ខេត្តសៀមរាប៖ ប្រជាពលរដ្ឋខ្មែរជាច្រើននាក់ ​បានបួងសួង​បន់ស្រន់​ដល់បារមីស័ក្តិសិទ្ធិនៅអង្គរ
សុំសេចក្តីសុខ និងសុំពរជ័យដល់ ​កងទ័ពជួរមុខកម្ពុជាឱ្យឈ្នះគ្រប់សមរភូមិក្នុងសង្គ្រាមការពារទឹកដីពីការឈ្លានពានរបស់ទាហានសៀម។

សូមបញ្ជាក់ជូនថា តំបន់អង្គរមិនត្រឹមតែជាទីកន្លែងល្បីល្បាញខាងវប្បធម៌ ប្រវត្តិសាស្ត្រ និងជាសម្បត្តិបេតិកភណ្ឌពិភពលោកដែលទាក់ទាញចំណាប់អារម្មណ៍ពីជុំវិញពិភពលោកនោះទេ ប៉ុន្តែវាថែមទាំងត្រូវបានប្រជាពលរដ្ឋខ្មែរចាត់ទុកថាជាទីសក្ការបូជាដ៏ស័ក្តិសិទ្ធិ ដែលពោរពេញទៅដោយអំណាចបារមីនៃព្រះអាទិទេពនានា។

បើតាមអាជ្ញាធរជាតិអប្សរា បានឱ្យដឹងថាជារៀងរាល់ថ្ងៃ ប្រជាពលរដ្ឋខ្មែរជាច្រើន ទាំងអ្នករស់នៅខេត្តសៀមរាប និងអ្នកដែលមកពីតាមបណ្ដាខេត្តនានា ក៏ដូចជាជនបរទេសមួយចំនួន តែងនាំយកគ្រឿងសក្ការបូជា មានដូចជា ទៀន ធូប ផ្កា និងផ្លែឈើ ជាដើម ទៅថ្វាយ និងធ្វើគារវកិច្ចគោរពបូជាបន់ស្រន់។ ការបន់ស្រន់ទាំងនេះមានគោលបំណងសុំសេចក្តីសុខ និងប៉ងប្រាថ្នាផ្សេងៗ។ ​

ពួកគេក៏ជឿជាក់ថា បារមីនៅអង្គរនឹងជួយចម្លង និងការពារពួកគាត់ឱ្យផុតពីគ្រោះភ័យ ហើយជួបតែសេចក្តីសុខ និងភាពចម្រុងចម្រើន។ ជាពិសេស ពួកគេបន់ស្រន់សូមឱ្យប្រទេសជាតិកម្ពុជារួចផុតពីសង្គ្រាម ពីជំងឺផ្សេងៗ និងមានភាពសម្បូរសប្បាយជានិច្ចនិរន្តរ៍៕

​