ខេត្តប៉ៃលិន ៖ នៅថ្ងៃទី៦ ខែសីហា ឆ្នាំ២០២៥ ពលករខ្មែរប្រមាណជាង១ម៉ឺននាក់បានបន្តសម្រុកចេញពីប្រទេសថៃចូលមកកម្ពុជាវិញ តាមច្រកព្រំដែនអន្តរជាតិព្រំ ។ លោកជំទាវ បាន…
ខេត្តប៉ៃលិន ៖ នៅថ្ងៃទី៦ ខែសីហា ឆ្នាំ២០២៥ ពលករខ្មែរប្រមាណជាង១ម៉ឺននាក់បានបន្តសម្រុកចេញពីប្រទេសថៃចូលមកកម្ពុជាវិញ តាមច្រកព្រំដែនអន្តរជាតិព្រំ ។ លោកជំទាវ បាន ស្រីមុំ អភិបាលខេត្ត បានចាត់ឱ្យក្រុមការងាររបស់រដ្ឋបាលខេត្ត បន្តសម្របសម្រួលនិងដោះស្រាយជូនបងប្អូនពលករខ្មែរ ដែលមកពីប្រទេសថៃ វិលត្រឡប់ទៅស្រុកកំណើតវិញ ។
លោកជំទាវអភិបាលខេត្ត បានអំពាវនាវ និងជូនដំណឹងដល់បងប្អូនពលករខ្មែរ ដែលមានបំណងវិលត្រឡប់មកស្រុកកំណើតវិញ តាមច្រកទ្វារព្រំដែនអន្តរជាតិព្រំ ឬក្នុងករណីបងប្អូន កំពុងស្ថិតនៅក្នុងប្រទេសថៃ ជួបបញ្ហាមិនទាន់បើកប្រាក់ខែ និងគ្មានមធ្យោបាយធ្វើដំណើរមកដល់ព្រំដែនកម្ពុជាយើង តែមានបំណងចង់វិលត្រឡប់ទៅស្រុកកំណើតវិញ សូមទាក់ទងតាមរយៈទូរស័ព្ទលេខ ០៩៧ ៥ ៧៩ ៧៨ ៧៨ និងលេខ ០៨៨ ៣៦៩ ៦៦៦៦ ក្រុមការងារនឹងរង់ចាំជួយដោះស្រាយ និងសម្របសម្រួលជូន ២៤ម៉ោងលើ២៤ម៉ោង ។
ពលករខ្មែរកាន់តែច្រើនឡើងៗ បាននាំគ្នាសម្រុកចូលមកតាមច្រកព្រំដែនអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ហើយលោកជំទាវអភិបាលខេត្តប៉ៃលិន បានចុះពិនិត្យមើលក្រុមការងាររដ្ឋបាលខេត្ត សម្របសម្រួល និងដោះស្រាយជូនពលករក្មេងចាស់ប្រុសស្រី ដែលកំពុងធ្វើដំណើរមកពីប្រទេសថៃ វិលត្រលប់ទៅស្រុកកំណើតវិញ ដែលនៅថ្ងៃនេះបានកើនឡើងរហូតដល់ចំនួន ១១ ៧២៥នាក់ ក្នុងនោះមានស្រីចំនួន ៤ ៣២៤នាក់ ។
បើតាមប្រភពព័ត៌មានពីលោកជំទាវ បាន ស្រីមុំ អភិបាលខេត្តប៉ៃលិន បានមានប្រសាសន៍ថា ដើម្បីសម្រួលការធ្វើដំណើរត្រឡប់មកស្រុកកំណើតវិញ រដ្ឋបាលខេត្តបានជូនដំណឹងដល់បងប្អូនពលករខ្មែរ ដែលកំពុងស្នាក់នៅធ្វើការនៅប្រទេសថៃ ឱ្យត្រឡប់មកមាតុភូមិវិញ មុនពេលអាជ្ញាធរថៃ បណ្តេញចេញ ឬធ្វើការប្រមាថមើលងាយណាមួយ ដោយរង់ចាំទទួលទាំងអស់ឱ្យតែជាជនជាតិខ្មែរ ទោះបីជាមានឯកសារ ឬមិនមានឯកសារគ្រប់គ្រាន់ក៏ដោយ ហើយជាក់ស្តែងនៅច្រកទ្វារព្រំដែនអន្តរជាតិព្រំ ខេត្តប៉ៃលិន គឺមានបងប្អូនពលករខ្មែរ បានធ្វើដំណើរឆ្លងព្រំដែន ត្រឡប់មកកម្ពុជាវិញជារៀងរាល់ថ្ងៃ ។
នៅក្នុងថ្ងៃទី៦ សីហា ២០២៥ គឺកើនឡើងគួរឱ្យកត់សម្គាល់រហូតដល់ជាងមួយម៉ឺននាក់ ដោយរដ្ឋបាលខេត្ត បានសហការជាមួយ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំទីតាំងត្រៀមទទួលបងប្អូនពលករ នៅក្បែរព្រំដែន ដើម្បីសម្រួលទាំងការស្នាក់នៅបណ្ដោះអាសន្ន ការហូបចុក ការថែទាំព្យាបាលសុខភាព និងជូនដំណើរវិលត្រលប់ទៅស្រុកកំណើតវិញ ដោយឥតគិតថ្លៃ ព្រមទាំងជួយរកការងារជូនបងប្អូនពលករផងដែរ ។
លោកជំទាវអភិបាលខេត្ត បានបញ្ជាក់ថា បន្ទាប់ពីប្រទេសថៃបានបង្កសង្គ្រាមឈ្លានពាន រយៈពេល៥ថ្ងៃ នៅតាមព្រំដែនជាមួយកម្ពុជា ក្នុងរយៈពេលកន្លងមកនេះ សង្កេតឃើញថា មានបងប្អូនពលករខ្មែរកាន់តែច្រើនឡើងៗ បានសម្រុកចាកចេញពីប្រទេសថៃ វិលត្រឡប់មកស្រុកកំណើតវិញ តាមច្រកទ្វារព្រំដែនមួយចំនួន រួមទាំងច្រកទ្វារព្រំដែនអន្តរជាតិព្រំ ខេត្តប៉ៃលិនផងដែរ ។ សូមបញ្ជាក់ថា ប៉ុន្មានថ្ងៃចុងក្រោយនេះពលករខ្មែរសម្រុកចូលមកស្រុកខ្មែរវិញកើនឡើងដល់ ៤០ ២២០នាក់ ក្នុងនោះ(ស្រីចំនួន ១៦ ៨៦១នាក់) ៕
ចែករំលែកព័តមាននេះ