ខេត្តប៉ៃលិន ៖ ពលករខ្មែរក្មេងចាស់ ប្រុស ស្រី ជាច្រើននាក់ ដែលបានធ្វើដំណើរឆ្លងដែនចូលមកដល់ទឹកដីខ្មែរ កាលពីល្ងាចថ្ងៃទី២៨ ខែកក្កដា ឆ្នាំ២០២៥…
ខេត្តប៉ៃលិន ៖ ពលករខ្មែរក្មេងចាស់ ប្រុស ស្រី ជាច្រើននាក់ ដែលបានធ្វើដំណើរឆ្លងដែនចូលមកដល់ទឹកដីខ្មែរ កាលពីល្ងាចថ្ងៃទី២៨ ខែកក្កដា ឆ្នាំ២០២៥ បានលើកឡើងទាំងទឹកមុខក្រៀមក្រំថា ពួកគេស្នាក់នៅធ្វើការក្នុងប្រទេសថៃនាពេលនេះ អត់មានសុវត្ថិភាពទេ ដោយពួកគេមួយចំនួន ត្រូវបានជនជាតិថៃមើលងាយ ព្រួតគ្នាវាយដំទាត់ធាក់ ខណៈពេលដែលពួកគេកំពុងដើរនៅតាមដងផ្លូវទៅធ្វើការ និងអ្នកខ្លះទៀត ត្រូវបានជនជាតិថៃវាយនៅតាមផ្លូវសាធារណៈពេលគេដើរទៅទិញម្ហូបអាហារនៅផ្សារ និងអ្នកខ្លះទៀតត្រូវបានជនជាតិថៃចូលទៅវាយដល់ក្នុងបន្ទប់ស្នាក់នៅ បណ្តាលឱ្យរងរបួស ទើបឈប់វាយ ដោយគ្មានអាជ្ញាធរ ឬសមត្ថកិច្ចថៃណាមកជួយអន្តរាគមន៍នោះឡើយ។
ក្រោយមក ដោយមើលឃើញសភាពការណ៍មិនស្រួល និងដើម្បីធានាបាននូវសុវត្ថិភាពផ្ទាល់ខ្លួន ទើបពួកគេបាននាំក្រុមគ្រួសារប្តីប្រពន្ធនិងកូនៗ សម្រុកនាំគ្នាធ្វើដំណើរត្រឡប់មកស្រុកខ្មែរវិញ ដោយអ្នកខ្លះមានកូនតូចៗ អាយុត្រឹមតែ១-២ឆ្នាំ ខ្លះទៀតមានអាយុ៣-៤ឆ្នាំប៉ុណ្ណោះ ។ បើតាមប្រភពព័តមាន ពីបុរសវ័យក្មេងម្នាក់ឈ្មោះ ម៉ាប់ និងស្ត្រីឈ្មោះ ពៅ មានកូនតូច នៅជាប់នឹងដៃ បានរៀបរាប់ឱ្យដឹងថា ក្រុមគ្រួសាររបស់គាត់សូមស្បថថា លែងជាន់ទឹកដីថៃទៀតហើយ ទោះបីជាលំបាកវេទនាយ៉ាងណាក៏នៅតែទ្រាំធ្វើការងារនៅក្នុងប្រទេសកម្ពុជាដែរ។
ប្រភពព័ត៌មានបានឱ្យដឹងទៀតថា រហូតមកដល់ពេលនេះ ពួកគាត់ជាច្រើននាក់ ត្រូវបានថៅកែថៃមិនបើកប្រាក់ឈ្នួលឱ្យទេ ដោយសន្យាបើកឲ្យថ្ងៃនេះថ្ងៃនោះរហូត។ ចំណែកអ្នកខ្លះទៀតមិនត្រឹមតែគេមិនបានបើកប្រាក់ឈ្នួលឱ្យប៉ុណ្ណោះទេ ថែមទាំងនិយាយមើលងាយប្រមាថកាតទានដល់អាយុជីវិត និងរើសអើងជាតិសាសន៍ផងដែរ ។
