ប្រទេស​ថៃ ៖ លោកស្រី Nualphan Lamsam ឬ Madam Pang ប្រធាន​សមាគម​កីឡាបាល់ទាត់​ថៃ ហៅ​កាត់​ថា FAT បាន​ចេញ​បញ្ជា​ឱ្យ​ដាក់​វិន័យ​យ៉ាង​តឹងរ៉ឹង​លើ​កីឡាករ​ក្នុងស្រុក​ម្នាក់ ដែល​បាន​ដេញ​វាយ​អាជ្ញាកណ្តាល​នៅ​លើ​ទីលាន អំឡុង​ការ​ប្រកួត​ពានរង្វាន់​មួយ កាលពី​ពេល​ថ្មី​ៗ​កន្លង​ទៅ​។

នៅ​ក្នុង​ការ​ប្រកួត​ពានរង្វាន់​ក្នុងស្រុក Pang Aai Open Cup កាលពី​ថ្ងៃ​ទី​៣ ខែសីហា ឆ្នាំ​២០២៥ កន្លង​ទៅ កីឡាករ Paramachot Duangmit របស់​ក្រុម Ueang Fah A បាន​បង្កកំហុស​ធ្ងន់ធ្ងរ​ប៉ះទង្គិច​ដ៏​គ្រោះថ្នាក់​ជាមួយ​កីឡាករ​ម្នាក់​របស់​ក្រុម Creative FC ហើយ​ត្រូវ​បាន​អាជ្ញាកណ្តាល លោក Siwakorn Singthana សម្រេច​ពិន័យ​កាត​ក្រហម​ភ្លាម​ៗ​។ ទោះ​យ៉ាងណា​ក៏​ដោយ កីឡាករ​បង្កកំហុស​ក្រុម Ueang Fah A បង្ហាញ​ការ​ខឹងសម្បារ​យ៉ាង​ខ្លាំង​ដោយ​បាន​ដាល់​មុខ​អាជ្ញាកណ្តាល​ពីរ​ដៃ មុន​ពេល​បន្ត​រត់​ដេញចាប់​អាជ្ញាកណ្តាល ហើយ​ចាប់​ក្បាល​របស់​គាត់ និង​បន្ត​វាយ​គាត់​បន្ថែម​ទៀត​។ នេះ​បើ​តាម​រូបភាព​ដែល​បាន​ចែករំលែក​ដោយសារ​ព័ត៌មាន Thairath ។

ជា​លទ្ធផល លោក​អាជ្ញាកណ្តាល​ត្រូវ​បាន​បញ្ជូន​ទៅ​កាន់​មន្ទីរពេទ្យ​ដោយ​មាន​ស្នាម​ជាំ​លើ​មុខ ហើយ​ក្រោយមក​បាន​ដាក់​ពាក្យបណ្តឹង​ទៅ​មន្ត្រី​មាន​សមត្ថកិច្ច​។ ចំណែក​កីឡាករ​ដែល​វាយ​អាជ្ញាកណ្តាល បាន​បិទ​គណនី​បណ្តាញ​សង្គម​របស់​ខ្លួន ចាប់តាំងពី​ពេល​នោះ​មក​។ ប្រភព​ពី​ព័ត៌មាន​ក្នុងស្រុក​បានឱ្យ​ដឹង​ថា លោក​អាជ្ញាកណ្តាល Siwakorn គឺជា​សមាជិក​នៃ​គណៈកម្មាធិការ​អាជ្ញាកណ្តាល FAT ហើយ​បច្ចុប្បន្ន​ជា​មន្ត្រី​ក្នុង​ក្រប​ខណ្ឌ​លី​គ​លំដាប់​ទី​៣​ថៃ (Thai League 3) ដែល​ជា​ផ្នែក​មួយ​នៃ​ប្រព័ន្ធ​បាល់ទាត់​អាជីព​របស់​ប្រទេស​នេះ​។

ពាក់ព័ន្ធ​បញ្ហា​នេះ Madam Pang បាន​ដឹកនាំ FAT ដើម្បី​រ៉ាប់រង​ថ្លៃ​ព្យាបាល​ទាំងស្រុង​សម្រាប់​លោក Siwakorn ។ ប្រធាន FAT បាន​ប្រាប់​សារព័ត៌មាន​ក្នុងស្រុក Siamsport ថា «​គ្រប់​ទម្រង់​នៃ​អំពើ​ហឹ​ង្សា មិន​ថា​នៅ​លើ ឬ​ក្រៅ​ទីលាន​នោះ​ទេ ត្រូវ​តែ​ត្រូវ​បាន​ថ្កោលទោស​។ កីឡាករ​ដែល​បំពាន​គោលការណ៍​ទាំងនេះ នឹង​ត្រូវ​ទទួល​ទណ្ឌកម្ម​យ៉ាងធ្ងន់ធ្ងរ​។ ខ្ញុំ​មិន​ចង់​ឃើញ​អំពើ​ហិង្សា​បែប​នេះ​ម្ដងទៀត​ក្នុង​វិស័យ​បាល់ទាត់​ថៃ​នោះ​ទេ​»​។

