អាមេរិករំពឹងនឹងប្រមូលចំណូលពន្ធបាន៥០ពាន់លានដុល្លារក្នុង១ខែ ឬច្រើនជាងនេះ
សហរដ្ឋអាមេរិក ៖ រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick បានឱ្យដឹងកាលពីថ្ងៃទី៧ ខែសីហា ឆ្នាំ២០២៥ ថា…
សហរដ្ឋអាមេរិក ៖ រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick បានឱ្យដឹងកាលពីថ្ងៃទី៧ ខែសីហា ឆ្នាំ២០២៥ ថា លោករំពឹងថា សហរដ្ឋអាមេរិកនឹងប្រមូលចំណូលពន្ធបានចំនួន៥០ពាន់លានដុល្លារក្នុង១ខែ ឬច្រើនជាងនេះ ពោលកើនឡើងពី៣០ពាន់លានដុល្លារ កាលពីខែមុន ខណៈដែលពន្ធបានកើនឡើងលើការនាំចូលទំនិញមកពីប្រទេសជាច្រើនជុំវិញពិភពលោក។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ពន្ធខ្ពស់របស់ប្រធានាធិបតីអាមេរិក លោក ដូណាល់ ត្រាំ (Donald Trump) លើការនាំចូលទំនិញពីប្រទេសជាច្រើនបានចូលជាធរមានកាលពីថ្ងៃទី៧ ខែសីហា ឆ្នាំ២០២៥ ដោយដំឡើងពន្ធនាំចូលជាមធ្យមរបស់អាមេរិកឈានដល់កម្រិតខ្ពស់បំផុតក្នុង១សតវត្ស ហើយប្រទេសជាដៃគូណិជ្ជកម្មអាមេរិកត្រូវប្រឈមនឹងពន្ធចាប់ពី ១០% ទៅ ៥០%។
លោក ត្រាំ កាលពីថ្ងៃទី៦ ខែសីហា កន្លងទៅ ក៏បានប្រកាសពីផែនការយកពន្ធប្រហែល ១០០% លើការនាំចូលបន្ទះឈីប ឬផលិតផលពាក់កណ្តាលសម្រេច (Semiconductor Chip) ពីប្រទេសមួយចំនួន លុះត្រាតែក្រុមហ៊ុនផលិតប្តេជ្ញាចិត្តផលិតក្នុងទឹកដីអាមេរិក។ ជាមួយគ្នានោះរួមទាំងពន្ធលើការនាំចូលឱសថ ដែលអាចកើនឡើងដល់ ២៥០% ទៅតាមពេលវេលាកំណត់។ ព័ត៌មានលម្អិតពីពន្ធតាមវិស័យដ៏សំខាន់ទាំងនេះ ត្រូវបានរំពឹងទុកនៅប៉ុន្មានសប្តាហ៍ខាងមុខនេះ បន្ទាប់ពីនាយកដ្ឋានពាណិជ្ជកម្មបានបញ្ចប់ការសិក្សាលើផលប៉ះពាល់នៃការនាំចូលទាំងនោះមកលើសន្តិសុខជាតិអាមេរិក។
លោក Howard Lutnick បានថ្លែងនៅក្នុងបទសម្ភាសន៍ជាមួយ Fox Business ដោយការកត់សម្គាល់ថា ចំណូលពីពន្ធគយនឹងបន្តកើតចេញពីសសរស្តម្ភឧស្សាហកម្មសកល ដោយលោកនិយាយថា «បន្ទះឈីប ឬផលិតផលពាក់កណ្តាលសម្រេច ព្រមទាំងឱសថ និងវិស័យយុទ្ធសាស្ត្រជាច្រើនទៀតនឹងស្ថិតក្នុងជួរបន្ទាប់សម្រាប់ការយកពន្ធ»។ លោកបានបន្តទៀតថា ក្រុមហ៊ុនអាចទទួលបានការលើកលែងពន្ធលើបន្ទះឈីប ឬផលិតផលពាក់កណ្តាលសម្រេច ដែលរំពឹងទុក ប្រសិនបើពួកគេដាក់ផែនការសាងសង់រោងចក្រនៅអាមេរិក។ លោកថា”គោលដៅរបស់លោកប្រធានាធិបតី គឺដើម្បីនាំយកខ្សែសង្វាក់ផ្គត់ផ្គង់បន្ទះឈីបទាំងមូលត្រឡប់មកទឹកដីអាមេរិកវិញ ដោយបន្ថែមថា គំនិតផ្តួចផ្តើមនេះអាចទាក់ទាញការវិនិយោគរហូតដល់១ទ្រីលានដុល្លារក្នុងការផលិតក្នុងស្រុកនៅប៉ុន្មានឆ្នាំខាងមុខនេះ។
ការជំរុញការផលិតបន្ទះឈីបក្នុងស្រុកមិនមែនជារឿងថ្មីនោះទេ ខណៈសភាអាមេរិកបានបង្កើតកម្មវិធីឧបត្ថម្ភធនសម្រាប់ការផលិត និងស្រាវជ្រាវមានតម្លៃរហូតដល់ ៥២,៧ពាន់លានដុល្លារក្នុងឆ្នាំ២០២២ ក្រោមការដឹកនាំរបស់អតីតប្រធានាធិបតី លោក ចូ បៃដិន (Joe Biden) ហើយក្រុមហ៊ុនឈានមុខគេមួយចំនួនបានព្រមព្រៀងគ្នា កាលពីឆ្នាំមុន ដើម្បីកំណត់ទីតាំងរោងចក្រផលិតបន្ទះឈីបនៅសហរដ្ឋអាមេរិក៕
ចែករំលែកព័តមាននេះ