ទោះបីជាយ៉ាងណាក៏ដោយ នៅពេលដែលពួកគេបានសល់ថវិកាតិចតួច ហើយបានម៉ៅឡានថៃជិះមកដល់ច្រកទ្វារអន្តរជាតិព្រំទឹកដីខ្មែរ បានលោកជំទាវ បាន ស្រីមុំ អភិបាលខេត្តប៉ៃលិន និងក្រុមការងារនៅរង់ជួបសំណេះសំណាល សួរសុខទុក្ខដោយភាពរាក់ទាក់ ធ្វើឲ្យមានភាពកក់ក្តៅ និងចាំជូនដំណើរនៅត្រង់ច្រកទ្វារព្រំដែនអន្តរជាតិព្រំ ភូមិផ្សារព្រំ ឃុំស្ទឹងកាច់ ស្រុកសាលាក្រៅ ដើម្បីឱ្យឡើងរថយន្តក្រុងវិលត្រលប់ទៅស្រុកកំណើតវិញ តាមរយៈរថយន្តក្រុងរដ្ឋបាលខេត្ត ប៉ៃលិនជាច្រើនគ្រឿង ដោយឥតគិតថ្លៃ។
បើតាមប្រភពព័ត៌មានពីលោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិន បានលើកឡើងថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើការណែនាំដល់ក្រសួង–ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និងរដ្ឋបាលខេត្ត ជាប់ព្រំដែនថៃទាំង៧ ជាពិសេស ខេត្តប៉ៃលិន ក្នុងករណីដែលមានការវិលត្រឡប់ ដោយមូលហេតុណាមួយ របស់បងប្អូនពលករខ្មែរពីប្រទេសថៃ ត្រូវត្រៀមសម្របសម្រួលការឆ្លងកាត់ព្រំដែន ការស្នាក់នៅបណ្ដោះអាសន្ន ការហូបចុក ការថែទាំព្យាបាលសុខភាពបឋម និងដឹកជញ្ជូនពីព្រំដែន ត្រឡប់ទៅស្រុកកំណើតវិញដោយឥតគិតថ្លៃ។
លោកជំទាវអភិបាលខេត្ត បានបញ្ជាក់ថា៖ ដោយសារស្ថានភាពព្រំដែនកម្ពុជាថៃនៅតែមានភាពតានតឹង និងលំបាកស្នាក់នៅធ្វើការនៅប្រទេសថៃ ទើបរដ្ឋបាលខេត្ត អំពាវនាវឱ្យប្រជាពលករខ្មែរ ដែលកំពុងធ្វើការនៅប្រទេសថៃ ត្រូវត្រឡប់មកមាតុភូមិយើងវិញ មុនពេលអាជ្ញាធរថៃ បណ្តេញចេញ ឬធ្វើការវាយដំទាត់ធាក់ បំពារបំពាន ដោយការរើសអើងការប្រមាថមើលងាយមើលថោកណាមួយ ដោយក្រុមការងាររង់ចាំទទួលទាំងអស់ឱ្យតែជាជនជាតិខ្មែរ ទោះបីជាមានឯកសារគ្រប់គ្រាន់ ឬគ្មានឯកសារគ្រប់គ្រាន់ក៏ដោយ ហើយជាក់ស្តែងនៅច្រកទ្វារព្រំដែនអន្តរជាតិព្រំ ខេត្តប៉ៃលិន គឺមានបងប្អូនពលករខ្មែរ បានធ្វើដំណើរឆ្លងព្រំដែន ត្រលប់មកកម្ពុជាវិញជារៀងរាល់ថ្ងៃ ជាពិសេសថ្ងៃនេះមានច្រើនគួរឱ្យកត់សម្គាល់ ដោយរដ្ឋបាលខេត្ត បានសហការជាមួយ ក្រសួងការងារ និងបណ្តុះបណ្តាលវិជ្ជាជីវៈ កំពុងរៀបចំទីតាំងត្រៀមទទួលបងប្អូនពលករ នៅក្បែរព្រំដែន ដើម្បីសម្រួលទាំងការស្នាក់នៅបណ្ដោះអាសន្ន ការហូបចុក ការថែទាំព្យាបាលសុខភាព និងជូនដំណើរវិលត្រលប់ទៅស្រុកកំណើតវិញ ដោយឥតគិតថ្លៃ ព្រមទាំងជួយរកការងារជូនបងប្អូនពលករទាំងអស់ផងដែរ។
លោកជំទាវ បាន ស្រីមុំ ក៏បានអំពាវនាវ និងជូនដំណឹងដល់បងប្អូនពលករខ្មែរ ដែលមានបំណងវិលត្រឡប់មកស្រុកកំណើតវិញ តាមច្រកទ្វារព្រំដែនអន្តរជាតិព្រំ ខេត្តប៉ៃលិន ឬក្នុងករណីបងប្អូនកំពុងស្ថិតនៅក្នុងប្រទេសថៃ ជួបបញ្ហាដែលថៅកែមិនទាន់បើកប្រាក់ខែ ជូន និងគ្មានមធ្យាបាយធ្វើដំណើរមកដល់ព្រំដែនកម្ពុជាវិញ។ តែមានបំណងចង់វិលត្រឡប់ទៅស្រុកកំណើតរបស់់ខ្លួន សូមទំនាក់ទំនងតាមរយៈលេខទូរស័ព្ទ 0975 79 78 78 / 088 369 6666 ក្រុមការងារនឹងរង់ចាំជួយសម្របសម្រួលជូន ២៤ម៉ោង/២៤ម៉ោង។
បើតាមប្រជាពលករម្នាក់ទៀត ឈ្មោះ មួយ ភេទស្រី បានបង្ហើបឱ្យដឹងថា សព្វថ្ងៃនេះ ជនជាតិថៃដែលជ្រុលនិយម ពិតជាមានចរិតសាហាវណាស់ មានការរើសអើង មើលងាយចំពោះពលករខ្មែរយើងយ៉ាងខ្លាំង ជាពិសេសកំឡុងពេលមានបញ្ហាជម្លោះព្រំដែនជាមួយខ្មែរ ដោយមានក្រុមជនជាតិថៃជ្រុលនិយមមួយចំនួន បាននាំគ្នាដើរតាមដងផ្លូវ ដើរតាមកន្លែងការងារការដ្ឋាន នៅពេលឃើញពលរដ្ឋខ្មែរ គឺពួកគេ បាននាំគ្នាព្រួតវាយជនជាតិខ្មែរយើង បណ្តាលឱ្យរងរបួសធ្ងន់ ឬស្រាល។
បើមិនព្រមរត់គេចខ្លួនទេអាចនឹងមានគ្រោះថ្នាក់ដល់អាយុជីវិតថែមទៀតផងដែរ។ ដូច្នេះ ពួកគាត់ពិតជាមានការភ័យខ្លាចយ៉ាងខ្លាំងចំពោះសុវត្ថិភាព ដោយនាំគ្នាបន់ស្រន់បួងសួងដល់ដូនតាឱ្យជួយការពារ ហើយនៅពេលធ្វើដំណើរដល់ស្រុកខ្មែរវិញ នឹងស្បថថាលែងជាន់ទឹកដីថៃអស់មួយជីវិត។ ពួកគេក៏សូមអំពាវនាវ និងផ្តាំផ្ញើដល់ប្រជាពលរដ្ឋខ្មែរទាំងអស់សូមឈប់នាំគ្នាទៅធ្វើការនៅក្នុងប្រទេសថៃទៀតទៅ ទោះបីជាស្របច្បាប់ឬខុសច្បាប់ក្តី គឺគ្មានសុវត្ថិភាពទេ៕
ចែករំលែកព័តមាននេះ