ADផ្ទាំងផ្សព្វផ្សាយពាណិជ្ជកម្ម

វត្តភ្នំហាន់ជ័យមានបារមីពូកែ អ្នកមិនមានកូនតែងតែមកបួងសួងហើយក៏មានកូនដូចបំណង

3 ម៉ោង មុន

កំពង់ចាម
២៩ ខែ កក្កដា ឆ្នាំ ២០២៥ ម៉ោង ១៦:២៦

ខេត្តកំពង់ចាម: វត្តភ្នំហាន់ជ័យស្ថិតនៅប្របតាមដងទន្លេមេគង្គក្នុងឃុំហាន់ជ័យស្រុកកំពង់សៀម នៅលើទីទួលធំទូលាយជាមួយនោះមានសាលាឆាន់ព្រះវិហារព្រមទាំងសមិទ្ធផលផ្សេងទៀត។ទីនេះតែងតែមានភ្ញៀវជាតិនិងអន្តរជាតិធ្វើដំណើរមកលេងជារៀងរាល់ថ្ងៃ អ្នកខ្លះបានបួងសួងប្រាថ្នាសុំអ្វីមួយតែងតែបានដូចបំណង ហើយថែមទាំងមានបារមីស័កសិទ្ធិពូកែទៀតផង។ លោកតាអាចារ្យព្រោន សេង អាយុ៧៤ ឆ្នាំនៅវត្តហាន់ជ័យ មានប្រសាសន៍ឲ្យដឹងនៅព្រឹកថ្ងៃទី២៨កក្កដា…

លោកតាអាចារ្យព្រោន សេង អាយុ៧៤ ឆ្នាំនៅវត្តហាន់ជ័យ មានប្រសាសន៍ឲ្យដឹងនៅព្រឹកថ្ងៃទី២៨កក្កដា ឆ្នាំ២០២៥ ថា: រូបគាត់បានមកធ្វើជាអាចារ្យវត្តនៅទីនេះតាំងពីមុនមកដល់សព្វថ្ងៃបានរយៈពេល១៥ឆ្នាំហើយ ជារឿយៗតែងតែឃើញពុទ្ធបរិស័ទជិតឆ្ងាយដែលមានជំនឿលើព្រះពុទ្ធសាសនាធ្វើដំណើរមកអុជធូបបួងសួងសុំសេចក្តីសុខក្នុងក្រុមគ្រួសារនិងខ្លះទៀតដែលរៀបការយូរឆ្នាំហើយមិនមានកូនលុះពេលមកបួងសួងនៅទីអារាមនេះ ក្រោយមកក៏មានកូនដូចបំណងប្រាថ្នា។

លោកតាអាចារ្យរូបនេះបានបន្តឲ្យដឹងទៀតថា រាល់ថ្ងៃទីអារាមមួយនេះត្រូវបានគ្រប់គ្រងដោយព្រះមេគណខេត្តព្រះគ្រូប៊ត តាំងឆេង និងជាព្រះចៅអធិការវត្តភ្នំហាន់ជ័យ ដោយសារព្រះអង្គបួសរៀនព្រះធម៌ច្រើនវស្សា គឺមានប្រជាពលរដ្ឋក្នុងនោះខ្លះជាអាជីវករលក់ដូរ បានមកឱ្យចៅអធិការវត្តជួយធ្វើខ្សែគាតថាសម្រាប់យកទៅរកស៊ី ដោយទទួលបានពរជ័យអ្នកនោះបានរកចេះតែចំណេញនិងចម្រុងចម្រើនក្នុងក្រុមគ្រួសារ។រហូតដល់មានសទ្ធាជ្រះថ្លាជួយកសាងសមិទ្ធផលក្នុងបរិវេណវត្តភ្នំហាន់ជ័យដូចជាសាលាឆាន់ ព្រះវិហារ កុដិសម្រាប់ព្រះសង្ឃគង់រៀនព្រះធម៌។

ជាក់ស្ដែងនៅព្រឹកថ្ងៃទី២៨កក្កដា ឯកឧត្តមខ្លូតផន ប្រធានក្រុមប្រឹក្សាខេត្ត ឯកឧត្តមអ៊ុន ចាន់ដា អភិបាលខេត្តព្រមទាំងមន្ត្រីរាជការជាច្រើនរូបបានយកទៀនវស្សាមកប្រគេនព្រះចៅអធិការវត្ត ព្រមទាំងបានអុជធូបបួងសួងដល់ទេវតា ឲ្យតាមជួយថែរក្សាដល់កងកម្លាំងវីរៈយុទ្ធជនដែលកំពុងតែជាប់ដៃប្រយុទ្ធនៅព្រំដែនកម្ពុជា-ថៃ ឱ្យទទួលបានជោគជ័យនិងឈ្នះលើមារសត្រូវទៀតផង។

លោកតាអាចារ្យព្រោន សេង បញ្ជាក់ថា ក្នុងរដូវបុណ្យភ្ជុំខាងមុខព្រះចៅអធិការវត្តតែងតែជួលក្រុមតន្ត្រីមកដាក់នៅបរិវេណវត្តឱ្យបងប្អូនប្រជាពលរដ្ឋមកពីគ្រប់ទិសទីរាំកំសាន្តសប្បាយលេងហើយឱកាសបុណ្យចូលឆ្នាំថ្មីប្រពៃណីជាតិខ្មែរក៏ដូច្នោះដែរ។ មានពេលខ្លះជួលតារាកំប្លែងមកសម្ដែងដើម្បីឲ្យប្រជាពលរដ្ឋមើលនិងរាំកម្សាន្តលេងក្នុងទិដ្ឋភាពមនុស្សច្រើនកុះករ។

លោកសឹង ភារម្យ ប្រធានមន្ទីរវប្បធម៌និងវិចិត្រសិល្បៈខេត្តបានឲ្យដឹងនារសៀលថ្ងៃទី២៨កក្កដាថា នៅលើបរិវេណវត្តភ្នំហាន់ជ័យគឺមានប្រសាទគុកខាងត្បូងសង់អំពីឥដ្ឋក្នុងសម័យចេនឡាសតវត្សទី៧ ដោយឆ្លងកាត់ពីសម័យមួយទៅសម័យមួយ។ពិសេសពេលដែលឆ្លងកាត់ភ្លើងសង្គ្រាមធ្វើឲ្យតួប្រាសាទផ្នែកខាងក្រោមត្រូវបានបាក់បែកហើយមកដល់សព្វថ្ងៃនេះត្រូវបានក្រុមបច្ចេកទេសរបស់ក្រសួងវប្បធម៌ ធ្វើការជួសជុលស្អាតឡើងវិញ។ហើយតំបន់នេះក៏ជាកន្លែងទេសចរណ៍មួយសំខាន់ទាក់ទាញមនុស្សមកលេងច្រើនក្នុងរដូវបុណ្យទានតែម្ដង ៕