ឥណ្ឌូណេស៊ីតាមដានយ៉ាងដិតដល់នូវស្ថានការណ៍ថៃ និងកម្ពុជា ខណៈកីឡាស៊ីហ្គេមខិតជិតមកដល់
ទីក្រុងហ្សាការតា ៖ រដ្ឋមន្ត្រីក្រសួងយុវជន និងកីឡារបស់ប្រទេសឥណ្ឌូណេស៊ី លោក Dito Ariotedjo បានថ្លែងកាលពីថ្ងៃទី២៨ ខែកក្កដា ឆ្នាំ២០២៥…
ទីក្រុងហ្សាការតា ៖ រដ្ឋមន្ត្រីក្រសួងយុវជន និងកីឡារបស់ប្រទេសឥណ្ឌូណេស៊ី លោក Dito Ariotedjo បានថ្លែងកាលពីថ្ងៃទី២៨ ខែកក្កដា ឆ្នាំ២០២៥ ថា ក្រសួងរបស់លោកកំពុងតាមដានយ៉ាងដិតដល់នូវស្ថានការណ៍រវាងថៃ និងកម្ពុជា មុនពេលព្រឹត្តិការណ៍កីឡាអាស៊ីអាគ្នេយ៍ (SEA Games) លើកទី៣៣ នៅចុងឆ្នាំនេះ ដែលថៃធ្វើជាម្ចាស់ផ្ទះ ចូលមកដល់។ នេះបើយោងតាមប្រភពពីសារព័ត៌មានអង់តារាឥណ្ឌូណេស៊ី (Antara) បានចេញផ្សាយ។
ប្រភពដដែលបន្តថា ការវិវឌ្ឍន៍នៃស្ថានការណ៍ថៃ-កម្ពុជា នឹងក្លាយជាកត្តាកំណត់ការចូលរួមរបស់ឥណ្ឌូណេស៊ីនៅក្នុងព្រឹត្តិការណ៍កីឡាស៊ីហ្គេមឆ្នាំ២០២៥ ដែលនឹងចាប់ផ្តើមពីថ្ងៃទី៩ ដល់ថ្ងៃទី២០ ខែធ្នូ នៅក្នុងទីក្រុងបាងកក ឈុនបុរី និងសុងក្លា។ លោករដ្ឋមន្ត្រីកីឡាឥណ្ឌូណេស៊ីបានប្រាប់ប្រព័ន្ធផ្សព្វផ្សាយក្នុងស្រុកកាលពីថ្ងៃទី២៨ ខែកក្កដា ឆ្នាំ២០២៥ដូច្នេះថា «ពិតណាស់ ក្រសួងយុវជន និងកីឡា រួមជាមួយគណៈកម្មាធិការជាតិអូឡាំពិកឥណ្ឌូណេស៊ី (NOC) កំពុងតែបន្តតាមដានការវិវឌ្ឍន៍ចុងក្រោយបង្អស់ក្នុងការប៉ះទង្គិចគ្នារវាងថៃ និងកម្ពុជា មុនការសម្រេចចិត្តទាក់ទងនឹងកីឡាស៊ីហ្គេម»។
ឥណ្ឌូណេស៊ីមិនទាន់ធ្វើការសម្រេចចិត្តច្បាស់លាស់ទាក់ទងនឹងការចូលរួមរបស់ខ្លួន នៅក្នុងកីឡាស៊ីហ្គេមនោះទេ។ លោករដ្ឋមន្ត្រីបានសង្កត់ធ្ងន់ថា ក្រសួងរបស់លោកនឹងផ្តល់អាទិភាពលើសុវត្ថិភាព និងសុខុមាលភាពរបស់ភាគីឥណ្ឌូណេស៊ី ដោយសម្របតាមវិធីសាស្ត្ររបស់ខ្លួនដោយផ្អែកលើស្ថានភាពជម្លោះ។ ប៉ុន្តែទោះបីមានការប្រែប្រួលក៏ដោយ លោកបញ្ជាក់ថា ការត្រៀមខ្លួនរបស់ឥណ្ឌូណេស៊ីសម្រាប់កីឡាស៊ីហ្គេមកំពុងបន្ត ខណៈអត្តពលិកកំពូលៗពីវិញ្ញាសាកីឡាផ្សេងៗកំពុងចូលរួមក្នុងជំរុំហ្វឹកហាត់ថ្នាក់ជាតិ ដើម្បីត្រៀមប្រកួតនៅចុងឆ្នាំនេះ។
ការលើកឡើងរបស់រដ្ឋមន្ត្រីកីឡារបស់ឥណ្ឌូណេស៊ីកើតឡើងប៉ុន្មានថ្ងៃប៉ុណ្ណោះ បន្ទាប់ពីរដ្ឋមន្ត្រីក្រសួងយុវជន និងកីឡាប្រទេសម៉ាឡេស៊ី អ្នកស្រី Hannah Yeoh កាលពីថ្ងៃទី២៦ ខែកក្កដា ឆ្នាំ២០២៥ បានថ្លែងថា ម៉ាឡេស៊ីកំពុងតែតាមដានយ៉ាងដិតដល់នូវជម្លោះរវាងប្រទេសថៃ និងកម្ពុជា ហើយសង្ឃឹមថា ការប៉ះទង្គិចគ្នាតាមព្រំដែនរវាងប្រទេសទាំងពីរនឹងត្រូវបានដោះស្រាយ មុនពេលការប្រកួតព្រឹត្តិការណ៍កីឡាស៊ីហ្គេមលើកទី៣៣ ចូលមកដល់។
ដោយនៅពេលនោះ អ្នកស្រីបានថ្លែងយ៉ាងដូច្នេះថា «ក្រុមប្រឹក្សាកីឡាជាតិម៉ាឡេស៊ី នឹងរង់ចាំការណែនាំបន្ថែមពីក្រសួងមហាផ្ទៃ និងក្រសួងការបរទេស។ យើងមានការព្រួយបារម្ភអំពីបញ្ហានេះ ប៉ុន្តែនាយករដ្ឋមន្ត្រីរបស់យើង លោក អាន់វ៉ា អ៊ីប្រាហីម (Anwar Ibrahim) កំពុងប្រឹងប្រែងអស់ពីសមត្ថភាព ដើម្បីជជែកជាមួយមេដឹកនាំប្រទេសទាំងពីរ។ ជាមួយគ្នានោះក៏មានកិច្ចពិភាក្សានៅក្នុងគណៈរដ្ឋមន្ត្រី ហើយយើងចង់បានសន្តិភាពសម្រាប់ការប្រកួតនៅទីនោះ»។ នេះបើតាមប្រភពសារព័ត៌មានម៉ាឡេស៊ី Bernama, New Straits Times និង The Sun បានចេញផ្សាយ។
គិតចាប់ពីវេលាម៉ោង១២រំលងអធ្រាត្រឈានចូលថ្ងៃទី២៩ ខែកក្កដា ឆ្នាំ២០២៥ ការប៉ះទង្គិចគ្នារវាងថៃ និងកម្ពុជាបានស្ងប់ស្ងាត់ ដែលកើតចេញពីការព្រមព្រៀងគ្នាលើបទឈប់បាញ់ ជាលទ្ធផលពីកិច្ចប្រជុំពិសេសនៅទីក្រុងកូឡាឡាំពួរ ដែលមានម៉ាឡេស៊ីធ្វើជាម្ចាស់ផ្ទះ សហរដ្ឋអាមេរិកជាសហអ្នករៀបចំ និងមានការចូលរួមពីតំណាងចិន កាលពីថ្ងៃទី២៨ ខែកក្កដា ឆ្នាំ២០២៥ កន្លងទៅ៕
ចែករំលែកព័តមាននេះ