉ែត នរិន្ទ្រ ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្រីស្នំ…
រដ្ឋបាលខេត្តសៀមរាប បានប្រកាសកាលពីថ្ងៃទី១០ ខែសីហា ឆ្នាំ២០២៥ ថា ៖ ឯកឧត្តម ង៉ែត នរិន្ទ្រ ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្រីស្នំ អមដំណើរដោយឯកឧត្តម លោកជំទាវ លោក លោកស្រី ក្រុមការងាររាជរដ្ឋាភិបាលចុះមូលដ្ឋានស្រុកស្រីស្នំបានចូលរួមគោរពវិញ្ញាណក្ខន្ធ និងរំលែកទុក្ខគ្រួសារពលទាហានជួរមុខទិសប្រាសាទតាមាន់ដែលបាមពលីក្នុងសមរភូមិសង្គ្រាមជាមួយទាហានសៀមនៅបីទីតាំង ។
ចំពោះទីតាំងទាំងបីខាងលើនេះរួមមាន
-សពលោកវរៈសេនីយ៍ទោ ក្លែប រាយ នៅភូមិធ្លក ឃុំត្រាំសសរ ស្រុកស្រីស្នំ ខេត្តសៀមរាប ។
-សពលោក អនុសេនីយ៍ឯក ឡោក ម៉ៅ ភូមិគោកព្រេច ឃុំត្រាំសសរ ស្រុកស្រីស្នំ ខេត្តសៀមរាប។
-សពលោកពលបាលទោ ប៉ោត ពីន ភូមិមោងខាងត្បូង ឃុំមោង ស្រុកស្រីស្នំ ខេត្តសៀមរាប គ្រោះថ្នាក់ចរាចរណ៍ នៅប្រាសាទតាមាន់ ។
ជាមួយនឹងការគោរពវិញ្ញាណក្ខន្ធនេះដែរ ក្រុមការងារក៏បាននាំយកសម្ភារ និងថវិកាទៅសួរសុខទុក្ខជាមួយក្រុមគ្រួសារទាំងបី ដោយមួយគ្រួសារទទួលបានអង្ករ១០០គីឡូក្រាម មី៥កេស ទឹកបរិសុទ្ធ៤កេស និងថវិកាចំនួន ២,៨០០,០០០៛ ។
ក្នុងនាមក្រុមការងារពិតជាមានសេចក្តីរន្ធត់តក់ស្លុតឥតឧបមា ក្រោយពីបានទទួលដំណឹងយ៉ាងក្រៀមក្រំថា វីរកងទ័របស់យើងបានពលី ។ ក្នុងបរិយាកាសដ៏សែនក្ដុកក្ដួលនេះ សូមសម្តែងនូវការអសោកស្តាយ អាឡោះអាល័យជាអនេក និងសូមចូលរួមរំលែកទុក្ខ ដ៏សែនក្រៀមក្រំបំផុតជាមួយក្រុមគ្រួសារ ។
មរណភាពរបស់ យោធិនរបស់យើង គឺជាការបាត់បង់ដ៏ធំធេង មិនត្រឹមតែចំពោះក្រុមគ្រួសារប៉ុណ្ណោះទេ តែក៏ជាការបាត់បង់នូវវីរយុទ្ធជនខ្មែរដ៏អង់អាចក្លាហានម្នាក់ដែលបានបូជាសាច់ស្រស់ ឈាមស្រស់ ក្នុងកិច្ចការពារបូរណភាពទឹកដី ការពារអធិបតេយ្យជាតិ ពីការឈ្លានពានរបស់ពួកខ្មាំងសត្រូវលើសមរភូមិមុខ គួរឱ្យស្ញប់ស្ញែងជាទីបំផុត ។
សូមដួងវិញ្ញាណក្ខន្ធរបស់យោធិនរបស់យើងបានទៅកាន់ សុគតិភពកុំបីឃ្លៀងឃ្លាតឡើយ យើងខ្ញុំនឹងចង់ចាំនូវគំរូវីរភាពដ៏អង់អាចក្លាហានរបស់យោធិនដែលបានពលីនេះក្នុងក្រអៅបេះដូងជារៀងរហូត ៕
ចែករំលែកព័តមាននេះ