សង្គ្រាមអ៊ុយក្រែន ៖ វិមានក្រឹមឡាំងអះអាងនាថ្ងៃទី២៨កក្កដាថា ការជួបគ្នាមួយរវាងលោកវ្ល៉ាឌីមៀរពូទីននិងលោកដូណាល់ត្រាំនៅចិន នាខែកញ្ញាខាងមុខនេះមិនត្រូវបានបដិសេធឡើយ ប្រសិនបើប្រធានាធិបតីអាមេរិកមកកាន់ប្រទេសនេះក្នុងពេលជាមួយគ្នានឹងសមភាគីរុស្ស៊ី។
លោកពូទីនត្រូវទៅកាន់ប្រទេសចិន ចូលរួមក្នុងខួបលើកទី៨០នៃការបញ្ចប់សង្គ្រាមលោកលើកទី២នាដើមខែកញ្ញា។ អ្នកនាំពាក្យវិមានក្រឹមឡាំងលោកឌីមីទ្រីប៉េស្កូវ ក្នុងសន្និសីទសារព័ត៌មានមួយថ្លែងថា ប្រសិនបើប្រធានាធិបតីអាមេរិក សម្រេចទៅកាន់ប្រទេសចិនក្នុងគ្រានោះដែរ ការជួបគ្នាមួយបែបនេះជាទ្រឹស្ដីមិនអាចបដិសេធឡើយ។
លោកពូទីននឹងទៅកាន់ក្រុងប៉េកាំងចូលរួមក្នុងពិធីព្យុហៈយាត្រាយោធាដ៏ធំមួយ អបអរសាទរខួបលើកទី៨០នៃការបញ្ចប់សង្គ្រាមលោកលើកទី២។ ប្រធានាធិបតីចិនលោកស៊ីជីនពីងដឹកនាំធ្វើព្រឹត្តិការណ៍នោះ ដែលនឹងប្រព្រឹត្តទៅនៅទីលានធៀនអានមេនក្រុងប៉េកាំងនាថ្ងៃទី៣កញ្ញា។
ចាប់តាំងពីលោកដូណាល់ត្រាំវិលត្រឡប់ជាថ្មីមកកាន់កាប់សេតវិមាន ពីខែមករាឆ្នាំ២០២៥មក ប្រធានាធិបតីអាមេរិកនិងរុស្ស៊ីបានជួបគ្នាតាមទូរស័ព្ទច្រើនលើក ពិសេសផ្ដោតលើជម្លោះនៅអ៊ុយក្រែន តែមិនទាន់ដែលបានជួបគ្នាដោយផ្ទាល់នៅឡើយ។
ចំពោះជម្លោះនៅអ៊ុយក្រែន លោកដូណាល់ត្រាំប្រកាសកាលពីថ្ងៃទី២៨កក្កដា ពីបំណងរបស់លោកបំព្រួញពេលដែលលោកទុកឲ្យលោកពូទីន៥០ថ្ងៃ ដើម្បីបញ្ចប់សង្គ្រាមនៅអ៊ុយក្រែនបន្ទាប់ពីរុស្សុីបន្តវាយប្រហារខ្លាំងក្លាលើបណ្ដាទីក្រុងអ៊ុយក្រែន។ លោកត្រាំថ្លែងថា លោកទុកពេលត្រឹមតែ២សប្ដាហ៍ទៀតប៉ុណ្ណោះដល់លោកពូទីនឲ្យបញ្ចប់សង្គ្រាម បើមិនដូច្នេះទេលោកនឹងដាក់ពន្ធគយធ្ងន់បំផុតដល់រុស្ស៊ី៕
ចែករំលែកព័តមាននេះ