អំពើ​ហឹ​ង្សា​ដែល​ធ្វើ​ឱ្យ​ខូច​មុខមាត់​កីឡាបាល់ទាត់​ថៃ តែងតែ​ត្រូវ​ពិន័យ​ជា​ទម្ងន់ រួម​ទាំង​ការ​ព្យួរ​ការ​ប្រកួត​ពី ២ ទៅ ៤ ប្រកួត និង​ពិន័យ​ជា​ប្រាក់​ពី ៤​ម៉ឺន ទៅ ៦ ម៉ឺន​បាត ឬ​ពី ១ ២០០ ទៅ ១ ៨០០​ដុល្លារ​។

អំពើ​ហិង្សា​កើតឡើង​នៅ​ទីលាន​បាល់ទាត់​ថៃ​បាន​កើនឡើង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​។ តួយ៉ាង កាលពី​ខែកុម្ភៈ ឆ្នាំ​២០២៥ កីឡាករ Songkran Puangnoi ត្រូវ​បាន​បញ្ចប់​កិច្ចសន្យា​ដោយ​ក្លិប Hua Hin City ដែល​ខ្លួន​ប្រកប​អាជីព បន្ទាប់​ពី​រូបគេ​បាន​វាយ​អាជ្ញាកណ្តាល និង​គូប្រកួត​អំឡុង​ពេល​ការ​ប្រកួត​ជាមួយ​ក្រុម Rajpracha ក្នុង Thai League 3​។ ចំណែក​កាលពី​ការ​ប្រកួត​វគ្គ​ផ្តាច់ព្រ័ត្រ​កីឡា​ស៊ី​ហ្គេ​ម (SEA Games) ឆ្នាំ ២០២៣ ដែល​កម្ពុជា​ធ្វើ​ជា​ម្ចាស់ផ្ទះ កីឡាករ និង​គ្រូបង្វឹក​មក​ពី​ក្រុម U23 ថៃ ក៏​បាន​ប៉ះទង្គិច​គ្នា​យ៉ាង​ខ្លាំង​ជាមួយ​កីឡាករ និង​សមាជិក​គ្រូបង្វឹក​ឥណ្ឌូ​ណេ​ស៊ី ដែល​បណ្តាល​ឱ្យ​មានការ​ពិន័យ​ជា​បន្តបន្ទាប់​។

សូម​ជម្រាប​ថា Madam Pang វ័យ​៥៩​ឆ្នាំ គឺជា​បុគ្គល​លេចធ្លោ​ក្នុង​វិស័យ​បាល់ទាត់​ថៃ​អស់​រយៈពេល​ជិត​មួយ​ទសវត្សរ៍​មក​ហើយ​។ ចាប់ពី​ឆ្នាំ​២០១៥ ដល់​ឆ្នាំ​២០១៩ លោកស្រី​គឺជា​អ្នកចាត់ការ​ទូទៅ​នៃ​ក្រុម​ជម្រើសជាតិ​នារី​ថៃ អំឡុង​ការ​ប្រកួត World Cup ឆ្នាំ​២០១៥ និង​២០១៩​។ ក្រោយមក​លោកស្រី​បាន​បម្រើ​ការ​ជា​អ្នកចាត់ការ​ទូទៅ​ក្រុម​ជម្រើសជាតិ​បុរស ដែល​បាន​ឈ្នះ​ពានរង្វាន់ AFF Cup ឆ្នាំ ២០២០ និង​ឆ្នាំ ២០២២​។ នៅ​ខែកុម្ភៈ ឆ្នាំ​២០២៤ លោកស្រី​ត្រូវ​បាន​ជ្រើសរើស​ជា​ប្រធាន FAT ដោយ​បាន​ក្លាយជា​ស្ត្រី​ដំបូង ដែល​កាន់​តំណែង​នេះ​។ ក្រៅ​អំពី​ការងារ​បាល់ទាត់ Madam Pang ដែល​កើត​ចេញពី​គ្រួសារ​ដ៏​មានទ្រព្យ​សម្បត្តិ​ច្រើន​បំផុត និង​លេចធ្លោ​បំផុត​របស់​ប្រទេស​ថៃ ក៏​ជា​អ្នកជំនួញ និង​ជា​ប្រធាន​ក្រុមហ៊ុន Muang Thai Insurance Group ផង​ដែរ​៕ ដកស្រង់ ៖ VnExpress និង Lao Dong