ខេត្តមណ្ឌលគិរី ៖ ជាខេត្តមួយដែលសម្បូរទៅដោយតំបន់ទេសចរណ៍ធម្មជាតិ មានព្រៃភ្នំច្រើន និងមានខ្យល់អាកាសល្អបរិសុទ្ធទៀតផងនោះ ខេត្តមណ្ឌលគិរីបានក្លាយជាកន្លែងទេសចរណ៍ដ៏ទាក់ទាញដូចជា រមណីយដ្ឋានធម្មជាតិ ភ្នំដោះក្រមុំ ទឹកជ្រោះដំណាក់ស្តេច ទឹកធ្លាក់ជ្រៃធំ ទឹកជ្រោះប៊ូស្រា និងមានកន្លែងជាច្រើនទៀតកំពុងតែមានការអភិវឌ្ឍ ។
លោកងិន សុវិមាន ប្រធានមន្ទីរទេសចរណ៍ខេត្តបានឱ្យដឹងថា ភ្ញៀវទេសចរមកទស្សនាកម្សាន្ត នៅខេត្តនេះតែងតែនាំគ្នាជួលដំរីជិះដើរកម្សាន្តហើយនៅក្នុងខេត្តមានដំរីទេសចរណ៍ចំនួនជាង១០ក្បាល ។ នៅក្នុងឆមាសទី១ឆ្នាំ២០១១នេះ ភ្ញៀវទេសចរមកលេងនៅខេត្តមណ្ឌលគិរីមានចំនួន៣៦.៥១៧នាក់ ក្នុងនោះមានភ្ញៀវអន្តរជាតិចំនួន២.៥៣៧នាក់ បើប្រៀបធៀបទៅនឹងឆ្នាំ២០១០ គឺមានការកើនឡើង៤៧,១៤% ហើយភាគច្រើនមកលេងនៅថ្ងៃបុណ្យទានដូចជា ថ្ងៃចូលឆ្នាំសាកល ទិវា៨ មីនា ថ្ងៃចូលឆ្នាំថ្មីប្រពៃណីជាតិ និងថ្ងៃបុណ្យផ្សេងៗទៀត ។ លោកប្រធានមន្ទីរបន្តថា ការកើនឡើងនៃភ្ញៀវទេសចរក៏ព្រោះតែមានផ្លូវល្អ ពីស្រុកស្នួល ខេត្តក្រចេះ មកដល់ក្រុងសែនមនោរម្យខេត្តមណ្ឌលគិរី និងមានការផ្សព្វផ្សាយដ៏ទូលំទូលាយពីមួយឆ្នាំទៅមួយឆ្នាំរបស់ក្រសួងទេសចរណ៍ និងមន្ទីរទេសចរណ៍ផងដែរ ។ លោកបានបន្ថែមទៀតថា លោកនឹងខិតខំធ្វើឱ្យវិស័យទេសចរណ៍នៅខេត្តមណ្ឌលគិរីកាន់តែមានការរីកចម្រើនថែមទៀត នៅបណ្តាឆ្នាំខាងមុខ ។
ជាការពិតណាស់ ការអភិវឌ្ឍជំហានដំបូងនោះគឺការកសាងផ្លូវដែលបច្ចុប្បន្នផ្លូវធ្វើដំណើរទៅកាន់ខេត្តភាគឦសានមួយនេះមិនមានបញ្ហាចោទទេ ។ ដោយសារការធ្វើដំណើរតាមដងផ្លូវជាតិថ្មីសន្លាងធ្វើឱ្យកំណើនអ្នកទេសចរមានចំនួនកាន់តែច្រើនឡើងៗ ព្រោះសម្រស់ធម្មជាតិនៅខេត្តមណ្ឌលគិរីមានលក្ខណៈធម្មជាតិ និងស្រស់បំព្រងគួរឱ្យទាក់ទាញបំផុត ៕
ចែករំលែកព័តមាននេះ