ទីក្រុងប៉េកាំង ៖ ឪពុកម្តាយនៅក្នុងប្រទេសចិនកំពុងត្រូវបានផ្តល់ប្រាក់ឧបត្តម្ភចំនួន ៣ ៦០០យន់ ឬស្មើ ៥០០ដុល្លារអាមេរិកក្នុងមួយឆ្នាំ សម្រាប់ការចិញ្ចឹមបីបាច់កូនពួកគេក្នុងម្នាក់ ដែលមានអាយុក្រោម៣ឆ្នាំ ដូច្នេះមានន័យថា…
ទីក្រុងប៉េកាំង ៖ ឪពុកម្តាយនៅក្នុងប្រទេសចិនកំពុងត្រូវបានផ្តល់ប្រាក់ឧបត្តម្ភចំនួន ៣ ៦០០យន់ ឬស្មើ ៥០០ដុល្លារអាមេរិកក្នុងមួយឆ្នាំ សម្រាប់ការចិញ្ចឹមបីបាច់កូនពួកគេក្នុងម្នាក់ ដែលមានអាយុក្រោម៣ឆ្នាំ ដូច្នេះមានន័យថា ការឧបត្តម្ភសរុបរហូតដល់ ១ ៥០០ដុល្លារ ដែលនេះគឺជាការឧបត្ថម្ភនៅទូទាំងប្រទេសជាលើកដំបូងពីរដ្ឋាភិបាលក្នុងគោលបំណងជំរុញអត្រាកំណើត។
តាមសេចក្តីរាយការណ៍ពីសារព័ត៌មាន BBC នៅថ្ងៃទី២៩ ខែកក្កដា ឆ្នាំ២០២៥ បានឱ្យដឹងថា អត្រាកំណើតរបស់ប្រទេសចិននៅតែបន្តធ្លាក់ចុះ បើទោះបីជារដ្ឋាភិបាលបានលុបចោលគោលនយោបាយ១គ្រួសារកូនម្នាក់ដ៏ចម្រូងចម្រាសរបស់ខ្លួន កាលពីជិត១០ឆ្នាំមុនយ៉ាងណាក៏ដោយ។
បើតាមប្រព័ន្ធផ្សព្វផ្សាយរដ្ឋចិនបានឱ្យដឹងថា អំណោយពីរដ្ឋាភិបាលនេះ នឹងរួមចំណែកជួយបានប្រហែល ២០លានគ្រួសារជាមួយនឹងការចំណាយលើការចិញ្ចឹមបីបាច់កូន។ ខេត្តជាច្រើននៅទូទាំងប្រទេសចិន បានសាកល្បងអនុវត្តទម្រង់ផ្តល់ប្រាក់ឧបត្តម្ភមួយចំនួន ដើម្បីលើកទឹកចិត្តប្រជាជនឱ្យមានកូនកាន់តែច្រើន ខណៈដែលប្រទេសសេដ្ឋកិច្ចធំទីពីររបស់ពិភពលោកមួយនេះ ប្រឈមនឹងវិបត្តិប្រជាសាស្ត្រដែលកំពុងកើនឡើង។
ការប្រកាសកាលពីថ្ងៃទី២៨ ខែកក្កដា ឆ្នាំ២០២៥ គ្រួសារដែលមានកូនកើតចាប់ពីថ្ងៃទី១ ខែមករា ឆ្នាំ២០២៥ នឹងត្រូវបានប្រាក់ឧបត្តម្ភចំនួន ៣ ៦០០យន់ សម្រាប់រយៈពេល៣ឆ្នាំ។ ជាមួយគ្នានោះ គ្រួសារដែលមានកូនកើតនៅចន្លោះឆ្នាំ ២០២២ និង ២០២៤ ក៏អាចស្នើសុំការឧបត្ថម្ភធនមួយផ្នែកផងដែរ។ ចំណាត់ការនេះធ្វើឡើង បន្ទាប់ពីកិច្ចខិតខំប្រឹងប្រែងពីរដ្ឋាភិបាលក្នុងតំបន់ សម្រាប់ការជំរុញអត្រាកំណើតនៅក្នុងប្រទេសចិន។
កាលពីខែមីនាកន្លងទៅ ទីក្រុងហត (Hohhot) ដែលជាទីក្រុងមួយនៅតំបន់ភាគខាងជើងប្រទេសចិន បានចាប់ផ្តើមផ្តល់ជូនប្រាក់ឧបត្ថម្ភរហូតដល់ ១០ម៉ឺនយន់ ឬ ១៤ ០០០ដុល្លារសម្រាប់ទារកម្នាក់នៅក្នុងគ្រួសារគូស្វាមីភរិយាដែលមានកូនយ៉ាងហោចណាស់៣នាក់។ នៅឯទីក្រុងសេនយ៉ាង (Shenyang) ភាគឦសានទីក្រុងប៉េកាំង ក៏បានផ្តល់ប្រាក់ឧបត្ថម្ភចំនួន ៥០០យន់ ឬ ៧០ដុល្លារក្នុង១ខែដល់គ្រួសារក្នុងតំបន់មានកូនទី ៣ ដែលមានអាយុក្រោម៣ឆ្នាំ។ កាលពីសប្តាហ៍មុន ទីក្រុងប៉េកាំងក៏បានជំរុញឱ្យរដ្ឋាភិបាលក្នុងតំបន់រៀបចំផែនការ អនុវត្តការអប់រំមត្តេយ្យដោយឥតគិតថ្លៃផងដែរ។
យោងតាមការសិក្សារបស់វិទ្យាស្ថានស្រាវជ្រាវប្រជាជន YuWa ដែលមានមូលដ្ឋាននៅប្រទេសចិនបានបង្ហាញថា ប្រទេសចិនស្ថិតក្នុងចំណោមប្រទេសដែលមានការចំណាយថ្លៃបំផុតក្នុងពិភពលោក សម្រាប់ការចិញ្ចឹមបីបាច់កូន។ ការសិក្សាបានរកឃើញថា ការចិញ្ចឹមកូនចាប់ពីកើតដល់អាយុ១៧ឆ្នាំនៅក្នុងប្រទេសចិន មានការចំណាយជាមធ្យម ៧៥ ៧០០ដុល្លារ។
សូមជម្រាបថា នៅក្នុងខែមករាដើមឆ្នាំនេះ តួលេខផ្លូវការពីការិយាល័យស្ថិតិជាតិចិនបានបង្ហាញថា ចំនួនប្រជាជនចិនបានធ្លាក់ចុះក្នុងរយៈពេល៣ឆ្នាំជាប់គ្នា គិតត្រឹមឆ្នាំ២០២៤ ដោយបានកត់ត្រាអត្រាកំណើតចំនួន ៩,៥៤លាននាក់ ដែលបានកើតក្នុងឆ្នាំ២០២៤។ នោះមានការកើនឡើងបន្តិចធៀបនឹងឆ្នាំ២០២៣ ប៉ុន្តែចំនួនប្រជាជនសរុបរបស់ប្រទេសបានបន្តធ្លាក់ចុះ ខណៈដែលប្រជាជន ១,៤ពាន់លាននាក់របស់ប្រទេសសេដ្ឋកិច្ចយក្សនៅអាស៊ីមួយនេះ ក៏កំពុងមានវ័យចំណាស់យ៉ាងឆាប់រហ័សផងដែរ ដោយបន្ថែមការបារម្ភអំពីវិបត្តិប្រជាសាស្ត្រពីរដ្ឋាភិបាល៕
ចែករំលែកព័តមាននេះ