រាជធានីភ្នំពេញ ៖ អង្គការអន្តរជាតិហ្វ្រង់កូហ្វូនី (OIF) ដែលមានប្រទេសជាសមាជិក៩៣ (ប្រើប្រាស់ភាសាបារាំង) បានចេញសេចក្ដីថ្លែងការណ៍ អំពាវនាវឲ្យប្រទេសថៃ គោរពសេចក្តីសម្រេចរបស់តុលាការយុត្តិធម៌អន្តរជាតិ ក្នុងសំណុំរឿងព្រំដែនជាមួយកម្ពុជា…
រាជធានីភ្នំពេញ ៖ អង្គការអន្តរជាតិហ្វ្រង់កូហ្វូនី (OIF) ដែលមានប្រទេសជាសមាជិក៩៣ (ប្រើប្រាស់ភាសាបារាំង) បានចេញសេចក្ដីថ្លែងការណ៍ អំពាវនាវឲ្យប្រទេសថៃ គោរពសេចក្តីសម្រេចរបស់តុលាការយុត្តិធម៌អន្តរជាតិ ក្នុងសំណុំរឿងព្រំដែនជាមួយកម្ពុជា ដោយបានគូសបញ្ជាក់ថា តុលាការយុត្តិធម៌អន្តរជាតិបានកាត់ឲ្យកម្ពុជា ឈ្នះក្តីពីរលើកមកហើយគឺនៅឆ្នាំ១៩៦២ និងឆ្នាំ ២០១៣ ។
ក្នុងសេចក្ដីថ្លែងការណ៍ ធ្វើនៅទីក្រុងប៉ារីស ចុះថ្ងៃទី៣០ កក្កដា ២០២៥ បង្ហាញថា លោកស្រី Louise Mushikiwabo ស្វាគមន៍ការបញ្ចប់បទឈប់បាញ់ ដោយកម្ពុជា និងថៃ “ភ្លាមៗ និងគ្មានលក្ខខណ្ឌ” ។
លោកស្រី បានមានប្រសាសន៍ថា “យើងសូមសរសើរអ្នកពាក់ព័ន្ធទាំងអស់ សម្រាប់ការបន្តកិច្ចសន្ទនាយ៉ាងឆាប់រហ័សរបស់ពួកគេ ដែលជាសញ្ញា នៃការប្តេជ្ញាចិត្តរបស់ពួកគេចំពោះសន្តិភាព និងស្មារតី នៃកិច្ចសហប្រតិបត្តិការ ដែលមានសារៈសំខាន់ចំពោះស្ថិរភាពក្នុងតំបន់” ។
លោកស្រី ជំរុញឱ្យប្រទេសទាំងពីរ អនុវត្តកិច្ចព្រមព្រៀងនេះឱ្យមានប្រសិទ្ធភាព ដែលជាជំហានសំខាន់មួយឆ្ពោះទៅរកសន្តិភាពយូរអង្វែង ។
ក្នុងបរិបទនេះ លោកស្រីបង្ហាញពីសាមគ្គីភាពពេញលេញជាមួយប្រទេសកម្ពុជា ដែលនឹងធ្វើជាម្ចាស់ផ្ទះ នៃកិច្ចប្រជុំកំពូលលើកទី២០ របស់ឡាហ្វ្រង់កូហ្វូនី នៅឆ្នាំ២០២៦ ។
លោកស្រីអគ្គលេខាធិការ អង្គការអន្តរជាតិហ្វ្រង់កូហ្វូនី រំលឹកឡើងវិញ ពីសារៈសំខាន់ នៃច្បាប់អន្តរជាតិ ក្នុងការដោះស្រាយជម្លោះដោយសន្តិវិធី និងអំពាវនាវឱ្យមានការគោរពចំពោះសេចក្តីសម្រេច ដែលបានចេញក្នុងឆ្នាំ 1962 និង 2013 ដោយតុលាការយុត្តិធម៌អន្តរជាតិ ទាក់ទងនឹងជម្លោះព្រំដែនរវាងប្រទេសទាំងពីរ ៕
ចែករំលែកព័តមាននេះ