បន្ថែមលើទីផ្សារដែលមានស្រាប់នៅក្នុងបញ្ជីនាំចេញនៅក្នុងរយៈពេល៧ខែ នៃឆ្នាំ២០២៥នេះសហព័ន្ធស្រូវអង្ករកម្ពុជា បានបង្ហាញទីផ្សារអង្ករថ្មីពីរ គឺអាហ្វ្រិក និងមជ្ឈិមបូព៌ា ប៉ុន្តែបិរមាណ និងតម្លៃមិនលម្អិតនោះឡើយ ដោយសារតែបរិមាណវានៅតិច ។ សិ្ថតិ…
បន្ថែមលើទីផ្សារដែលមានស្រាប់នៅក្នុងបញ្ជីនាំចេញនៅក្នុងរយៈពេល៧ខែ នៃឆ្នាំ២០២៥នេះសហព័ន្ធស្រូវអង្ករកម្ពុជា បានបង្ហាញទីផ្សារអង្ករថ្មីពីរ គឺអាហ្វ្រិក និងមជ្ឈិមបូព៌ា ប៉ុន្តែបិរមាណ និងតម្លៃមិនលម្អិតនោះឡើយ ដោយសារតែបរិមាណវានៅតិច ។
សិ្ថតិ និងបរិមាណវាមិនច្រើនមែន ប៉ុន្តែសង្ឃឹមថា កម្ពុជាអាចបន្តរក្សានិរន្តរភាពទីផ្សារទាំងពីរថ្មីនោះឲ្យបាន ហើយព្យាយាមពង្រីកទៅមុខនោះទីផ្សារអង្ករកម្ពុជានឹងកាន់តែរីកធំជាងមុនថែមទៀត ។
សហព័ន្ធស្រូវអង្ករកម្ពុជាបានឲ្យដឹងថា ពីខែមករា ដល់ខែកក្កដា ឆ្នាំ២០២៥ កម្ពុជាបាននាំចេញអង្ករសរុបបាន៤២០.៥៧២តោន គិតជាទឹកប្រាក់បានចំនួន៣០៩,៣២ លានដុល្លារ ។ ហើយបើធៀបនឹងរយៈពេលដដែល ឆ្នាំ២០២៤វិញ ឃើញថា បរិមាណនាំចេញអង្ករកម្ពុជាកើនឡើង១០,៨១ ភាគរយ ហើយចំពោះតម្លៃវិញ គឺកើនឡើងបន្ថែមដល់ទៅ១០,៣៦ភាគរយ ។
ប្រភពដដែលបានបន្តថា បរិមាណ និងតម្លៃនៃការនាំចេញនេះ គឺធ្វើឡើងដោយក្រុមហ៊ុនសរុប៥១ក្រុមហ៊ុន ហើយគោលដៅ គឺមាន៦៥ គ្រាន់តែភាគច្រើន គឺជាគោលដៅជាប្រពៃណីដែលមានស្រាប់ដូចជាសហភាពអឺរ៉ុប ចិន អាស៊ាន និងប្រទេសផ្សេងទៀតមានអាហ្វ្រិក មជ្ឈិមបូព៌ា អាមេរិក កាណាដា អូស្ត្រាលី ញ៉ហ្សេឡេនជាដើម ។
ស្ថិតិនៃការនាំចេញទៅអឺរ៉ុប ចំនួន២៦ប្រទេស សម្រេចបានបរិមាណអង្ករចំនួន២០០.៧៧២តោន គិតជាទឹកប្រាក់ចំនួនជិត១៥៧លានដុល្លារទៅកាន់ប្រទេសចិន និងហុងកុងចំនួន១០៥.៦២១តោន គិតជាទឹកប្រាក់ចំនួនជាង៦២លានដុល្លារ ។ ទៅកាន់ប្រទេសក្នុងអាស៊ានចំនួន៧ ប្រទេសបានបរិមាណចំនួន៥៧.១៧៩តោន គិតជាទឹកប្រាក់ចំនួនជាង៤០លានដុល្លារ និងទៅកាន់គោលដៅ៣២ ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ជាដើមនោះបានចំនួន៥៧.០០០តោន គិតជាទឹកប្រាក់ចំនួនជាង ៥០លានដុល្លារ ។
ពាក់ព័ន្ធនឹងទីផ្សារអង្ករនៅអាហ្វ្រិក និងមជ្ឈឹមបូព៌ា អ្នកវិភាគលើកឡើងថា សង្ឃឹមថាក្រុមហ៊ុននាំចេញអង្ករទៅកាន់ទីផ្សារនោះអាចមានសមត្ថភាពថែរក្សាទីផ្សារដែលមានស្រាប់ឲ្យរឹងមាំ ហើយមានលំនឹង ។
សម្រាប់មជ្ឈឹមបូព៌ាអាចមិនជាអ្វីទេ ដោយសារតែទីផ្សារនោះ គឺជាទីផ្សារអ្នកមានតម្លៃមិនសូវជាចោទទេ ប៉ុន្តែសំខាន់ គឺគុណភាពដែលត្រូវធានាពិតប្រាកដពីព្រោះទីផ្សារនោះ គឺជាទីផ្សារក្រុមប្រទេសអ្នកមាន ហើយជាធម្មតាទេអ្នកមានគេយកចិត្តទុកដាក់បំផុត គឺគុណភាពនិងប្រណីតភាពនៃផលិតផលដែលនាំចូលទៅកាន់ទីផ្សារគេ ។
បញ្ហាដែលចោទគឺនៅអាហ្វ្រិក ដោយសារតែចម្ងាយវាឆ្ងាយ ហើយទីផ្សារនោះភាគច្រើន គឺមានស្ថានភាពសេដ្ឋកិច្ច និងធនធានប្រហាក់ប្រហែលយើង ដូច្នេះអ្នកនាំចេញអាចមានការថ្លឹងថ្លែងអាចត្រូវគិតគូរយុទ្ធសាស្ត្រទីផ្សារខ្លាំង ។
មកដល់ពេលនេះ ភាគច្រើនបំផុតនៃអង្ករកម្ពុជានាំចេញ គឺជាប្រភេទអង្ករប្រណីត ដោយនៅក្នុងនោះគេដឹងថា នៅក្នុងចំណោមបរិមាណអង្ករនាំចេញទាំងអស់ប្រភេទអង្ករក្រអូប គឺមានចំនួនដល់ទៅ ៧៧,៦៥% ប្រភេទអង្ករសគ្រាប់វែង១៥,៦១% អង្ករចំហ៊ុយ ៣,២៧% អង្ករសរីរាង្គចំនួន ២,៦១% និងអង្ករផ្សេងៗចំនួន ០,៨៦% ។
ក្រៅពីអង្ករប្រទេសកម្ពុជាក៏បាននាំចេញស្រូវចំនួនជាង៣,៨៧លោនតោនស្រូវសើម ដែលគិតជាទឹកប្រាក់បានប្រមាណជាង ៩១៤លានដុល្លារថែមទៀត ។
ដោយសារតែទំហំនាំចេញស្រូវមានបរិមាណច្រើនបែបនេះ កម្ពុជាអាចនៅមានសក្តានុពលពង្រីកទីផ្សារអង្ករថែមទៀត ដោយសារតែបរិមាណស្រូវដែលនាំចេញដោយមិនមានការកែច្នៃ គឺមានបរិមាណច្រើនបែបនេះទៅហើយនោះ ៕
ចែករំលែកព័តមាននេះ